އިންޑިއާގެ އެހީގައި މިހާރު ކުރިއަށްދާ މަޝްރޫޢުތަކުން ރައްޔިތުންނަށް ސީދާ ފައިދާކުރާނެ: ޝަހީބް

އިންޑިއާ ސަރުކާރުން ރާއްޖޭގައި ހިންގާ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓުގެ ދަށުން މިހާރުވެސް 25 މަޝްރޫޢުގެ މަސައްކަތްކުރިއަށްދާކަމަށާއި، އެއީ ރައްޔިތުންނަށް އޭގެ ސީދާ އަސަރުކުރާނެ މަޝްރޫޢުތަކެއްކަމަށް ރާއްޖެއިން އިންޑިއާއަށް ކަނޑައަޅާފައި ހުންނަވާ ސަފީރު އިބްރާހީމް ޝަހީބު ވިދާޅުވެއްޖެއެވެ.

ރާއްޖެއިން އިންޑިއާއަށް ކަނޑައަޅާފައި ހުންނަވާ ސަފީރު އިބްރާހީމް ޝަހީބު މިހެން ވިދާޅުވެފައިވަނީ އިންޑިއާގެ ވިއޯން ނިއުސްއަށް ދެއްވި ޙާއްސަ އިންޓަރވިއުއެއްގައެވެ.

އިންޑިއާއިން ރާއްޖޭގައި ކުރިއަށްގެންދާ މަޝްރޫޢުތަކާއި ގުޅޭގޮތުން ވާހަކަދައްކަވަމުން ސަފީރު އިބްރާހީމް ޝަހީބު ވަނީ، ރާއްޖޭގައި މިހާރު ކުރިއަށްދާ އުމްރާނީ ތަރައްޤީގެ އެންމެ ބިޔަ މަޝްރޫޢުއަކީ އިންޑިއާ ސަރުކާރުގެ އެހީގައި ކުރިއަށްގެންދާ މަޝްރޫޢެއްކަން ފާހަގަކުރައްވާފައެވެ. އެގޮތުން ގްރޭޓަރ މާލެ ކަނެކްޓިވިޓީ ޕްރޮޖެކްޓާއެކު މާލެ ސިޓީ، ވިލިގިލި، ގުޅީފަޅު އަދި ތިލަފުށި ގުޅާލެވޭނެކަމަށާއި، މި ޕްރޮޖެކްޓާއެކު އިޤްތިސާދީގޮތުން ރާއްޖެއަށް ބޮޑެތި ކުރިއެރުންތަކެއް ލިބިގެންދާނެކަންވެސް ސަފީރު ފާހަގަކުރެއްވިއެވެ. އަދި މި މަޝްރޫޢުއަށް ބޭނުންވާ މާލީ އެހީތެރިކަން އިންޑިއާއިން ފޯރުކޮށްދީފައިވާތީ އެކަމަށް ސަފީރު ވަނީ ޝުކުރު އަދާކުރައްވާފައެވެ.

އިންޑިއާ ސަރުކާރުގެ އެހީގައި ރާއްޖޭގައި ކުރިއަށްދާ އިތުރު މަޝްރޫޢުތަކާއި ގުޅޭގޮތުން ވާހަކަދައްކަވަމުން ސަފީރު ވަނީ ހައި އިމްޕެކްޓު ޑިވެލޮޕްމަންޓު ޕްރޮޖެޓުގެ ފަހުގެ ތަފްސީލްތައް ދެއްވާފައެވެ. އެގޮތުން މިހާރު 25 މަޝްރޫޢުއެއްގެ މަސައްކަތްކުރިއަށްދާއިރު، ބައެއް މަޝްރޫޢުތަކުގެ މަސައްކަތްތައް މިހާރު ނިމިފައިވާކަމަށާއި، ބައެއް މަޝްރޫޢުތަކުގެ މަސައްކަތް ނިމުމާއި ގާތްވެފައިވާކަމަށް ސަފީރު ޝަހީބު ވިދާޅުވިއެވެ.

މި މަޝްރޫޢުތަކަކީ ރައްޔިތުންނަށް ސީދާގޮތުން ފައިދާކުރާނެ މަޝްރޫޢުތަކެއް ކަމަށާއި، މި މަޝްރޫޢުތައް ރައްޔިތުން ބަލައިގަނެފައިވާކަމަށްވެސް ޝަހީބު ވިދާޅުވިއެވެ.

