ބައިނަލްއަޤްވާމީ ފަތުރުވެރިކަމުގެ ސިނާއަތުގައި ދެވޭ އެންމެ ޝަރަފުވެރި އެވޯޑް ކަމުގައިވާ ވޯލްޑް ޓްރެވަލް އެވޯޑްސްގެ އިންޑިއަން އޯޝަން ކެޓަގަރީން ދިވެހިރާއްޖެއަށް މިފަހަރުވެސް ޝަރަފުވެރި އެވޯޑްތަކެއް ލިބިއްޖެއެވެ.
މިއަހަރުގެ ވޯލްޑް ޓްރެވަލް އެވޯޑްސްގެ އިންޑިއަން އޯޝަން ކެޓަގަރީގެ އެވޯޑުތައް ހާސިލްކޮށްފައިވާ ފަރާތްތައް އިއުލާންކޮށްފައިވަނީ ކެންޔާގެ ނައިރޯބީގައި ބޭއްވި ހަފްލާއެއްގައެވެ.
1993 ވަނަ އަހަރު ދޭން ފެށި، ވޯލްޑް ޓްރެވަލް އެވޯޑަކީ ދުނިޔޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ އަގު ވަޒަންކުރުމުގައި ފާހަގަކޮށްލެވޭ މުހިންމު އެވޯޑެކެވެ.
މިއަހަރު ވޯލްޑް ޓްރެވަލް އެވޯޑްސްގެ އިންޑިއަން އޯޝަން ކެޓަގަރީން ރާއްޖެއިން ކާމިޔާބުކޮށްފައިވަނީ:
* އިންޑިއަން އޯޝަންގެ ލީޑިން ޑެސްޓިނޭޝަން އެވޯޑު
* އިންޑިއަން އޯޝަންގެ ލީޑިންގް ބީޗް ޑެސްޓިނޭޝަން އެވޯޑު
* އިންޑިއަން އޯޝަންގެ ލީޑިންގް ޑައިވް ޑެސްޓިނޭޝަން އެވޯޑު
އިންޑިއަން އޯޝަންގެ ލީޑިން ޓުއަރިސްޓް ބޯޑު 2022ގެ އެވޯޑު، މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން ވަނީ ކާމިޔާބުކޮށްފައެވެ. އަދި އިންޑިއަން އޯޝަން ލީޑިންގ އެއަރޕޯޓުގެ އެވޯޑު ހޯދާފައިވަނީ ވެލާނާ އިންޓަރނޭޝަނަލް އެއަރޕޯޓުންނެވެ. މީގެއިތުރުން އެކި ކެޓަގަރީތަކުން ރާއްޖޭގެ ރިސޯޓުތަކުން ވަނީ އެވޯޑްތައް ހޯދާފައެވެ. އެގޮތުން އިންޑިއަން އޯޝަން ލީޑިންގ ބުޓީކް ހޮޓެލް، ލީޑިންގ ޑައިވް ރިސޯޓު، ލީޑިންގ ފެލިމީ ރިސޯޓު، ލީޑިންގ ހަނީމޫން ރިސޯޓު، ލީޑިންގ ޕްރައިވެޓް އައިލެންޑު ފަދަ އެވޯޑުތައް ރާއްޖޭގެ ރިސޯޓުތަކަށް ވަނީ ލިބިފައެވެ.
ފަތުރުވެރިކަމުގެ ދާއިރާއިން މުޅި ދުނިޔޭގެ އެންމެ ޝަރަފްވެރި އެވޯޑްގެ ގޮތުގައި ބެލެވޭ ވޯލްޑް ޓްރެވަލް އެވޯޑްގެ، "ވޯލްޑް ލީޑިންގ ޑެސްޓިނޭޝަން" އެވޯޑު ފާއިތުވީ 2 އަހަރު ރާއްޖެއިން ވަނީ ހޯދާފައެވެ. މިއަހަރުގެ ވޯޑްލް ލީޑިންގ ޑެސްޓިނޭޝަންގެ އެވޯޑަށްވެސް ރާއްޖެވަނީ ނޮމިނޭޓްވެފައެވެ. މި އެވޯޑު ހަފްލާ ބޭއްވުމަށް ހަމަޖެހިފައިވަނީ އަންނަ މަހުގެ 11 ވަނަ ދުވަހު އޮމާންގެ މަސްކަޓްގައެވެ.