ވެލާނާ އިންޓަރނޭޝަނަލް އެއަރޕޯޓްގެ އައު ރަންވޭ އަންނަމަހުގެ 6 ވަނަ ދުވަހު ބޭނުންކުރަން ފެށުމަށް ތައްޔާރުވަމުންދާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އެމްއޭސީއެލްއިން ވިދާޅުވެއްޖެއެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ އެއް ބިލިއަން ޑޮލަރުގެ މަޝްރޫޢު ހިމަނައިގެން، އައު ރަންވޭ ތަރައްޤީކުރުމުގެ މަސައްކަތް ފެށީ 2017ވަނަ އަހަރުއެވެ. ރަންވޭގެ ޢަމަލީ މަސައްކަތް ނިންމައި 2018ވަނަ ޓެސްޓް ފްލައިޓްވެސް ވަނީ އައު ރަންވޭއަށް ޖައްސާއެވެ. އަދި މި ހަފްތާގެކުރީކޮޅު ވަނީ އައު ރަންވޭގައި އިންސްޓްރޫމެންޓް ލޭންޑިން ސިސްޓަމް (އައިއެލްއެސް) ވެސް ހަރުކޮށްފައެވެ. އިންސްޓްރޫމެންޓް ލޭންޑިން ސިސްޓަމް (އައިއެލްއެސް) އަކީ މޫސުމީ ޙާލަތަށް ބަލައި، މަތިންދާބޯޓުތައް ރަންވޭގައި ޖައްސަން ޕައިލެޓުންނަށް އެހީތެރިވެދިނުމަށް ބޭނުންކުރާ ނެވިގޭޝަން ސިސްޓަމެކެވެ. މިސިސްޓަމް ހަރުކޮށްފައި މިވަނީ ސިސްޓަމް ޓެސްޓުކުރުމަށް ފަހުގައެވެ.
ވީ.އައި.އޭގެ އައު ރަންވޭއަކީ 3400 މީޓަރު ދިގު، 65 މީޓަރު ފުޅާ ރަންވޭއެކެވެ. ކޯޑް.އެފް ފެންވަރުގެ މި ރަންވޭއަކީ ކޮމާޝަލް ދަތުރުތަކުގައި މިވަގުތު ބޭނުންކުރާ އެންމެ ބޮޑެތި ބޯޓުފަހަރުކަމަށްވާ A380 މަރުކާގެ ބޯޓު ފަހަރަށްވެސް ޖެއްސޭނެހެން ފަރުމާކޮށްފައިވާ ރަންވޭއެކެވެ.
އައު ރަންވޭ ބޭނުން ކުރަން ފެށުމުން ފްލައިޓުތައް އެއަރޕޯޓުގައި ޖައްސާ ޓެކްސީވޭ ކުރުމަށް ހޭދަވާ ވަގުތު ވަރަށް ބޮޑަށް ކުޑަކުރެވިގެންދާނެ ކަމަށް އެމްއޭސީއެލް އިން ވިދާޅުވެއެވެ.
އައު ރަންވޭ ބޭނުންކުރަން ފެށުމާއި އެކު އަންނަމަހުގެ 6ވަނަ ދުވަހު ސީ ޕްލޭން ޓަރމިނަލްވެސް ރަސްމީކޮށް ބޭނުންކުރަން ފަށާނެއެވެ. ޒަމާނީ ފެންވަރަށް ތަރައްޤީކޮށްފައިވާ، 4 ފަންގިފިލާގެ އައު ސީ ޕްލޭން ޓަރމިނަލްގެ އެންމެ ތިރީ ފަންގިފިލާ ޚާއްސަކޮށްފައިވަނީ، ރިސެޕްޝަން އޭރިއާގެ ގޮތުގައެވެ. އެގޮތުން މިހާތަނަށް ޓްރާންސް މޯލްޑިވިއަން އެއަރވޭސްގެ ހުރިހާ ޚިދުމަތްތައް ވަނީ އާ ޓަރމިނަލަށް ބަދަލުކޮށްފައެވެ. އެ ފްލީޓްގައި 57 ސީ ޕްލޭން ބޭނުންކުރަމުންދެއެވެ.
ޓަރމިނަލްގެ ލައުންޖްތައް ހުންނާނީ އިމާރާތުގެ ދެ ވަނަ ފަންގިފިލާއިން ފެށިގެންނެވެ. އަދި ޚިދުމަތް އަވަސް ކުރުމަށް 4 ލިފްޓާއި އެސްކަލޭޓަރއެއްވެސް ހުރެއެވެ.
މީގެއިތުރުން ވިއައިޕީއަށް ޚާއްސަ ލައުންޖެއް އަލަށް ތަރައްޤީކޮށްފައިވާ ސީ ޕްލޭން ޓަރމިނަލްގައި ހުރެއެވެ.