ފާޑުކިޔުމަކީ ރާއްޖޭގެ ފަތުރުވެރިކަމުގެ ބްރޭންޑް ރަނގަޅުކުރުމަށް މުހިންމު ކަމެއްކަމަށް އެމްއެމްޕީއާރުސީގެ ޗީފް އެގްޒެކެޓިވް އޮފިސަރ އަދި މެނޭޖިންގ ޑިރެކްޓަރ ތޮއްޔިބު މުހައްމަދު ވިދާޅުވެއްޖެއެވެ.
ތޮއްޔިބު މުހައްމަދު މިހެން ވިދާޅުވީ އަންނަ އަހަރުތެރޭގައި ރާއްޖެ އިޝްތިހާރުކުރުމަށް މާކެޓިންގ ސްޓްރެޓަޖީތައް ކަނޑައެޅުމަށް އިންޑަސްޓްރީގެ ފަރާތްތަކާއި އެމްއެމްޕީއާރުސީން މަޝްވަރާކުރުމަށް ބޭއްވި ބައްދަލުވުމުގައެވެ.
'ޓޫރިޒަމް މާކެޓިޔަރސް އީވްނިންގް 2022'ގެ ނަމުގައި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީ ރާވައިގެން ކުރިއަށްގެންދިޔަ ހަރަކާތުގައިވަނީ އަންނަ އަހަރުގެ ރާއްޖޭގެ ޑެސްޓިނޭޝަން މާކެޓިންގް ސްޓްރެޓަޖީތައް ކަނޑައެޅުމަށް އިންޑަސްޓްރީގެ ބޭފުޅުންނާއެކު މަޝްވަރާކޮށް، ފީޑްބެކާއި ހިޔާލުތައް ހޯދާފައެވެ.
ފަތުރުވެރިކަމުގެ ދާއިރާގައި ހަރަކާތްތެރިވާ 41 ބޭފުޅުން މި އިވެންޓުގައި ބައިވެރިވެފައިވެއެވެ. މީގެ ތެރޭގައި މެނޭޖިންގް ޑިރެކްޓަރުންނާއި ޖެނެރަލް މެނޭޖަރުންނާއި ސޭލްސް އެންޑް މާކެޓިންގް މެނޭޖަރުންގެ އިތުރުން ފަތުރުވެރިކަމުގެ ދާއިރާގައި އެކި ފެންވަރުގައި ހަރަކާތްތެރިވާ ގިނަ އަދަދެއްގެ ފަރާތްތައް ހިމެނެއެވެ.
މި އިވެންޓުގެ ވާހަކަދައްކަވަމުން އެމްއެމްޕީއާރުސީގެ ޗީފް އެގްޒެކެޓިވް އޮފިސަރ އަދި މެނޭޖިންގ ޑިރެކްޓަރ ތޮއްޔިބު މުހައްމަދު ވަނީ އިންޑަސްޓްރީ ޕާޓްނަރުންގެ ފަރާތުން ލިބޭ ޚިޔާލުތަކާއި، ފީޑްބެކް، އަދި ފާޑުކިޔުންތަކަކީ ރާއްޖޭގެ ބްރޭންޑް މެދުނުކެނޑި ރަނގަޅު ކުރަމުން ގެންދިއުމަށް ވަރަށް މުހިންމު ކަމެއްކަން ފާހަގަކުރައްވާފައެވެ.
"ފަތުރުވެރިކަމުގެ މަންޒިލެއްގެ ގޮތުގައި ދިވެހިރާއްޖެ ޕްރޮމޯޓްކުރާ ސްޓްރެޓެޖީތައް އަޅުގަނޑުމެން ތައްޔާރުކުރާއިރު އެމްއެމްޕީއާރުސާއިން އަބަދުވެސް އިސްކަންދެމުން އަންނަނީ ސިނާއަތާ ގުޅިގެން މަސައްކަތް ކުރުމަށް." ތޮއްޔިބު ވިދާޅުވިއެވެ.
އިންޑަސްޓްރީ ޕާޓްނަރުންނާ ގުޅިގެން ރާއްޖޭގެ ފަތުރުވެރިކަމުގެ ޕްރޮމޯޝަނަލް ހަރަކާތްތަކާއި މާކެޓިންގް ސްޓްރެޓެޖީތައް އެއްގޮތްކޮށް، އެކުލަވާލުމަށްޓަކައި ތަފާތު ހިޔާލުތަކާއި ގުޅޭގޮތުން މަޝްވަރާކުރިއެވެ. އަދި އެންމެ ކާމިޔާބު އަދި ފަހުގެ ޑެސްޓިނޭޝަން މާކެޓިންގް ސްރެޓަޖީތަކާއި ބެހޭގޮތުން ހިޔާލުތައް ހިއްސާކޮށް ތަފާތު އެކިއެކި މެސެޖްތަކުގެ ބަދަލުގައި އެއްގޮތަކަށް ޑެސްޓިނޭޝަން މެސެޖުތައް ފަރުމާކުރުމާ ބެހޭގޮތުން މި އިވެންޓުގައި ގިނަ މަޝްވަރާތަކެއް ވަނީ ކޮށްފައެވެ.
މި އިވެންޓުގައި ފެއަރތަކާއި ރޯޑްޝޯތަކާއި ފެމިލިއަލައިޒޭޝަން ދަތުރުތައް ފަދަ މާކެޓިންގް ހަރަކާތްތަކާއި ބެހޭގޮތުން މަޝްވަރާކުރިއެވެ. އަދި އެކި މާކެޓްތަކާއި ސެގްމަންޓްތަކާއި ސޯޝަލް މީޑިއާ އަދި ރާއްޖޭގެ ޑެސްޓިނޭޝަން ޕްރޮމޯޝަން މެޓީރިއަލްތަކާ ބެހޭ ގޮތުން ހިޔާލު ބަދަލުކުރިއެވެ.
މިއަހަރުގެ އޮގަސްޓް މަހުގެ ނިޔަލަށް އެމްއެމްޕީއާރުސީން ވަނީ 32 ފެއަރއެއްގައި ބައިވެރިވެ، 7 ސިޓީއެއްގައި 3 ރޯޑްޝޯ ބާއްވާ، 16 ފެމިލިއަރައިޒޭޝަން ދަތުރު ހޯސްޓްކޮށް، 6 ވަރޗުއަލް އިވެންޓް ބާއްވާފައެވެ. އަދި 12 ޖޮއިންޓް ޕްރޮމޯޝަނަލް ކެމްޕެއިން ހިންގާ، ސޯޝަލް މީޑިއާ މެދުވެރިކޮށް 12 ކެމްޕޭނެއް ވަނީ ކުރިއަށްގެންގޮސްފައެވެ. މީގެ އިތުރުންވެސް މި އަހަރު ތެރޭގައި އެމްއެމްޕީއާރުސީން ވަނީ އެހެނިހެން 63 ކެމްޕޭން ކުރިއަށް ގެންގޮސްފައެވެ. އަދި އެމްއެމްޕީއާރުސީގެ ސްޓްރެޓަޖީތައް ތަންފީޒުކުރުމަށް އެންމެ މުހިއްމު 15 މާކެޓުގައި ޕީއާރު އެޖެންސީތަކާ ގުޅިގެން މަސައްކަތްކޮށްފައިވެއެވެ.