ސަރުކާރުން ގާއިމްކުރާ ރީޖަނަލް ހަބްތަކާއެކު ރާއްޖޭގެ އިގްތިސާދު ދެގުނަ ވެގެންދާނެ: އެމް.ޔޫ މަނިކު

ސަރުކާރުން ރާއްޖޭގެ އުތުރާއި ދެކުނުގައި ގާއިމްކުރާ ރީޖަނަލް ހަބާއެކު ރާއްޖޭގެ އިގުތިސާދު ދެގުނަވެގެންދާނެކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ، މަޓީގެ ޗެއަރމަން އަދި ރާއްޖެއަށް ފަތުރުވެރިކަން ތަޢާރަފްކުރުމުގައި އިސް ދައުރެއް އަދާކުރެއްވި މުހައްމަދު އުމަރު މަނިކު (އެމްޔޫ މަނިކު) ވިދާޅުވެއްޖެއެވެ.

މުހައްމަދު އުމަރު މަނިކު ( އެމްޔޫ މަނިކު) މިހެން ވިދާޅުވީ ފަތުރުވެރިކަމަށް 50 އަހަރުފުރުން ފާހަގަކުރުމަށް ބޭއްވި ގާލާ އިވްނިންގައި ވާހަކަދައްކަވަމުންނެވެ.

ފަތުރުވެރިކަމުގެ ދާއިރާއަށް އަންނަމުންދާ ކުރިއެރުންތަކާއި ގުޅޭގޮތުން ވާހަކަދައްކަވަމުން މުހައްމަދު އުމަރު މަނިކު ވިދާޅުވީ ފަތުރުވެރިކަމުގައި ރާއްޖެއަކީ މިހާރު އެހެން ޤައުމުތަކުން މިސާލެއްގެ ގޮތުގައި ބަލާ ޤައުމެއްކަމަށެވެ. އަދި މިއީ ރާއްޖެ ފަދަ ކުޑަ ޤައުމަކުން ހާސިލްކޮށްފައިވާ ބޮޑު ކާމިޔާބީއެއްގެ މުހައްމަދު އުމަރު މަނިކު ފާހަގަކުރެއްވިއެވެ.

ރާއްޖޭގައި ކުރިއަށްދާ ފަތުރުވެރިކަމާއި ގުޅުންހުރި މަޝްރޫޢުތަކާއި ގުޅޭގޮތުން ވާހަކަދައްކަވަމުން އުމަރު މަނިކް ވިދާޅުވީ ވެލާނާ އެއަރޕޯޓު ތަރައްޤީ މަޝްރޫޢު ނިމުމާއެކު ފަތުރުވެރިކަމުގެ ކެޕޭސިޓީ އެތައް ގުނައަކަށް އިތުރުވެގެންދާނެ ކަމަށެވެ.
އަދި ރާއްޖޭގެ އުތުރާއި ދެކުނުގެ އެއަަރޕޯޓުތައް އިތުރަށް ތަރައްޤީކުރުމަށް ކުރަމުންދާ މަސައްކަތްތަކާއެކު، ފަތުުރުވެރިކަމުގެ ރަން ދުވަސްތައް އަންނާނެ ކަމަށާއި، ރާއްޖޭގެ އިގްތިސާދަށްވެސް ބޮޑު ކުރިއެރުމެއް އަންނާނެކަމަށް މުހައްމަދު އުމަރު މަނިކް ވިދާޅުވިއެވެ.

"ނޯތުގެ ރީޖަން 8000 ބެޑު އާއި އެކު މުޅިތަން ދިރޭނެ، ރަން ދުވަސްވަރު އަންނަނީ އަދި ކިރިޔާ، ރާއްޖޭގެ އިކޮނޮމީދާނެ ޑަބަލް ވެގެން، ރައީސްއަށް ޝުކުރު ދަންނަވަން މިފަދަ މަޝްރޫޢެއް ކުރިއަށްގެންދަވާތީ" އުމަރު މަނިކު ވިދާޅުވިއެވެ.

ފަތުރުވެރިކަމުގެ ދާއިރާގައި ޒުވާނުންނަށް ހުރި ފުރުސަތުތަކާއި ގުޅޭގޮތުން ވާހަކަދައްކަވަމުން އުމަރު މަނިކް ވިދާޅުވީ މި ދާއިރާތަކަށް ތަމްރީން ލިބިފައިވާ މީހުން ބިނާކުރުމުގެ މަސައްކަތް ކުރަން ޖެހިފައިވާ ކަމަށެވެ. އަދި މިއީ ސަރުކާރުން އެކަނި ކުރެވޭނެކަމެއް ނޫންކަމަށާއި، ރިސޯޓްތަކުގެ ވެރިންވެސް އެކަމަށް އިސްކަންދެއްވަންޖެހޭކަމަށް އުމަރު މަނިކް ވިދާޅުވިއެވެ.

"ރިސޯޓުތަކުގެ އޯނަރުން އެބަ ޖެހޭ މީހުން ޓްރެއިން ކުރަން، އަޅުގަނޑުމެންގެ ވާޖިބެއް އެއީ، ސަރުކާރުން އެކަންޏެއް އެކަން ނުކުރެވޭނެ، ވަރަށް ބޮޑަށް ޖެހޭ ޓްރެއިން ކުރަން، މިހާރުވެސް އެބަކުރޭ މިކަންތައް، މިއަށްވުރެ ބޮޑަށް އެބަޖެހޭ އެކަން ކުރަން،" އުމަރު މަނިކް ވިދާޅުވިއެވެ.

މުހައްމަދު އުމަރު މަނިކް ވިދާޅުވީ ފަތުރުވެރިކަމުގެ ދާއިރާއަކީ ރާއްޖޭގެ އިޤްތިސާދަށް މުޙިއްމު ދާއިރާއަކަށްވުމުން ކިޔަވާ ކުދިންނަށް މި ދާއިރާއަށް ޝައުގުވެރިކަން އުފެއްދުމަށް މަސައްކަތްތައް ކުރަންޖެހޭކަމަށެވެ. އެގޮތުން ސްކޫލް ދައުރުގައި މި ދާއިރާއާ ގުޅޭ ފުރިހަމަ މައުލޫމާތުތައް ދަރިވަރުންނަށް ދޭން ޖެހޭ ކަމަށް އުމަރު މަނިކް ފާހަގަކުރެއްވިއެވެ.