ސަރުކާރުން މަސައްކަތްކުރަމުންދަނީ އެވްރެޖްކޮށް ކޮންމެ އަހަރަކު 8000 އެނދު ފަތުރުވެރިކަމަށް ނެރުމަށްކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުންނެވެ.
ރާއްޖޭގެ ފަތުރުވެރިކަމުގެ ސިނާއަތް ފުޅާކޮށް ކުރިއެރުވުމަށް ކުރަމުންދާ މަސައްކަތްތަކާއި ގުޅޭގޮތުން ވާހަކަދައްކަވަމުން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ ރާއްޖޭގައި މިހާރު ފަތުރުވެރިކަމުގައި 60000 އެނދު އެބަހުރި ކަމަށެވެ. އަދި ކުރިއަށް އޮތް އަހަރުތަކުގައި އެވްރެޖްކޮށް 8000 އެނދު ފަތުރުވެރިކަމަށް އަންނާނެ ކަމަށް ލަފާކުރެވޭ ކަމަށް މިނިސްޓްރ ވިދާޅުވިއެވެ.
"އޭގެތެރެއިން ބޮޑުބައެއް އަންނާނީ ރިސޯޓުންނާއި، ހޮޓާ ގެސްޓުހައުސްއިން، ސަފާރީތަކުންވެސް ކޮންމެވެސް ވަރަކަށް އެނދު ތައާރަފްވަމުންދާނެ، އެނދު އެވަރަށް ތައާރަފްކޮށްގެން ޓޫރިޒަމްގެ މަންފާ އެންމެންނަށް އެކަށީގެންވާ ގޮތަކަށް ލިބޭނެ،" މިނިސްޓަރ މައުސޫމް ވިދާޅުވިއެވެ.
މިނިސްޓަރ ފާހަގަކުރެއްވިގޮތުގައި ރާއްޖޭގައި މިހާރު އެންމެ ބާރަށް ކުރިއަރަމުންދަނީ ގެސްޓުހައުސް ވިޔަފާރިކަމަށެވެ. އެގޮތުން ރާއްޖޭގައި ހުރި ފަތުރުވެރިކަމުގެ އެނދުގެ 23 އިންސައްތައަކީ ހޮޓަލާއި ގެސްޓުހައުސްއިން ފަތުރުވެރިކަމުގެ އެނދުކަމަށް މިނިސްޓަރ ވިދާޅުވިއެވެ.
"އެއީ ވަރަށް ގިނަ އެނދު، ނިސްބަތުން އެ ސެކްޓަރ ވަރަށް ބާރަށް އެބަދޭ ކުރިއަރައިގެން، ރާއްޖޭގެ 111 ރަށުގައި މިހާރު ޓޫރިޒަމް އެބައޮތް" މިނިސްޓަރ މައުސޫމް ވިދާޅުވިއެވެ.
މިނިސްޓަރ ވިދާޅުވީ މިއަހަރުތެރޭ 10 ރިސޯޓު އަލަށް ހުޅުވިގެންދާނެ ކަމަށް ލަފާކުރެވުނު ނަމަވެސް، އޭގެތެރެއިން 3 ރިސޯޓު ހުޅުވުން ލަސްކޮށްފައިވާކަމަށެވެ. އެއީ ޗައިނާ ބަންދުގައި އޮތުމުން ލޮޖިސްޓިކަލް ކަންތައްތަކާއެކުކަމަށްވެސް މިނިސްޓަރ ވިދާޅުވިއެވެ.
ރާއްޖޭގެ ފަތުރުވެރިކަން އެހެން ހަރުފަތަކަށް ގެންދިޔުމަށް ތަފާތު އެކި ކޮންސެޕްޓުތަކަށް ރިސޯޓުތައް ތަރައްޤީކުރަމުންދާކަން މިނިސްޓަރ ފާހަގަކުރެއްވިއެވެ. އަދި ގެސްޓުހައުސް ވިޔަފާރީގައިވެސް މަތީފެންވަރުގެ ހިދުމަތްދޭ ތަންތަން އެބަހުރި ކަމަށާއި، މިހާރު ދިވެހިން މި ސިނާއަތުގައި އިސްނަގައިގެން މަސައްކަތްކުރަމުންދާކަމަށް މިނިސްޓަރ ވިދާޅުވިއެވެ.
އަދި މިނިސްޓްރީން މަސައްކަތްކުރަމުންދަނީވެސް ދިވެހިން މި ދާއިރާއަށް ނެރުމަށްކަމަށާއި، އެފަދަ ކަންތައްތަކަށް ފަހިކޮށްދޭން މިނިސްޓްރީން އެހީތެރިވެދޭނެ ކަމަށެވެ.
ސަރުކާރުން ދަނީ ފަތުރުވެރިކަން މުޅި ރާއްޖެއަށް ފުޅާކުރުމަށްޓަކައި ގިނަ މަސައްކަތްތަކެއް ކުރަމުންނެވެ. އެގޮތުން ރާއްޖޭގެ އުތުރާއި ދެކުނުގެ އެއަރޕޯޓުތައް ޒަމާނީ ފެންވަރަށް ތަރައްޤީކޮށް، އެ ހިސާބުތަކަށް ދަތުރުކުރާ ފަތުރުވެރިންގެ އަދަދުތައް އިތުރުކުރުމަށް ހާއްސަ ޕްލޭންތަކެއްވަނީ ރާވާފައެވެ.