އޮޅުވެލި ފަޅުތެރޭގައި ތަރައްޤީކޮށްފައިވާ ޓީޔޫއައި ބުލޫ އޮޅުވެލި ރޮމޭންސް ރިސޯޓު ހުޅުވައިފިއެވެ.
ކ. އަތޮޅުގައި އޮންނަ އޮޅުވެލި ރިސޯޓުގެ ފަޅުތެރެއިން ހިއްކި ވަކި ރަށެއްގައި ތަރައްޤީކޮށްފައިވާ މި ރިސޯޓު ހިންގާނީ ދުނިޔޭގެ މަޝްޙޫރު ޓްރެވަލް ކުންފުނީގެ ޓީޔޫއައިގެ ޓީޔޫއައި ބްލޫ ބްރޭންޑުގެ ފަރާތުންނެވެ. ޓީޔޫއައި ގުރޫޕަކީ ފަތުރުވެރިކަމުގެ ޚިދުމަތް ފޯރުކޮށްދޭ ޖަރުމަންވިލާތުގެ މަލްޓި ނޭޝަނަލް ކުންފުންޏެކެވެ.
16 އަހަރުން މަތީގެ ފަތުރުވެރިންނަށް ހާއްސަކޮށްގެން ތަރައްޤީކޮށްފައިވާ މި ރިސޯޓުގައި ތަފާތު 3 ކެޓަގަރީއެއްގެ 98 ވިލާ ހުރެއެވެ. އެއީ ބީޗު، ވޯޓާ ވިލާ އަދި ޕްރައިވެޓް ޕޫލް ވިލާއެވެ.
މި ރިސޯޓުން ތަފާތު އެކި ކަހަލަ ކެއުންތައް ލިބޭ ރެސްޓޯރެންޓުތައް ހުރެއެވެ. މޫދު ކުޅިވަރުގެ ފުރުސަތާއި، ސްޕާއެއްގެ ޙިދުމަތްވެސް މި ރިސޯޓުން ލިބެން ހުންނާނެކަމަށް ޓީޔޫއައި ގުރޫޕުން ބުނެއެވެ.
ޓީޔޫއައި ގުރޫޕުން ހާމަކުރާގޮތުގައި އެކުންފުނީގެ ވިސްނުން ހުރީ ޓީޔޫއައި ބްރޭންޑުގެ އިތުރު ރިސޯޓުތައް ދުނިޔޭގެ އެކި ހިސާބުތަކުގައި ހުޅުވުމަށެވެ. ރާއްޖޭގައި ހުޅުވާފައިވާ ރިސޯޓާއި އެކު އެކުންފުނިން އޭޝިއާ ސަރަޙައްދުގައި ހިންގާ ރިސޯޓުތަކުގެ އަދަދުވަނީ 4 އަކަށް އަރާފައެވެ.