އެމްޕީއެލަށް ބޭނުންވާ ތެޔޮ ހޯދުމުގެ ތެރޭގައި ހިންގިކަމަށް ބުނާ ކޮރަޕްޝަންގެ ބޮޑު މައްސަލާގައި ފިޔަވަޅު އަޅަިއ، އެ މައްސަލަ ކަމާގުޅުންހުރި އިދާރާތަކުން ތަޙްގީގްކުރަމުން އަންނަކަމަށް އެމްޕީއެލްގެ ސީއީއޯ ޝާހިދު ޢަލީ ވިދާޅުވެއްޖެއެވެ.
ކޯވިޑް19ގެ ތެރޭގައި އެމްޕީއެލަށް ބޭނުންވާ ތެޔޮ ހޯދުމުގައި ހިންގާފައިވާކަމަށް ތުހުމަތުކުރާ 8 މިލިއަން ރުފިޔާގެ ވައްކަމާއި ގުޅޭގޮތުން، މީޑިއާއަށް މަޢުލޫމާތު ދެއްވަމުން އެމްޕީއެލްގެ ސީއީއޯ ޝާހިދު ޢަލީ ވިދާޅުވީ، އެ މައްސަލަ ފާހަގަވި ހިސާބުން ފެށިގެން އެކަމުގައި ޝާމިލުވާ މީހުންނާމެދު ފިޔަވަޅު އަޅާފައިވާނެކަމަށެވެ. އެގޮތުން އެކަމުގައި ޝާމިލުވާ އެންމެން ވަޒީފާއިން ވަކިކޮށްފައިވާކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ އެ ޖަރިމާ ހިންގުމުގައި ޝާމިލުވި މީހުން ހޯދީ އެމްޕީއެލްގެ އިންޓަރނަލް އޮޑިޓަކުންކަމަށާއި، އެ މައްސަލަ މިހާރު އޭސީސީއާއި ފުލުހުންނަށް ހުށައަޅައިގެން ތަހުގީގް ކުރިއަށްދާކަމަށް ޝާހިދު ވިދާޅުވިއެވެ.
"ތެލުގެ ފްރޯޑް ނުވަތަ ކޮރަޕްޝާންގެ ކަންތަކާއި ގުޅިގެން ދެކަމެއް އަޅުގަނޑުމެން ކުރިން. އެއް ކަމަކީ އަޅުގަނޑުމެން ހިންގީ އިންޓާނަލް އިންވެސްޓިގޭޝަނެއް. އޭގެ އިތުރަށް، އެންޓި ކޮރަޕްޝަން އަދި މޯލްޑިވްސް ޕޮލިސް ސާރވިސްއަށް ހުށައަޅައިގެން ތަހުޤީޤު ކުރިއަށް މިހާރުވެސް އެބަދޭ. ޚާއްސަކޮށް މޯލްޑިވްސް ޕޮލިސް ސާރވިސްއިން ކުރިއަށް ގެންދާ އިންވެސްޓީގޭޝަން މިހާރުވެސް ދަނީ ކުރިއަށް. ދެން އަޅުގަނޑަށް ހީވަނީ މާގިނަ ދުވަސްތަކެއް ނުވެ، އިންވެސްޓީގޭޝަން ނިންމާ، މައްސަލަ ކޯޓާއި ހަމައަށްވެސް ފޮނުވޭނެ ކަމަށް އަޅުގަނޑުމެން މިލަފާ ކުރަނީ." އެމްޕީއެލްގެ ސީއީއޯ ޝާހިދު ވިދާޅުވިއެވެ.
މި ޖަރިމާ ހިންގީ އެމްޕިއެލްގެ މުވައްޒަފުންތަކަކާއި އެފްއެސްއެމްގެ މުވައްޒަފުންތަކެއް ގުޅިގެންކަން ފާހަގަކުރައްވާ ޝާހިދު ވިދާޅުވީ، އެކަން އެމީހުން ކުރީ ތެޔޮ ޑެލިވަރީކޮށްދޭންޖެހޭ ޢަދަދަށް ތެޔޮ ޑެލިވަރީނުކޮށް، ބާކީބައި އެ މުވައްޒަފުން ގެންގޮސް އޭގެ ވިޔަފާރިކޮށްގެންކަމަށެވެ.
"ތެލުގެ ޑެލިވާ ކުރުމުގެ މަސައްކަތް ނާޖާއިޒު ގޮތުގައި ބޭނުންކުރެވެނީ ފިއުލް ސަޕްލައިން މިގަންނަ ތެޔޮ، ފިއުލް ސަޕްލައިން ޑެލިވާރކޮށްދެނީ އެމްޕީއެލަށް. އެހެންނަމަވެސް، ޑެލިވާ ކޮށްދެންވާ އަދަދަށް ޑެލިވާ ނުކޮށް ދެން ބާކި ހުންނަ ބައި ފިއުލް ސަޕްލައިގެ މުވައްޒަފުން ގެންގޮއްްސަ ބޭރަށް ވިއްކާ. އެމީހުން އެ ހަދާ ގޮތެއް ހަދާފަ ތެޔޮ މަދުން އެމްޕީއެލްއަށް މިލިބެނީ. ދެން އަޅުގަނޑުމެންނަށް ފާހަގަކުރެވުނީ ތެޔޮ ސަޕްލައިކުރުމުގައި މައްސަލަތަކެއް އުޅޭކަމަށް. އަލުގަނޑުމެންނަށް އެކަން ފާހަގަކުރެވުނީ ކޯވިޑް ތެރޭގައި. އެމްޕީއެލުން އަޅުގަނޑުމެންނަށް ފާހަގަ ކުރެވޭ މުވައްޒަފުންނަށް މިހާރު ވާނީ ފިޔަވަޅު އަޅާފަ." ޝާހިދު ވިދާޅުވިއެވެ.
ޝާހިދު ވިދާޅުވީ އެފަދަ ކަމެއް ތަކުރާރުވިޔަ ނުދިނުމަށް ކުރަންޖެހޭ ހުރިހާކަމެއް މިހާރު ކޮށްފައިވާކަމަށެވެ. އެގޮތުން ޕާޗޭސް އޯޑަރު އިޝޫ ކުރުމުގައި ބަދަލުތަކެއް ގެނެސްފައިވާ ކަމަށާއި، ޕާޗޭސް އޯޑަރު ރިޕީޓްކޮށް، މުދާ ޑެލިވަރީ ނުކުރެވޭނެ ގޮތަށް ހަދާފައިވާކަމަށްވެސް ޝާހިދު ވިދާޅުވިއެވެ.
ޝާހިދު ވަނީ މި މައްސަލާގައި އޮޑިޓަރ ޖެނެރަލްގެ ފަރާތުންވެސް އޮޑިޓެއް ކުރިއަށް ގެންދާކަމަށް ވިދާޅުވެ އެ އޮޑިޓްވެސް ވަރަށް އަވަހަށް ނިމޭނެކަމަށް ވިދާޅުވެފައެވެ.
އެމްޕީއެލްގެ ތެލުގެ ފްރޯޑާއި ގުޅިގެން 2020 ވަނަ އަހަރު 4 މުވައްޒަފަކު ސަސްޕެންޑްކުރިއެވެ.