އިންޑިއާގެ ޓްރެވަލް ޕްލަސް ލެއިޝަރގެ "ބެސްޓް ރޮމޭންޓިކް ޑެސްޓިނޭޝަން" އެވޯޑް ދިވެހިރާއްޖެއަށް ލިބިއްޖެއެވެ.
މިއެވޯޑް އިއުލާންކޮށްފައިވަނީ އިންޑިއާގެ ނިއުދިއްލީގެ އައިޓީސީ މައުރިޔާގައި ބޭއްވި އިންޑިއާގެ ބެސްޓް އެވޯޑްސް ދިނުމުގެ ހަފްލާގައެވެ. މި އެވޯޑާ ހަވާލުވީ އިންޑިއާއަށް ރާއްޖެއިން ކަނޑައަޅާފައި ހުންނަވާ ސަފީރު، އިބްރާހީމް ޝަހީބެވެ.
ޓްރެވެލް ޕްލަސް ލެއިޝަރގެ ބެސްޓް އެވޯޑްސްގައި ފަތުރުވެރިކަމުގެ ދާއިރާއިގެ އެންމެ މަގުބޫލު ކުންފުނިތައް ފާހަގަކުރެއެވެ. މި އެވޯޑަށް ވަނަތައް ހޮވަނީ 60 ދުވަހުގެ މުއްދަތެއްގެ ތެރޭގައި އޮންލައިންކޮށް ވޯޓު ދީގެންނެވެ.
އިންޑިއާގެ ޓްރެވަލް ޕްލަސް ލެއިޝަރގެ ‘ބެސްޓް ރޮމޭންޓިކް ޑެސްޓިނޭޝަން’ އެވޯޑް ދިވެހިރާއްޖެއަށް ލިބިފައިވާއިރު، މި ޝަރަފުވެރި އެވޯޑަކީ އިންޑިއާގައި ރާއްޖެ ޕްރޮމޯޓް ކުރުމަށް ކުރަމުންދާ މަސައްކަތުގެ ނަތީޖާ ކަމަށް، މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން ވިދާޅުވެއެވެ.
އިންޑިއާ އަކީ ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ ޤައުމެވެ. މިމަހުގެ 16ވަނަ ދުވަހުގެ ނިޔަލަށް އިންޑިއާއިން ރާއްޖެއަށް، 199219 ފަތުރުވެރިން ޒިޔާރަތްކޮށްފައިވާއިރު، މިއީ ރާއްޖެއަށް ޒިޔާރަތްކޮށްފައިވާ މުޅި ޖުމްލަ ފަތުރުވެރިންގެ %14އެވެ.
ދާދި ފަހުން ރާއްޖެއިންވަނީ ޖެހިޖެހިގެން ތިން ވަނަ ފަހަރަށް، ވޯލްޑް ޓްރެވަލް އެވޯޑްސްގެ "ވޯލްޑް ލީޑިންގ ޑެސްޓިނޭޝަން" ގެ މަގާމު ހޯދާފައެވެ. މީގެ އިތުރުން، ރާއްޖޭގެ ތާރީހުގައި ފުރަތަމަ ފަހަރަށް އެމްއެމްޕީއާރުސީން މި އަހަރު ވަނީ "ވޯލްޑް ލީޑިންގ ޓޫރިސްޓް ބޯޑް"ގެ މަގާމުވެސް ކާމިޔާބުކޮށްފައެވެ.