ނިމުނު 3 ވަނަ ކުއާޓަރުގައި އެމްޓީސީސީން 8 މަޝްރޫޢެއް ނިންމައި، 11 މަޝްރޫޢެއް ފަށާފައިވާކަމަށް އެ ކުންފުނިން ހާމަކޮށްފިއެވެ.
އެމްޓީސީސީން އާއްމުކޮށްފައިވާ މައުލޫމާތުތައް ދައްކާގޮތުން ނިމުނު 3 ވަނަ ކުއާޓަރުގައި އެމްޓީސީސީން ވަނީ 112 މަޝްރޫޢެއްގެ މަސައްކަތް ކުރިއަށް ގެންގޮސްފައެވެ.
އެމްޓީސީސީން ޢާއްމުކޮށްފައިވާ މި އަހަރުގެ ތިންވަނަ ކުއާޓަރގެ މާލީ ރިޕޯޓުގައިވާގޮތުން މި 112 މަޝްރޫޢުގެ ތެރޭގައި ބަނދަރު ހެދުމުގެ 43 މަޝްރޫޢަކާއި، ބިން ހިއްކުމުގެ 12 މަޝްރޫޢަކާއި، ގޮނޑުދޮށް ހިމާޔަތްކުރުމުގެ 26 މަޝްރޫޢަކާއި އެއަރޕޯޓް ތަރައްޤީކުރުމުގެ 3 މަޝްރޫއެއް ހިމެނެއެވެ.
އެމްޓީސީސީން ވަނީ 8 މަޝްރޫޢެއްގެ މަސައްކަތް މިއަަހަރުގެ 3 ވަނަ ކުއަރޓަރގެ ތެރޭގައި ކާމިޔާބުކަމާއެކު ނިންމާލާފައެވެ. އެމަޝްރޫޢުތަކުގެ ތެރޭގައި ކ. ހިންމަފުށީ ހާބަރުގެ ފޭސް 2ގެ މަސައްކަތާއި، ސ. މީދޫ އަދި ރ. ރަސްމާދޫ ގޮނޑުދޮށް ހިމާޔަތްކުރުމުގެ މަަސައްކަތާއި، ކުޅުދުއްފުށީ ރީޖަނަލް ހޮސްޕިޓަލް މަރާމާތުކުރުމާއި، އައިސީޔޫ އިމާރާތްކުރުމުގެ މަސައްކަތް ހިމެނެއެވެ.
މިއަހަރުގެ 3 ވަނަ ކުއާޓަރގެ ތެރޭގައި އެމްޓީސީސީން ވަނީ އައު 11 މަޝްރޫޢެއްގެ މަސައްކަތް ފަށާފައެވެ. އަދި އައު 8 މަޝްރޫއެއް ވަނީ އެމްޓީސީސީއާ ޙަވާލުކޮށްފައެވެ.
މާލީގޮތުން އެމްޓީސީސީއަށް މިއަހަރުގެ 3 ވަނަ ކުއާޓަރއަކީ ކާމިޔާބު ކުއާޓަރއެކެވެ. އެ ކުއާޓަރުގައި އެމްޓީސީސީއަށް 593 މިލިއަން ރުފިޔާގެ އާމްދަނީއެއް ވަނީ ލިބިފައެވެ. ޓެކުހަށް ކެނޑުމުގެ ކުރިން ފައިދާގެ ގޮތުގައި، 47.7 މިލިއަން ރުފިޔާ ލިބިފައިވެއެވެ.
3 ވަނަ ކުއާޓަރުގެ މާލީ ހިސާބުތަކާއެކު، އަހަރުގެ ފުރަތަމަ 9 މަސްދުވަހުގެ ހިސާބުތައް ހާމަވެގެންގޮސްފައިވާއިރު، ފުރަތަމަ 9 މަސް ދުވަހުގެތެރޭ އެމްޓީސީސީއަށް ވަނީ އާމްދަނީގެ ގޮތުގައި 1.74 ބިލިއަން ރުފިޔާ ލިބިފައެވެ. އަދި ޓެކްސްއަށް ކެނޑުމުގެ ކުރިން ފައިދާގެ ގޮތުގައި 200 މިލިއަން ރުފިޔާ ވަނީ ލިބިފައެވެ.