އެމްއެމްޕީއާރުސީން ސީއެންއެން ގްލޯބަލް އިންޓަނޭޝަނަލް އާއެކު މިއަހަރުވެސް ރާއްޖެ އިސްތިހާރުކުރުމުގެ ކެމްޕެއިން ކުރިއަށް ގެންދިއުމަށް ސޮއިކޮށްފިއެވެ.
ފާއިތުވެދިޔަ ދެ އަހަރުވެސް އެމްއެމްޕީއާރުސީންވަނީ ސީއެންއެންއާއެކު މިކެމްޕެއިން ކާމިޔާބުކަމާއެކު ހިންގާފައެވެ. މި ކެންޕެއިން ކުރިއަށްގެންދާނީ މިއަހަރުގެ ޖޫންމަހުން ފެށިގެން އޮކްޓޯބަރ މަހުގެ ނިޔަލަށެވެ. މި އެއްބަސްވުމުގައި ސޮއެކޮށްފައިވަނީ މިމަހުގެ 25ވަނަ ދުވަހުއެވެ.
ސީއެންއެން ގްލޯބަލް އިންޓަނޭޝަނަލްއާއި އެމްއެމްޕީއާރުސީއާއެކުވި އެއްބަސްވުމުގައި ސޮއިކޮށްފައިވަނީ އެމްއެމްޕީއާރުސީގެ ޗީފް އެކްޒެކިޓިވް އޮފިސާ އަދި މެނޭޖިން ޑިރެކްޓަރު ޠައްޔިބު މުޙައްމަދާއި ސީއެންއެން އިންޓަނޭޝަނަލް ކޮމާޝަލްގެ ޑިރެކްޓަރ ސޭލްސް، ސައުތް އޭޝިއާ، އަބިޖީތު ދަރއެވެ.
މި އެއްބަސްވުމާ ބެހޭގޮތުން ވާހަކަ ދައްކަވަމުން ޠައްޔިބު ވިދާޅުވިގޮތުގައި، ފާއިތުވެދިޔަ ދެ އަހަރު ވެސް އިމަރސިވް ސްޓޯރީޓެލިންގ ބޭނުންކޮށްގެން ދިވެހިރާއްޖެ އިސްތިހާރުކުރުމުގައި ސީއެންއެންގެ ދައުރު ވަރަށް ބޮޑެވެ. އަދި ދިވެހިރާއްޖޭގެ ފަތުރުވެރިކަމުގެ ރަން ޔޫބީލް ފާހަގަކުރަމުން މިދާ ދަނޑިވަޅުގައި މި ކެމްޕެއިނުން ދިވެހިރާއްޖޭގެ ޘަޤާފަތާއި މަންޒަތުތަކާއި ވާހަކަތައް ދައްކުވައިދޭނީ ފަތުރުވެރިންގެ އިޙްސާސްތަކާ ގުޅުވައިގެންކަމަށްވެސް ޠައްޔިބު ހާމަކުރެއްވިއެވެ.
މި ކެމްޕޭނުގެ ތެރޭގައި "ރީޑިސްކަވާ ޕެރެޑައިސް"ގެ ނަމުގައި ފަތުރުވެރިންގެ އިޙްސާސަތަކާ ގުޅޭފަދަ ވާހަކަތައް ދައްކުވައިދޭ ކޮންޓެންޓް ޕްރޮޑަކްޝަނެއް ސީއެންއެންއިން ކުރިއަށްގެންދާނެއެވެ. މީގެ އިތުރުން، ރާއްޖޭގެ ޓްރެވަލް އެންޑް ލައިފްސްޓައިލް ކޮންޓެންޓް ސީއެންއެންއިން އުފައްދާ، ޓީވީ އަދި ޑިޖިޓަލް ޕްލެޓްފޯމްތަކުގައި ދައްކާނެއެވެ. މި ކެމްޕޭނުގައި އުފައްދާ ކޮންޓެންޓް 2 ބިލިއަނަށްވުރެ ގިނަ މީހުންނަށް ފޯރާނެކަމަށް އެމްއެމްޕީއާރުސީން ވަނީ އަންދާޒާކޮށްފައެވެ.