ފްރާންސްގައި ކުރިއަށްދާ އައިއެފްޓީއެމް ޓޮޕް ރެސާގައި ވިޒިޓް މޯލްޑިވްސްއިން ބައިވެރިވެއްޖެއެވެ. މިއިވެންޓުގައި ވިޒިޓް މޯލްޑިވްސްއާއެކު ރާއްޖޭގެ ފަތުރުވެރިކަމުގެ ދާއިރާގައި ޙަރަކާތްތެރިވާ 20އަށްވުރެ ގިނަ ކުންފުނިތަކުން ވަނީ ބައިވެރިވެފައެވެ. މި ޙަރަކާތް ކުރިއަށް ދާނީ މިމަހުގެ 20އިން 22އަށް ފްރާންސްގެ ވެރިރަށް ޕެރިހުގައެވެ.
އައިއެފްޓީއެމް ޓޮޕް ރެސާއަކީ ފަތުރުވެރިކަމުގެ އެކި ސެގްމެންޓުގެ ޚިދުމަތްދޭ ފަރާތްތަކުން ބައިވެރިވާ ފެއާއެކެވެ. މިފެއާގެ މަޤްސަދަކީ ފަތުރުވެރިކަމުގެ އެކި ސެގްމަންޓުތަކުގެ ޚިދުމަތްދޭ ފަރާތްތަކާއި މިފަދަ ޚިދުމަތްތައް ލިބިގަންނަ ފަރާތްތައް އެއްތަނަކުން ބައްދަލުވެ ގުޅުން ބަދަހިކުރުމުގެ ފުރުސަތު ފަހިކޮށްދިނުމެވެ.
މި ފެއާގައި މަތީ ފަންތީގެ ވިޔަފާރިތަކާއި މައިސް މީޓިންގްސް، އިންސެންޓިވްސް، ކޮންފަރެންސަސް އަދި އެގްޒިބިޝަންސްގެ ހިދުމަތްދޭ ފަރާތްތަކުން ބައިވެރިވެ، މި ސެގްމެންޓުތަކުގައި ލިބެން ހުރި ޚިދުމަތްތަށް ދައްކާލާނެއެވެ. މި ފެއާއަށް ފަތުރުވެރިކަމުގެ ދާއިރާގައި ހަރަކާތްތެރިވާ ޓުއަރ އޮޕަރޭޓަރުންނާއި، ޓްރެވަލް އެޖެންޓުން، އަދި ފަތުރުވެރިކަމުގެ ޚިދުމަތް ހޯދަން ބޭނުންވާ ފަރާތްތަކުން ޒިޔާރަތްކުރާނެއެވެ.
Visit Maldives and industry partners are here at IFTM Top Resa 2022 reconnecting with the French market! #WorldsLeadingDestination2021 #VisitMaldives #SunnySideOfLife pic.twitter.com/j4REBG0cyI
— Visit Maldives (@visitmaldives) September 21, 2022
އައިއެފްޓީއެމް ޓޮޕް ރެސާގެ ތެރެއިން ކުރިއަށް ގެންދާ ބައްދަލްވުންތަކާއި ސެޝަންތަކުގެ ޒަރިއްޔާއިން ރާއްޖެއަކީ ފަތުރުވެރިން ޒިޔާރަތްކުރުމަށް އެންމެ ރައްކާތެރި މަންޒިލްގެ ގޮތުގައި އިސްތިހާރުކުރެވޭނެއެވެ. އަދި ފްރާންސްގެ ފަތުރުވެރިންގެ މެދުގައި ރާއްޖޭގެ މަޤުބޫލުކަން ދަމަހައްޓާ، ފްރާންސްގެ ޓްރެވަލް އެޖެންޓުންނާއި ޓުއަރ އޮޕަރޭޓަރުންނަށް ރާއްޖޭގެ އެންމެ ފަހުގެ މަޢުލޫމަތު ހިއްސާކުރެވޭނެއެވެ. މި ގޮތުން ރާއްޖޭގެ ރިސޯޓު، ހޮޓެލް، ގެސްޓްހައުސް އަދި ލިވަބޯޑު ތަކުގެ މައުލޫމާތާއި، ރާއްޖެއިން ފަތުރުވެރިންނަށް ލިބެންހުންނަ ތަފާތު ތަޖުރިބާތައް އިސްތިހާރުކުރެވޭނެއެވެ.
މިއީ ފްރާންސްގެ މާކެޓުގައި ރާއްޖޭގެ މަޤުބޫލުކަން ދެމެހެއްޓުމަށް ވިޒިޓް މޯލްޑިވްސްއިން ގެންގުޅޭ ސްޓްރެޓެޖީގެ ދަށުން ބައިވެރިވާ ހަރަކާތެކެވެ. ފްރާންސް އަކީ މިއަހަރުގެ މިހާތަނަށް 7ވަނައަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ޤައުމެވެ. އެގޮތުން މިމަހުގެ 14ވަނަ ދުވަހާއި ހަމައަށް ފްރާންސްއިން ރާއްޖެއަށް 35،115 ފަތުރުވެރިން ވަނީ ޒިޔާރަތްކޮށްފައެވެ.