ފިނި މޫސުމާއި ދިމާކޮށް މިއަހަރުވެސް އަޒުރު އެއަރގެ ދަތުރުތައް ރާއްޖެއަށް ފަށައިފިއެވެ.
ރަޝިއާގެ އެއަރލައިނެއްކަމަށްވާ އަޒުރު އެއަރގެ ދަތުރުތައް ރާއްޖެއަށް ކުރާނީ ރަޝިއާގެ މޮސްކޯއިން ވެލާނާ އިންޓަނޭޝަނަލް އެއަރޕޯޓަށެވެ. މިއަހަރުގެ ފިނި މޫސުމާއި ދިމާކޮށް އަޒުރު އެއަރލައިން ރާއްޖެއަށް މިފެށި ދަތުރުތައް ފަށާފައިވަނީ މިމަހުގެ 28 ވަނަ ދުވަހުއެވެ.
އެމްއޭސީއެލްއިން ބުނީ ހަފްތާގެ 7 ދުވަހު އެ އެއަރލައިންގެ ދަތުރުތައް ރާއްޖެއަށް ބާއްވާނެކަމަށެވެ. މި ދަތުރުތަކުގައި އެ އެއަރލައިނުން ބޭނުންކުރާނީ ބޮއިންގ 767 މަރުކާގެ ބޯޓެވެ. މިއީ 336 މީހުންގެ ޖާގައިގެ ބޯޓެކެވެ.
ކޮންމެ އަހަރެއްގެ ފިނި މޫސުމާއި ދިމާކޮށް އަޒުރު އެއަރއިން އަންނަނީ ރާއްޖެއަށް ދަތުރުތައް ކުރަމުންނެވެ. ސަބަބަކީ މިއީ ފަތުރުވެރިންގެ މެދުގައި ރާއްޖޭގެ މަޤްބޫލުކަން ބޮޑު ދުވަސްވަރަކަށް ވާތީއެވެ.
ރަޝިއާއަކީ މިހާރު ރާއްޖެއަށް ގިނަ އަދަދަކަށް ފަތުރުވެރިން ޒިޔާރަތްކުރާ ޤައުމެކެވެ. ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ ސެޕްޓެމްބަރުމަހުގެ ނިޔަލަށް ރަޝިއާ ހިމެނެނީ ރާއްޖެއަށް 2 ވަނައަށް އެންމެ ގިނަ ފަތުރުވެރިން ޒިޔާރަތްކުރި ޤައުމުގެ ގޮތުގައެވެ. އެއީ މުޅި ޖުމްލަ 128،687 ފަތުރުވެރިންނާއިއެކުގައެވެ.
ކޮންމެ އަހަރެއްގެވެސް ފަހުކޮޅަކީ ރާއްޖެއަށް ގިނަ އަދަދެއްގެ އެއަރލައިންތަކަކުން ދަތުރު ފަށާ ދުވަސްވަރެކެވެ. އަދި މި ދުވަސްވަރު ރާއްޖެއަށް ގިނަ އަދަދެއްގެ ފްރައިވެޓް ޖެޓްވެސް އާދެއެވެ. ޓޫރިޒަމް މިނިސްޓްރީން މިއަހަރު އަމާޒުހިފާފައި ވަނީ ރާއްޖެއަށް 1.6 މިލިއަން ފަތުރުވެރިން ގެނައުމަށެވެ. މިހާތަނަށް ރާއްޖެއަށް 1،312،993 ފަތުރުވެރިން ވަނީ ޒިޔާރަތްކޮށްފައެވެ.