ރާއްޖޭގެ އުތުރުގެ ސަރަޙައްދުތަކުން މަސް ގަންނަ މަރުކަޒެއް ހއ. އިހަވަންދޫގައި ގާއިމްކުރުމަށް ނިންމާފައިވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ޤައުމީ ފެރީގެ ނިޒާމް "ރާއްޖެ ޓްރާންސްޕޯޓް ލިންކް" ޒޯން 1 ގައި ރަސްމީ ގޮތުން އިފްތިތާހްކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ބޮޑު ތިލަދުންމަތީގެ ރަށްރަށުގައި ކުރިއަށްދާ ޕްރޮޖެކްޓްތަކާއި ކުރިއަށް ރޭވިފައި ހުރި ޕްރޮޖެކްޓްތަކާއި ގުޅޭގޮތުން މައުލޫމާތު ދެއްވަމުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވީ އެ ސަރަޙައްދުގައި އޮތް އެންމެ ދިރުންހުރި އެއް އިޤްތިޞާދަކީ އިހަވަންދޫގެ އިޤްތިސާދު ކަމަށެވެ. އަދި އެރަށުގެ އިޤްތިޞާދު ކުރިއެރުވުމަށްޓަކައި ގިނަ މަސައްކަތްތަކެއް ސަރުކާރުން ކުރަން ރާވާފައިވާކަން ރައީސް ފާހަގަކުރެއްވިއެވެ.
"އިހަވަންދުއަށް ދިމާވެފައިވާ ބަނދަރާއި ބިމުގެ ދަތިކަން ޙައްލުކޮށްދޭންޖެހޭ. މި ދެންނެވި ދެ މަޝްރޫޢު އިހަވަންދޫގައި އެދަނީ ހިނގަމުން. އަދި އިރާދަކުރެއްވިއްޔާ މި ސަރަޙައްދުން މަސް ގަންނަ މަރުކަޒުގެ މަސައްކަތް، އަންނަ އަހަރު އިހަވަންދޫގައި ފެށޭނެ" ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވިއެވެ.
ސަރުކާރުން އަމާޒް ހިފާފައިވަނީ އަންނަ އަހަރުތެރޭ އެތަނުން މަސް ގަންނަ ފެށުމަށެެވެ. މައުލޫމާތު ލިބިފައިވާގޮތުގައި އިހަވަންދޫގައި ތަރައްޤީކުރުމަށް ހަމަޖެހިފައިވަނީ މަސް ގަނެ ރައްކާކުރާ ކާރުހާނާއެކެވެ. އެތަނުން ރާއްޖެއިން ބޭރަށް މަސް އެކްސްޕޯޓުކުރުމާއި، ރާއްޖޭގެ އެހެން ކުންފުނިތަކަށް މަސް ވިއްކުމުގެ މަސައްކަތްވެސް ކުރާނެއެވެ.
މަސް ކިރުވުމުގައި ހުރި ދަތިތައް ހައްލުކުރުމަށް ސަރުކާރުން ގެންދަވަނީ ގިނަ މަސައްކަތްތަކެއް ކުރަމުންނެވެ. އެގޮތުން މިފްކޯގެ ކެޕޭސިޓީ އިތުރުކުރުމަށް ބިޔަ މަޝްރޫޢެއް ކުރިއަށްގެންދާއިރު، މަސް ކިރުވުމުގެ މަސައްކަތަށް އަވަސް ހައްލެއް ހޯދައިދިނުމަށް މިފްކޯގެ މަސް ކިރުވުމުގެ މަސައްކަތަށް އިތުރު ބޯޓުތައް ހޯދުމަށްވެސް ސަރުކާރުން އަންނަނީ މަސައްކަތް ކުރަމުންނެވެ.