ފްލައިޓް ފުރުމަށް ހަމަޖެހިފައިވާ ގަޑީގެ، ތިން ގަޑިއިރު ކުރިން އެއަރޕޯޓަށް ދިޔުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އިލްތިމާސްކޮށްފިއެވެ.
އެމްއޭސީއެލުން މިގޮތަށް އިލްތިމާސްކޮށްފައި މިވަނީ ޗުއްޓީ އާއި ދިމާކޮށް އެއަރޕޯޓަށް ބާރުބޮޑުވެފައިވާތީއެވެ. އެމްއޭސީއެލްއިން ވިދާޅުވީ، އެއަރޕޯޓުގެ ކިއުތައް ދިގުވުމުގެ ސަބަބުން ފްލައިޓު ޑިލޭތައް އައުމަކީ އެކަށީގެންވާ ކަމެއް ކަމަށެވެ. އެހެންކަމުން ފްލައިޓު ފުރުމަށް ހަމަޖެހިފައިވާ ގަޑީގެ ކުރިއަށް ވަގުތު އޮތްވާ އެއަރޕޯޓަށް ދިޔުން މުޙިއްމު ކަމަށް އެމްއޭސީއެލްއިން ވިދާޅުވެއެވެ.
އަދި ކޯވިޑުގެ މި ހާލަތުގައި ދަތުރުކުރާ މީހުން މާސްކު ބޭނުން ކުރުމަށާއި އެޗްޕީއޭ އިން ކަނޑައަޅާފައިވާ ގައިޑްލައިންތަކަށް އަމަލުކުރުމަށްވެސް އެމްއޭސީއެލްއިން ވަނީ އިލްތިމާސްކޮށްފައެވެ.
ސްކޫލް ބޮޑު ޗުއްޓީ މިހާރު ފެށިފައިވާއިރު، އަންނަ ހަފްތާއަކީ ބޮޑު އީދު ޗުއްޓީއެވެ. މިއަހަރުގެ ބޮޑު އީދާއި ގުޅިގެން ސަރުކާރު އޮފީސްތައް އެއް ހަފްތާއަށް ބަންދުވެއެވެ.