ސަބްސިޑީގެ ގޮތުގައި ފަގީރު ގޭބިސީތަކަށް ދިނުމަށް 169 މިލިއަން ރުފިޔާ އަންނަ އަހަރުގެ ބަޖެޓުގައި ހިމަނައިފިއެވެ.
ދައުލަތުން އަންނަ އަހަރަށް ހުށަހަޅާފައިވާ ބަޖެޓުގައި ވަނީ ދެމެހެއްޓެނިވި ގޮތެއްގައި ސަބްސިޑީގެ ޚަރަދު ރާވައި، ސަރުކާރުން ރައްޔިތުންނަށް ދޭ ސަބްސިޑީ، މިހާރަށްވުރެ އިތުރަށް ހަރުދަނާ އަދި އަމާޒުކޮށްގެން ދެވޭ ސަބްސިޑީއަކަށް ބަދަލުކުރުމަށް ހިމަނާފައެެވެ.
ސަބްސިޑީއާ ގުޅޭ ސިޔާސަތުތައް ބަދަލުކުރުމުގެ މަޝްވަރާ ވަޒީރުންގެ މަޖިލީހުގައި ދަނީ ކުރެވެމުންނެވެ. އަދި އަންނަ އަހަރަށް ހުށަހަޅާ ބަޖެޓު އެކުލަވާލާފައިވަނީ ސަބްސިޑީ އާ ގުޅޭ ސިޔާސަތު ބަދަލުވާނެކަމަށް ލަފާކޮށްފައެވެ. އެހެންނަމަވެސް، ދުނިޔޭގެ ބާޒާރުގައި ތެލުގެ އަގުތައް މިހާރު ހުރި މިންވަރުން، ސަބްސިޑީއާ ގުޅޭ ސިޔާސަތުތަކަށް މިގެންނަ ބަދަލުތަކާއެކުވެސް 588 މިލިއަން ރުފިޔާއާއި 788 މިލިއަން ރުފިޔާއާ ދެމެދުގެ މިންވަރެއް ކަރަންޓުގެ ސަބްސިޑީގެ ގޮތުގައި ޚަރަދުވާނެކަމަށް ފިނޭންސް މިނިސްޓްރީން ލަފާކުރެއެވެ. އަދި އަންނަ އަހަރުގެ ބަޖެޓުގައި ޓާގެޓަޑު ސަބްސިޑީގެ ގޮތުގައި ފަގީރު ގޭބިސީތަކަށް ދިނުމަށް 169 މިލިއަން ރުފިޔާ ވަނީ ހިމަނައިފައެވެ.
މި އަހަރު ނިމޭއިރު، ކަރަންޓަށް ދޭ މުޅި ސަބްސިޑީއަށް ޖުމުލަ 3272 މިލިއަން ރުފިޔާ ޚަރަދުވާނެކަމަށް ފިނޭންސް މިނިސްޓްރީން ލަފާކުރެއެވެ. މިއީ މަހެއްގެ މައްޗަށް ރާއްޖޭގައި ދިރިއުޅޭ މީހެއްގެ ބޮލަކަށް 603 ރުފިޔާއެވެ. އަދި ގޭބިސީއަކަށް ބަލާނަމަ އެވަރެޖް ގޭބިސީއަކަށް މަހެއްގެ މައްޗަށް 3314 ރުފިޔާއެވެ. އެގޮތުން ކަރަންޓުގެ ހިދުމަތަށް ކުރާ ޚަރަދަކީ ގޭބިސީގެ ޖުމުލަ ޚަރަދުގެ ނިސްބަތުން 4.7 އިންސައްތައެވެ.
ކަރަންޓު ސަބްސިޑީއަކީ އަހަރުން އަހަރަށް އިތުރުވަމުން އަންނަ، އަދި ސަބްސިޑީގެ ސަބަބުން ވަރަށް ބޮޑު ފިސްކަލް ހިރާސްތަކެއް ކުރިމަތިވާ ސަބްސިޑީއެކެވެ. އެހެންކަމުން ފިސްކަލް ސިޔާސަތު އިތުރަށް ހަރުދަނާކުރުމަށް މިހާރު ކުރެވެމުންދާ މަސައްކަތްތަކުގެ ތެރެއިން ސަރުކާރުގެ ތަސައްވުރަކީ ދެމެހެއްޓެނިވި ގޮތެއްގައި ސަބްސިޑީގެ ޚަރަދު ރާވައި، ސަރުކާރުން ރައްޔިތުންނަށް ދޭ ސަބްސިޑީ، މިހާރަށްވުރެ އިތުރަށް ހަރުދަނާ، އަދި ޓާގެޓުކޮށްގެން ދެވޭ ސަބްސިޑީއަކަށް ބަދަލުކުރުމުވެ. މިއާއެކު ސަބްސިޑީގެ ފައިދާ ލިބިގެންދާނީ މުއްސަނދި ގޭބިސީތަކުގެ ބަދަލުގައި ސަބްސިޑީއަށް އެންމެ ބޭނުންވާ ގޭބިސީތަކަށެވެ.
ކަރަންޓު ސަބްސިޑީދިނުމަށް ސަރުކާރުން މިހާރު އެކުލަވައިލައިފައިވާ އުސޫލަކީ ހުރިހާ ޑޮމެސްޓިކް ކަސްޓަމަރުންނަށް އެއް ހަމައެއްގައި ސަބްސިޑީ ލިބޭ އުސޫލެއްކަމުގައިވުމާއެކު މުއްސަނދި ގޭބިސީތަކާއި ފަގީރު ގޭބިސީތަކަށް ސަބްސިޑީ ލިބެނީ އެއްހަމައެއްގައެވެ. އަދި 2019 ވަނަ އަހަރު އަތޮޅުތަކާއި މާލެއަށް އެއް އަގެއްގައި ކަރަންޓު ފޯރުކޮށްދިނުމަށް ނިންމުމާއެކު، އަތޮޅުތެރޭގެ ކަރަންޓު ޓެރިފް ރޭޓު މާލެއާއި އެއްވަރަކަށް ދަށްކުރުމުން އަތޮޅުތެރޭގެ ހުރިހާ ގޭބިސީއަކަށް ކަރަންޓު ސަބްސިޑީ ލިބެއެވެ. މިއީ މާލެއާއި އަތޮޅުތަކުގެ ގޭބިސީތަކަށް ލިބޭ ފިއުލް ސަބްސިޑީގެ އިތުރަށް ލިބޭ ސަބްސިޑީއެކެވެ.
ސަރުކާރުންދޭ ކަރަންޓު ސަބްސިޑީ ނުދޭނަމަ، ގޭބިސީތަކުން ކަރަންޓަށް ކުރާ ހޭދަ، މިހާރު ހޭދަކުރާ މިންވަރާ އަޅައިބަލާއިރު ވަރަށް ބޮޑުތަނުން އިތުރުވެގެންދާނެވެ. އަދި މިއަހަރުގެ ތެރޭގައި ތެލުގެ އަގު އެތައް ގުނައަކުން އިތުރުވެފައިވާތީ ފިއުލް ސަބްސިޑީ ނުދޭނަމަ، ފިއުލް ސަރޗާޖްގެ ގޮތުގައި ކޮންމެ މަހަކު ވަރަށް ބޮޑު މިންވަރެއް ބިލަށް އިތުރުވެގެންދާނެއެވެ.
ކަަރަންޓުގެ ހިދުމަތަކީ ގާނޫނު އަސާސީން ދިވެހި ރައްޔިތުންނަށް ކަށަވަރުކޮށްދޭ އަސާސީ ހައްގެކެވެ. އެގޮތުން ރާއްޖޭގެ ހުރިހާ ރަށެއްގައި ދިރިއުޅޭ ރައްޔިތުންނަށް ކަރަންޓު ފޯރުކޮށްދިނުމަކީ 2009 ވަނަ އަހަރުން ފެށިގެން ސަރުކާރު ހިއްސާވާ ކުންފުނިތަކުން ދެމުންދާ ހިދުމަތެކެވެ. އަދި ކަރަންޓުގެ ހިދުމަތް ހެޔޮއަގުގައި ލިބުމާއި ރާއްޖޭގެ ހުރިހާ ރަށެއްގައި ދިރިއުޅޭ ރައްޔިތުންނަށް އެއް އަގެއްގައި ކަރަންޓުގެ ހިދުމަތް ލިބުމަކީ ސަރުކާރުގެ ސިޔާސަތެކެވެ. ކަރަންޓު ސަބްސިޑީގެ ގޮތުގައި ހިމެނެނީ މާލެއާއި އެއް އަގެއްގައި އަތޮޅުތަކަށް ކަރަންޓު ފޯރުކޮށްދިނުމަށްޓަކައި ދޭ ސަބްސިޑީއާއި ކަރަންޓު އުފައްދާ ކުންފުނިތަކަށް ވަކި އަގެއްގައި ތެޔޮ ފޯރުކޮށްދިނުމަށްދޭ ސަބްސިޑީއެވެ.