ފަތުރުވެރިކަމުގެ ދާއިރާއިން ނަގާ ޓީޖީއެސްޓީ އާއި ގްރީން ޓެކްސްއާއި ޖޫރިމަނާގެ ގޮތުގައި ދައުލަތަށް ލިބެންޖެހޭ ބިލިއަނެއްހާ ރުފިޔާ ނުލިބި އެބައޮތްކަމަށް ފިނޭންސް މިނިސްޓްރީން ހާމަކުރައްވައިފިއެވެ.
ފިނޭންސް މިނިސްޓްރީން މިކަން ހާމަކޮށްފައިވަނީ ދައުލަތަށް ޓީޖީއެސްޓީއާއި ގްރީން ޓެކްސްގެ ގޮތުގައި ލިބެންޖެހޭ ފައިސާގެ ތެރެއިން ނުލިބި ހުރި ފައިސާގެ ތަފްސީލު ހޯދުމަށް މަޖިލީހުގެ މެމްބަރު ކުރެއްވި ސުވާލަކަށް ލިޔުމުން ފޮނުއްވި ޖަވާބުގައެވެ.
މާފަންނު މެދު ދާއިރާގެ މެމްބަރު އިބްރާހިމް ރަޝީދު ފިނޭންސް މިނިސްޓަރަށް ފޮނުއްވި ސުވާލުގައި އޮތީ ދައުލަތުން ޖީއެސްޓީ، ޓީޖީއެސްޓީ އަދި ގްރީން ޓެކްސް ނަގަން ފެށިފަހުން ދައުލަތަށް ނުދައްކާ އޮތް ޓެކްސްތަކުގެ ތަފްސީލު ހޯދުމަށެވެ.
މެމްބަރުގެ ސުވާލާއި ގުޅިގެން ފިނޭންސް މިނިސްޓަރު ލިޔުމުން މަޖިލީހަށް ފޮނުއްވި ޖަވާބުގައި ވިދާޅުވީ ޓީޖީއެސްޓީގެ ގޮތުގައި ދައުލަތަށް ލިބެންޖެހޭ ފައިސާގެ ތެރެއިން 31 އޮގަސްޓްގެ ނިޔަލަށް 632 މިލިއަނަށްވުރެ ގިނަ ރުފިޔާ ނުލިބި އޮތްއިރު، އެފައިސާގެ ޖޫރިމަނާއަށް 240 މިލިއަން ރުފިޔާ އަރާކަމަށެވެ. އަދި ޖޫރިމަނާއާއެކު ޓީޖީއެސްޓީގެ ގޮތުގައި ނުލިބި ހުރި ފައިސާގެ އަދަދު 872 މިލިއަނަށްވުރެ އިތުރުކަމަށް ފިނޭންސް މިނިސްޓްރީން ވިދާޅުވެއެވެ.
ގްރީން ޓެކްސްއަށް ބަލާއިރު، 31 އޮގަސްޓްގެ ނިޔަލަށް 85 މިލިއަނަށްވުރެ ގިނަ ރުފިޔާ ނުލިބި އޮތްއިރު، އެފައިސާގެ ޖޫރިމަނާއަށް 42 މިލިއަން ރުފިޔާ އަރައެވެ. އަދި ޖޫރިމަނާއާއެކު ގްރީން ޓެކްސްގެ ގޮތުގައި ނުލިބި ހުރި ފައިސާގެ އަދަދު 128 މިލިއަން ރުފިޔާއަށްވުރެ އިތުރުކަމަށް ފިނޭންސް މިނިސްޓްރީން ވިދާޅުވެއެވެ.
ފިނޭންސް ޓީޖީއެސްޓީ އާއި ގްރީން ޓެކްސްއާއި ޖޫރިމަނާގެ ގޮތުގައި ދައުލަތަށް ލިބެންޖެހޭ ފައިސާގެ ތަފްސީލްގެ އިތުރުން ފިނޭންސް މިނިސްޓްރީން މިދިޔަ މުއްދަތުގައި ޓެކްސްއިން ލިބިފައިވާ އާމްދަނީގެ ތަފްސީލްތައްވެސް ވަނީ މަޖިލީހާއި ހިއްސާ ކުރައްވާފައެވެ.
ފަތުރުވެރިކަމުގެ ދާއިރާއިން ނަގާ ޓީޖީއެސްޓީ އާއި ގްރީން ޓެކްސްއާއި ޖޫރިމަނާގެ ގޮތުގައި ދައުލަތަށް ލިބެންޖެހޭ ގިނަ އަދަދެއްގެ ފައިސާ ހުރިއިރު، މީރާއިން ދަނީ ދައުލަތަށް ނުލިބި ހުރި ފައިސާ ހޯދުމަށް ގިނަ މަސައްކަތްތަކެއްވެސް ކުރަމުންނެވެ. އެގޮތުން މީރާއިން ދަނީ ޓެކްސް ނުދައްކާ ފަރާތްތަކުގެ މައުލޫމާތު އާއްމުކޮށް، އެފަދަ ބައެއް މައްސަލަތައް ކޯޓަށްވެސް ހުށަހަޅަމުންނެވެ.