ގަސްތަކަށް ޖަހާ ބޭސްތައް ބޭނުންކުރަންޖެހޭ މިންވަރަށްވުރެ ގިނައިން ބޭނުންކުރަމުންދާތީ ސިއްހީ ގެއްލުންތައް ކުރިމަތިވާކަން ފާހަގަކުރެވިފައިވާކަމަށް މިނިސްޓްރީ އޮފް ފިޝަރީޒް އެންޑް އެގްރިކަލްޗަރއިން ހާމަކޮށްފިއެވެ.
ރާއްޖޭގައި އާމްދަނީއެއް ހޯދުމުގެގޮތުން ދަނޑުވެރިކަން ކުރާ ގިނަ އަދަދެއްގެ ފަރާތްތައް އުޅެއެވެ. އަދި އެފަދަ ފަރާތްތަކަށް ދަނޑުވެރިކަމުގެ އެންމެ ފުރިހަމަ މައުލޫމާތުތައް ފޯރުކޮށްދިނުމަށް އެގްރިކަލްޗަރ މިނިސްޓްރީން ދަނީ ގިނަ މަސައްކަތްތަކެއް ކުރަމުންނެވެ.
އެގްރިކަލްޗަރ މިނިސްޓްރީގެ މަސައްކަތްތަކާއި ގުޅޭގޮތުން، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މިނިސްޓްރީ އޮފް ފިޝަރީޒް އެންޑް އެގްރިކަލްޗަރގެ ޑިރެކްޓަރ އެގްރިކަލްޗުރަލް ޓްރެއިންނިން އެންޑު އެކްސްޓެންޝަން ސަރވިސް އަލީ އާމިރު ވިދާޅުވީ، ރާއްޖޭގައި ގިނަ ފަހަރަށް ގަސްތަކަށް ބޭސް ޖެހުމާއި، ގަސް ކާނާ އެޅުމުގައި ހުރި ނުރައްކާތަކާއި ގުޅޭ މައުލޫމާތު ދަނޑުވެރިންނަށް ލިބިފައި ނުވާކަން ފާހަގަކުރެވިފައިވާ ކަމަށެވެ.
" ވަރަށް ގިނަ ފަހަރު އެބަ ފެނޭ، ތަފާތު އެކި ކަހަލަ ގަސް ކާނާތައް ބޭނުން ނުވާ މިންވަރަށް ބޭނުންކުރެވޭތަން ވަރަށް ގިނަ ފަހަރަށް އެބަފެނޭ، ގަހަށް ބޭސް ޖަހާއިރުގައިވެސް، އެދެވޭ މިންވަރަށްވުރެ ގިނައިން، ބޭސް ޖެހޭތަންވެސް، އެގޮތަށް އެކަން ކުރެވޭ ކަމުގައިވާނަމަ، އެތަކެތި ކާ ފަރާތްތަކަށް އޭގެ ގެއްލުންތައް ފޯރަމުން އެބަދޭ،" އާމިރު ވިދާޅުވިއެވެ.
އާމިރު ވިދާޅުވީ، ގަސްތަކަށް ބޭސް ޖެހުމަށްފަހުވެސް ދޭންޖެހޭވަރަށް ވަގުތު ނުދީ އުފައްދާތަކެތި ކަނޑާ މައްސަލަވެސް ފާހަގަކުރެވިފައިވާ ކަމަށާއި، މިކަމަކީވެސް ދަނޑުވެރިކަމުގެ އުފެއްދުމަށް އޭގެ އަސަރުތައް ކުރާކަމެއްކަން އާމިރު ފާހަގަކުރެއްވިއެވެ.
"ގިނަ ބޭސްތަކަކީ 14 ދުވަހުގެ މުއްދަތެއް ދޫކުރަންޖެހޭ ބޭސްތައް، އެވަރުގެ މުއްދަތެއް ދޫ ނުކޮށް، އެތަކެތި ކަނޑާ ބާޒާރަށް ނެރެވޭ ކަމުގައިވާނަމަ އެތަކެތީގައި ބޭހުގެ އަސަރު ހުރުން ވަރަށް ބޮޑަށް އެކަށީގެންވޭ، އޭގެ އަސަރު ހަށިގަނޑުގެ ތެރެއަށް އެ ކެއުމުގެ ސަބަބުން ދިޔުމަކީވެސް އެކަށީގެންވޭ،" އާމިރު ވިދާޅުވިއެވެ.
އާމިރު ވިދާޅުވީ، މިކަންތައްތަކާއި ގުޅޭގޮތުން ދަނޑުވެރިން ހޭލުންތެރިކުރުވުމަށް ގިނަ ޕްރޮގްރާމްތަކެއް ކުރިއަށް ގެންދަމުންދާ ކަމަށެވެ. އަދި ދަނޑުވެރިންނާއި ކައިރިން ހިދުމަތްދިނުމަށްވެސް މަސައްކަތްކުރަމުންދާ ކަމަށާއި، އެގޮތުން ވެބް އެޕްލިކޭޝަނަކާއި މޯބައިލް އެޕްލިކޭޝަނެއް ތަރައްޤީކޮށް، އެފަދަ އެޕްލިކޭޝަނެއް މެދުވެރިކޮށް ދަނޑުވެރިންނަށް މައުލޫމާތުތައް ދިނުމަށް މަސައްކަތްކުރަމުންދާކަމަށްވެސް އާމިރު ވިދާޅުވިއެވެ.
ރާއްޖޭގައި ފުޅާ ދާއިރާއެއްގައި ދަނޑުވެރިކަން ކުރާ ފަރާތްތަކުގެ އަދަދުތައް ދަނީ އިތުރުވަމުންނެވެ. އެގޮތުން މާރުކޭޓަށް ބަލާލިކަމުގައިވިޔަސް ތަފާތު އެކި ބާވަތްތަކުގެ ތަރުކާރީ އާއި މޭވާ މިހާރުދަނީ ރާއްޖޭގައި ހައްދަމުންނެވެ.
ސަރުކާރުގެ އަމާޒަކީ ރާއްޖޭގެ އިޤްތިސާދުގައި ދަނޑުވެރިކަން ހިއްސާކުރާ މިންވަރު އިތުރުކުރުމެވެ. މި މަސައްކަތުގެ ދަށުން ދަނޑުވެރިކަން ކުރިއަރުވައި ފުޅާކުރުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ.