މަސް ދޯނިފަހަރުގައި ލޮނު ފެނުން މަސް ފިނިކުރާ ނިޒާމު ޤާއިމުކުރުމަށް ކުރިއަށްގެންދާ [ކަނޑުފަޅު ނަފާ] ލޯނު ޕްރޮގްރާމަށް އެދި ހުށަހެޅުމަށް ހުޅުވާލައިފިއެވެ.
ފިޝަރީޒް މިނިސްޓްރީން ވިދާޅުވީ، މަސްވެރިކަމުގެ ފަހި މޫސުމުގައި އައިސް ލިބުމުގައި ހުރި ދަތިތަކަށް ލުޔެއް ހޯދައިދިނުމުގެ ގޮތުންނާއި އައިސް ހޯދުމަށް މަސްވެރި އުޅަނދުފަހަރުން ކުރާ ހޭދަ ކުޑަކުރުމަށް އެހީތެރިވެދިނުމުގެ ގޮތުން މަސް ދޯނިފަހަރުގައި ލޮނު ފެނުން މަސް ފިނިކުރާ ނިޒާމު ޤާއިމުކުރުމަށް [ކަނޑުފަޅު ނަފާ] ލޯނު ޕްރޮގްރާމަށް މިހާރު ހުޅުވާލާފައިވާ ކަމަށެވެ.
ކަނޑުފަޅު ނަފާ ލޯނު ޕްރޮގްރާމުގެ މިފިޔަވަހީގައި މަދުވެގެން 68 ދޯނީގައި ލޮނު ފެން ފިނިކުރާ ނިޒާމު ޤާއިމުކުރުމަށް (ޖުމްލަ 34 މިލިއަން ރުފިޔާއާއި ހަމައަށް) ދޫކުރުމަށްވަނީ ހަމަޖެހިފައެވެ. އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަން (އެސް.ޑީ.އެފް.ސީ) އާއި ގުޅިގެން ކުރިއަށް ގެންދާ މިލޯނު ޕްރޮގްރާމުގައި ލޯނު ދޫކުރުމަށް ހަމަޖެހިފައިވަނީ ލޯނަށް އެދި ހުށަހަޅާ ތަރުތީބުން އެޕްލިކޭޝަން ވަޒަންކުރުމަށްފަހުކަމަށް ފިޝަރީޒް މިނިސްޓްރީން ވިދާޅުވެއެވެ.
މިލޯން ޕްރޮގްރާމްގެ ދަށުން ލޯނުގެ ގޮތުގައި ދޫކުރާނެ އެންމެ ގިނަ އަދަދަކީ، 5 ލައްކަ ރުފިޔާއެވެ. މި ފައިސާ ބޭނުންކުރަން ޖެހޭނީ އާރް.އެސް.ޑަބްލިއު ސިސްޓަމް ގަނެ އިންސްޓޯލްކުރުމަށެވެ.
6 އިންސައްތަ އިންޓްރެސްޓު ރޭޓެއްގައި ދޫކުރާ މިލޯނު އަދާކުރަން ޖެހެނީ 6 އަހަރު ދުވަހުގެ ތެރޭގައެވެ. ލޯނުގެ ފައިސާ އަނބުރާ ދައްކަން ފަށަންޖެހޭ މުއްދަތަކީ ލޯނުގެ އެއްބަސްވުމުގައި ސޮއިކުރާ ތާރީޚުން ފެށިގެން 6 މަސްދުވަހެވެ. މި ލޯނަށް އެދޭ ފަރާތުން ލޯނު ހޯދުމަށް ރަހުނެއްގޮތުގައި އެއްވެސް އެއްޗެއް ބަހައްޓާކަށް ނުޖެހޭނެކަމަށް ފިޝަރީޒް މިނިސްޓްރީން ހާމަކުރެއެވެ.
ލޯނަށް ހުށަހަޅާ ފަރާތްތަކުގައި ހުންނަންޖެހޭ ޝަރުތުތަކުގެތެރޭގައި، ސިސްޓަމް ހަރުކުރުމަށް ހުށަހަޅާ ދޯންޏަކީ މަދުވެގެން 6 މަސް ދުވަހު މަސްވެރިކަމުގައި ހަރަކާތްތެރިވެފައިވާ ސައްހަ މަސްވެރިކަމުގެ ލައިސަންސް އޮތް ދޯންޏަކަށްވުން ހިމެނެއެވެ.
މިލޯނަށް އެދި ހުށަހަޅަންޖެހެނީ، އެސް.ޑީ.އެފް.ސީގެ އޮންލައިން ޕޯޓަލް މެދުވެރިކޮށް މިމަހުގެ 28ވަނަ ދުވަހުން ފެށިގެންނެވެ. ލޯނު ޕްރޮގްރާމާ ގުޅޭ އިތުރު ތަފްޞީލު ހިމެނޭ ލޯނުގެ އުޞޫލު ފިޝަރީޒް މިނިސްޓްރީގެ ވެބްސައިޓުން ލިބެން ހުންނާނެއެވެ.