ބޭރުގެ ގިނަ އަދަދެއްގެ ބައިވެރިންނާއި އެކު، 5 ވަނަ އިންޓަރނޭޝަނަލް މޯލްޑިވްސް ޓްރެވަލް މާކެޓް، އައިއެމްޓީއެމް ފަށައިފިއެވެ. ދެ ދުވަހުގެ މުއްދަތަކަށް ބާއްވާ މިފެއަރ ކުރިއަށްދާނީ މެންހެޓަން ބިޒްނަސް ސްކޫލްގައެވެ.
"އައިއެމްޓީއެމް"އަކީ ރާއްޖޭގައި ފަތުރުވެރިކަމުގެ ވިޔަފާރިކުރާ ފަރާތްތަކުގެ ވިޔަފާރި ބޭރުގެ ފަރާތްތަކަށް އިޝްތިހާރުކޮށް، ގުޅުން ބަދަހި ކުރުމުގެ ފުރުސަތު ފަހިކޮށްދިނުމަށް ކުރިއަށްގެންދާ ފެއަރއެކެވެ. މިފެއަރގައި ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ލޯކަލް ގެސްޓް ހައުސްތަކާއި ރިސޯޓްތަކާއި ޑައިވް ސެންޓަރުތަކާއި، ލޯކަލް ޓްރެވަލް އެޖެންސީތަކާއި ޓުއަރ އޮޕަރޭޓަރުން ބައިވެރިވެފައިވެއެވެ.
އައިއެމްޓީއެމް ފެއަރ ރަސްމީކޮށް ހުޅުއްވައިދެއްވީ، ޓޫރިޒަމް މިނިސްޓަރ ޑރ. އަބްދުﷲ މައުސޫމެވެ. ފެއަރ ހުޅުވުމުގެ ރަސްމިއްޔާތުގެތެރެއިން ނޫސްވެރިންނާއި ވާހަކަދައްކަވަމުން ޓޫރިޒަމް މިނިސްޓަރ މައުސޫމް ވިދާޅުވީ މިފަދަ ހަރަކާތްތަކާއެކު ރާއްޖޭގެ ފަތުރުވެރިކަން ކުރިއަރައިގެން ދިޔުމަށް އެހީތެރިވެދޭނެ ކަމަށެވެ.
" ނެޓްވޯކިން ޝޯތައް، އެކި ޤައުމުތަކުން ޓޫރިސްޓުން ގެނައުމަށް، ވަރަށް މުހިންމު މިފަދަ ކޮންމެ އިވެންޓެއްވެސް،" މިނިސްޓަރ މައުސޫމް ވިދާޅުވިއެވެ.
އައިއެމްޓީއެމް ނުވަތަ އިންޓަނޭޝަނަލް މޯލްޑިވްސް ޓްރެވެލް މާކެޓްގެ މިއަހަރުގެ ޝިއާރަކީ "އައު ޚިޔާލުތަކާއި ބަދަލުތަކާއެކު ވިލުންވެރި ފަތުރުވެރިކަމަކަށް" މިޝިއާރެވެ.
އައިއެމްޓީއެމް ފެށުމުގެ ރަސްމިއްޔާތުގައި ވާހަކަދައްކަވަމުން މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްއެމްޕީއާރުސީގެ ޗީފް އެކްޒެކިޓިވް އޮފިސަރ އަދި މެނޭޖިން ޑިރެކްޓަރު ޠައްޔިބު މުޙައްމަދުވަނީ ރާއްޖޭގެ ފަތުރުވެރިކަން ދުނިޔޭގެ ފެންވަރުގައި ކުރިއަރާފައިވާ މިންވަރަށް އަލިއަޅުއްވާލައްވާފައެވެ.
" ސަރުކާރުން އަބަދުވެސް ޓޫރިޒަމް ސިނާއަތް ކުރިއެރުމަށް މަސައްކަތްކުރޭ، ޚާއްސަކޮށް މި ސަރުކާރުން، ރާއްޖެ އިޝްތިހާރުކުރުމުގައި ގެންގުޅޭ ސިޔާސަތާއި އެކު ރާއްޖެއަށް އަންނަ ފަތުރުވެރިންގެ އަދަދުތަކަށް އަންނަނީ ބޮޑެތި ކުރިއެރުންތައް ލިބެމުން،" ޠައްޔިބު ވިދާޅުވިއެވެ.
އައިއެމްޓީއެމް ފެއަރ ހުޅުވުމުގެ ރަސްމިއްޔާތުގައި މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖު ޔުމްނާ މައުމޫންވެސް ބައިވެރިވެވަޑައިގެންނެވިއެވެ. އަދި މީގެއިތުރުން ރާއްޖޭގެ ފަތުރުވެރިކަމުގެ ދާއިރާގައި ފާހަގަކޮށްލެވޭ ގިނަ ފަރާތްތަކުން ބައިވެރިވެފައިވާކަން ފާހަގަކޮށްލެވެއެވެ.
މިއަހަރުގެ އައިއެމްޓީއެމް ފެއަރގައި ބޭރުގެ 17 ޤައުމެއްގެ 36 ކުންފުންޏަކުން ބައިވެރިވެއެވެ. އަދި ރާއްޖޭގެ ރިސޯޓް، ގެސްޓުހައުސް، ހޮޓެލް، ސަފާރީތައް ހިމެނޭހެން 100 ކުންފުންޏަކުން ބައިވެރިވެއެވެ.