ކޯވިޑާއެކު އެންމެ ބޮޑު އަސަރެއްކޮށްފައި ވަނީ ދުނިޔޭގެ ފަތުރުވެރިކަމުގެ ސިނާއަތަށެވެ. ޤައުމުތަކުގެ ފުރަބަންދުގެ މުއްދަތާއި ދަތުރުފަތުރުކުރުމަށް ހުރި ހުރަސްތަކާއެކު ދުނިޔޭގެ ފަތުރުވެރިކަމުގެ ސިނާއަތް ހުއްޓުމަކަށްއައެވެ.
ރާއްޖެއަކީ ފަތުރުވެރިކަމަށް ބަރޯސާވާ ޤައުމަކަށްވާއިރު، ފަތުރުވެރިކަން ހުއްޓަމަކަށް އައުންވެގެންދިޔައީ އޭގެ އަސަރުތައް ރާއްޖޭގެ އިޤްތިސާދަށް އިންތިހާއަށް ކުރި ކަމަކަށެވެ. އެގޮތުން 1972 ވަނަ އަހަރު ރާއްޖޭގެ ފަތުރުވެރިކަން ފެށިފަހުން ދުވަހަކުވެސް ފަތުރުވެރިކަމުގެ ސިނާއަތް ދަށަށް ނުދާ މިންވަރަށް ކޯވިޑް19 ގެ ސަބަބުން ދަށަށް ދިޔައެވެ.
ރާއްޖޭގެ ބޯޑަރު އެއްކޮށް ބަންދުކޮށް ފަތުރުވެރިންނަށް ޙިދުމަތްދެމުންދިޔަ ހުރިހާ ރިސޯޓްތަކެއް ބަންދުކުރަން ޖެހުނެވެ. ކޯވިޑް-19 ފެތުރުން ރާއްޖޭގައި ހުއްޓުވުމުގެ ގޮތުން ބޯޑަރު ބަންދުކޮށްފައިވަނީ މާޗް މަހުގެ 27 ވަނަ ދުވަހުއެވެ.
110 ދުވަހަށްފަހު ރާއްޖޭގެ ބޯޑަރު އަލުން ހުޅުވާލާފައިވަނީ ޖުލައިމަހުގެ 15 ވަނަ ދުވަހުއެވެ. ބޯޑަރު ހުޅުވާލީ ވަކި ޙާއްސަ ގައިޑްލައިންއަކާއި އެކުގައެވެ. މި ގައިޑްލައިނަށް ފުރިހަމައަށް އަމަލްކޮށް ރާއްޖެ ވަނީ ފަތުރުވެރިކަމުގެ ދާއިރާގެ އެންމެ ކުރީ ސަފުގައި ފައިތިލަ ސާބިތުކޮށްފައެވެ.
ކޯވިޑުގެ ހާލަތުގައި ރާއްޖެ ފަދަ ކުޑަ ޤައުމަކުންވަނީ ދުނިޔެއަށް މިސާލު ދައްކާ، މިފަދަ ހާލަތެއްގައިވެސް ފަތުރުވެރިކަން ކުރިއެރުވިދާނެކަން ދުނިޔެއަށްވަނީ ދައްކައިދީފައެވެ. އަދި މިއީ ރައިސުލްޖުމްހުރިއްޔާ އިބްރާހިމް މުޙައްމަދު ސާލިޙުގެ ހަރުދަނާ އަދި ހިންގުންތެރި ސިޔާސަތުތައް ދުނިޔެއަށް ދައްކައިދިން ދަނޑިވަޅެކެވެ. ސަރުކާރުން މަސައްކަތްކުރަމުން ދިޔައީ ދާއިރާގެ ފަރާތްތަކާއި ގުޅިގެން މަސައްކަތް ކުރުމަށެވެ.