ހައި އިމްޕެކްޓް ކޮމިއުނިޓީ ޑިވެލޮޕްމެންޓް ޕްރޮޖެކްޓްތަކަކީ އިންޑިއާ އާއި ދިވެހިރާއްޖޭގެ މެދުގައިވާ ތަރައްގީގެ ގުޅުމުގެ މުހިންމު އެއް ތަނބެވެ. މި މަޝްރޫއުތަކަކީ ރަށްތަކުގެ ރައްޔިތުންގެ ބޭނުންތައް ދެނެގަނެ، އެ ބޭނުންތައް ފުއްދުމަށްޓަކައި ފަންޑްކުރެވި، ލޯކަލް ކައިންސިލްތަކާއި މިނިސްޓްރީތަކުގެ ބެލުމުގެ ދަށުން ހިންގޭ މަޝްރޫއުތަކެކެވެ.

އިންޑިއާ އާއި ރާއްޖެއާއި ދެމެދު އޮންނަ ވިޔަފާރީގެ ގުޅުން އިތުރަށް ބަދަހިކުރުމަށް ކުރަމުންދާ މަސައްކަތްތަކާއި ގުޅޭގޮތުން ސަފީރު ޝަހީބު ވިދާޅުވީ، ދިވެހި ކެއުންތައް އިންޑިއާ މާކެޓަށް ތައާރަފްކުރުމަށް ރާވާފައިވާ ކަމަށެވެ. އަދި މިއީ ދެޤައުމު ދެމެދު ވިޔަފާރީގެ ތަފާތު ދާއިރާއަކުން ގުޅުން ބަދަހި ކުރެވިދާނެ ކަމެއްގެ ގޮތުގައި ސަފީރު ވަނީ ފާހަގަކޮށްފައެވެ.

ރާއްޖޭގައި ރުޕޭ ކާޑު ބޭނުންކުރަން ފެށުމަށްވަމުންދާ ތައްޔާރީތަކާއި ގުޅޭގޮތުން ސަފީރު ޝަހީބު ވިދާޅުވީ، މިހާރު ކުރިއަށްދަނީ މިކަމުގެ އެންމެ ފަހުގެ މަސައްކަތްތައްކަމަށެވެ. އެގޮތުން ގަވާއިދުތަކަށް ގެންނަން ޖެހޭ ބަދަލުތައް ގެނައުމަށް މަސައްކަތްކުރަމުންދާ ކަމަށް ސަފީރު ވިދާޅުވިއެވެ.

ރުޕޭއާއެކު ދެޤައުމުގެ އިޤްތިސާދީ ގުޅުން އިތުރަށް ބަދަހިވެ، ދެޤައުމުގެ ދެމެދު މީހުން ދަތުުރުކުރާ މިންވަރުވެސް އިތުރުވެގެންދާނެކަން ސަފީރު ފާހަގަކުރެއްވިއެވެ.

އިންޑިއާއަކީ ރާއްޖެއަށް ގިނަ އަދަދަކަށް ފަތުރުވެރިން އަންނަ ޤައުމެކެވެ. މިދިޔަ އަހަރު ނިމުނު އިރު، އެންމެ ގިނަ އަަދަދަކަށް ރާއްޖެއިން ފަތުރުވެރިން އައިސްފައިވަނީ އިންޑިއާއިންނެވެ. ސަފީރު ޝަހީބުވަނީ ރާއްޖެއަކީ ހުރިހާ ފަންތިއެއްގެ ފަތުރުވެރިންނަށްވެސް ދަތުރުކުރެވޭނެ މަންޒިލެއްގެ ގޮތުގައި އިންޑިއާގައި އިޝްތިހާރުކުރުމަށް ހާއްސަ އިސްކަމެއް ދެއްވާނެކަމަށް ވިދާޅުވެފައެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ދިވެހިރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރުކަމުގެ މަޤާމަށް އިބްރާހީމް ޝަހީބު ޢައްޔަން ކުރެއްވީ 10 އޮކްޓޯބަރ 2022 ގައެވެ. އަދި އެމަނިކުފާނުގެ ސަފީރުކަމުގެ ފަތްކޮޅު އިންޑިއާގެ ރައީސްއަށް އެރުވީ މިދިޔަ ނޮވެމްބަރުމަހުގެ 28 ވަނަ ދުވަހުއެވެ. ޝަހީބަކީ އިންޑިއާއަސް ކަނޑައަޅުއްވާފައި ހުންނަވާ ސަފީރުގެ އިތުރުން ބޫޓާން، ނޭޕާލް އަދި އަޒަރުބައިޖާނަށް ދިވެހިރާއްޖެއިން ކަނޑައަޅުއްވާ ނޮން-ރެސިޑެންޓް ސަފީރުވެސްމެއެވެ.