ރާއްޖޭގެ ފަތުރުވެރިކަމުގެ ރަން އަހަރު ފާހަގަކުރުމަށް މިއަހަރުގެ ޖުލައިމަހުގެތެރޭގައި މަޓީން ބޭއްވި ރަސްމިއްޔާތެއްގައި ވާހަކަފުޅުދައްކަވަމުން ރައީސުލް ޖުމުހޫއްރީއްޔާ އިބްރާހިމް މުހައްމަދު ސާލިޙް ވިދާޅުވީ، ޕެންޑަމިކްގެ ޙަބަރު ލިބުމާއިއެކު އެންމެ ފުރަތަމަ ބައްދަލުކުރެއްވި ބޭފުޅުންގެ ތެރޭގައި މަޓީގެ ބޭފުޅުން ހިމެނޭ ކަމަށެވެ. މީގެ އިތުރުން ޤާނޫނުތަކަށް ގެންނަން ޖެހޭ ބަދަލު ގެނައުމާއި، ސިނާޢަތަށް ހުރި ދަތިތައް ހައްލުކޮށްދިނުމަށް އަބަދުވެސް މަސައްކަތް ކުރަމުންދާ ކަމަށް އެމަނިކުފާނު ވިދާޅުވެފައިވެއެވެ.
"2020 ވަނަ އަހަރުގެ ފެބްރުއަރީމަހުގެ ތެރޭގައިބޭއްވި އެ ބައްދަލުވުމަށްފަހު، ރާއްޖެއަށް ފަތުރުވެރިން އުފުލާ ބައެއް ފްލައިޓުތައް ކެންސަލްކުރަން ޖެހުނު، އަދި 27 މާރޗު 2020 ގައި ރާއްޖޭގެ ބޯޑަރުތައް ބަންދުކުރަން ޖެހުނު، ވަރަށް ދަތި އުދަނގޫ ނިންމުމެއް އެއީ، ތިންމަސްދުވަސް ދުވަހަށްފަހު ރާއްޖޭގެ ބޯޑަރުތައް އަލުން ހުޅުވާލީ ބައެއް ބޭފުޅުންގެ ވިސްނުމާއި ދެކޮޅަށް އެ ދަނޑިވަޅުގައި ރާއްޖޭގެ ބޯޑަރުތައް އަލުން ހުޅުވާލުމަށް ނިންމި ނިންމުމަކީ ހަމަ ހަގީގަތުގައިވެސް ރަނގަޅު ނިންމުމެއް" ރައީސް ވިދާޅުވިއެވެ.
ރާއްޖެއިން މި ސިނާޢަތުގައި މިއަދު ހޯދާފައިވާ ކާމިޔާބީތަކަކީ، ސަރުކާރުން ސިނާޢަތުގެ އަޑު އަހައިގެން ހޯދާފައިވާ ކަމީޔާބީތަކެއްކަން ރައީސްގެ ވާހަކަފުޅުންވެސް އެނގެއެވެ.
ސަރުކާރުން ފަތުރުވެރިކަމުގެ ސިނާޢަތަށް ދިން އިސްކަމުގެ ތެރެއިން ފްރަންޓްލައިންގައި ހަރަކާތްތެރިވި ފަރާތްތަކާއި އެކުއެކީހެން ފަތުރުވެެރިކަމުގެ ދާއިރާގައި ހަރަކާތްތެރިވާ މުވައްޒަފުންނަށްވެސް ވެކްސިން ފޯރުކޮށްދިނެވެ. މިއާއެކު ރާއްޖެ ޕްރޮމޯޓު ކުރުމަށް ފެށީ އެންމެ ރައްކާތެރި މަންޒިލުގެ ގޮތުގައެވެ. އަދި ޕެންޑަމިކް ތެރޭ އެންމެ މަޤްބޫލު މަންޒިލުގެ ލަޤަބު ވިދި ވިދިގެން 2 އަހަރު ހޯދާފައިވާއިރު، މިއީ ކޯވިޑުގެ ތެރޭގައި ރާއްޖެ ދުނިޔެއަށް އިތުރަށް އިޝްތިހާރުވެ، ރާއްޖެއަށް އޮންނަ މަޤްބޫލުކަން އިތުރުވެގެންދިޔަ ކަމަކަށެވެ.
އިދިކޮޅު ފަރާތްތަކުން ސަރުކާރަށް ގިނަ ފާޑުކިޔުންތަކެއް އަމާޒުވި ނަމަވެސް، ސަރުކާރުން ދިޔައީ ހާލަތަށް އެކަށޭނަ ފިޔަވަޅުތައް އަޅަމުންނެވެ. އެ ފިޔަވަޅުތަކުގެ ނަތީޖާ ވަރަށް ފޮންޏެވެ. ކޯވިޑުގެ ހާލަތުގައިވެސް، ރާއްޖެއަށް ގިނަ އެއަރލައިންތަކަކުން ދަތުރުތައް ފެށިއެވެ. މިއާއެކު ރާއްޖެއަށް އަންނަ ފަތުރުވެރިންގެ އަދަދުތައް މަހުން މަހަށް އިތުރުވަމުންދިޔައެވެ.
2020ވަނަ އަހަރުތެރޭ، ރާއްޖެއަށްވަނީ 555494 ފަތުރުވެރިން ޒިޔާރަތްކޮށްފައެވެ. މި އަދަދަކީ ކޯވިޑުގެ ކުރިން 2019 ވަނަ އަހަރު ރާއްޖެއަށް ޒިޔާރަތްކޮށްފައިވާ 1.7 މިލިއަން ފަތުރުވެރިންނާއި އަޅާ ބަލާއިރު، 67.4 އިންސައްތަ ދަށް އަދަދެކެވެ. 2021 ވަނަ އަހަރު ރާއްޖެއަށް 1.3 މިލިއަން ފަތުރުވެރިން އައިސްފައިވާއިރު، މި އަހަރުތެރޭ ރާއްޖެއަށް 1.6 މިލިއަން ފަތުރުވެރިން އަންނާނެއެވެ.
ރާއްޖޭގެ އިޤްތިސާދުގެ މައި ލޭނާރަކީ ފަތުރުވެރިކަންކަމުގައިވާއިރު، ފަތުރުވެރިކަމަށް ލިބޭ ކުރިއެރުންތަކަކީ ރާއްޖޭގެ އިޤްތިސާދަށްވެސް ލިބޭ ކުރިއެރުންތަކެވެ.
މިދިޔަމަހުގެ ފަހުކޮޅު މުޅި މަޖިލީހުގެ ކޮމިޓީގައި ވާހަކަދައްކަވަމުން ފިނޭންސް މިނިސްޓަރ އިބްރާހިމް އަމީރު ވަނީ ކޯވިޑުގެ ތެރޭގައިވެސް ރާއްޖެއަށް އިޤްތިސާދީގޮތުން އައިސްފައިވާ ކުރިއެރުން ފާހަގަކުރައްވާފައެވެ. އެގޮތުން 2020ވަނަ އަހަރު ރާއްޖޭގެ އިޤްތިސާދު 33.5 އިންސައްތައިގައި އިޤްތިސާދު ދަށަށް ދިޔަނަމަވެސް 2021ވަނަ އަހަރު ރާއްޖޭގެ އިޤްތިސާދު 41.6 އިންސައްތައަށް ކުރިއެރިކަމަށް މިނިސްޓަރ ވިދާޅުވިއެވެ.
"2021 ވަނަ އަހަރު ހަމަ ސީދާ ވީ ޝޭޕް، ދުނިޔޭގެ އެއްވެސް ފަރާތަކުން އަންދާޒާ ކުރި ގޮތެއް ނޫން، 2021 ވަނަ އަހަރު ރާއްޖޭގެ އިޤްތިސާދު %41.6 އަށް ކުރިއެރި، 2022 ވަނަ އަހަރު %13 ކުރިއަރާނެ" މިނިސްޓަރ ވިދާޅުވިއެވެ.
ރާއްޖޭގެ ފަތުރުވެރިކަމުގެ ކުރިމަގު ފެންނަނީ ވަރަށް އުޖާލާކޮށެެވެ. ސަރުކާރުން ވަނީ އަންނަ އަހަރު ރާއްޖެއަށް 1.8 މިލިއަން ފަތުރުވެރިން ގެނައުމަށް އަމާޒު ކަނޑައަޅާފައެވެ. އަދި ރާއްޖޭގެ އުތުރާއި ދެކުނަށް ފަތުރުވެރިކަން ފުޅާކުރުމަށް ކުރަމުންދާ މަސައްކަތްތަތަކާއެކު އަންނަ އަހަރުވެގެންދާނީ ރާއްޖޭގެ ފަތުރުވެރިކަމުގައި ފާހަގަކޮށްލެވޭ ތާރީޙީ އަހަރަކަށެވެ.