ރާއްޖޭގެ ފަތުރުވެރިކަމުގެ ސިނާއަތް ކުރިއަރުވައި މިދާއިރާއިން އާއްމު ރައްޔިތުންނަށް ލިބޭ މަންފާ އިތުރުކުރުމަށް ސަރުކާރުން ޚާއްސަ އިސްކަމެއް ދެއްވައެވެ.
މިކަން އެންމެ ބޮޑަށް ފާހަގަކުރެވިގެންދިޔައީ ކޯވިޑުގެ ތެރޭގައި ފަތުރުވެރިކަމުގެ ސިނާއަތަށް ލިބުނު ގެއްލުންތައް ކުޑަކުރުމަށް ސަރުކާރުން އެޅި ހަރުދަނާ ފިޔަވަޅުތަކުންނެވެ. އޭރު އެޅި ފިޔަވަޅުތަކާއެކު ރާއްޖޭގެ ފަތުރުވެރިކަމުގެ ސިނާއަތް ކޯވިޑުގެ ކުރީގެ ހާލަތަށް ރުޖޫޢަވެފައިވާއިރު، މިއަހަރުވެގެންދާނީ ރާއްޖޭގެ ފަތުރުވެރިކަމުގައި ފާހަގަކޮށްލެވޭ ކާމިޔާބު އަހަރަކަށްކަމަށް ފަތުރުވެރިކަމުގެ ތަޖުރިބާކާރުން ހާމަކުރެއެވެ.
މިހެން ބުނަމުންދާ އެންމެ ބޮޑު އެއް ސަބަބަކީ އަހަރު ފެށިގެން އައި އިރު ރާއްޖެއަށް އަންނަމުންދާ ފަތުރުވެރިންގެ އަދަދުތަކަށް ލިބިފައިވާ ކުރިއެރުމެވެ. އަދި ޗައިނާ މާކެޓު ހުޅުވާލާފައިވާއިރު، އެޤައުމުން ރާއްޖެއަށް ގިނަ އަދަދެއްގެ ފަތުރުވެރިން މިއަހަރުތެރޭ އަންނާނެކަމަށްވެސް ވަނީ ލަފާކުރެވިފައެވެ.
ރާއްޖެއަށް ގިނަ އަދަދެއްގެ ފަތުރުވެރިން ގެނައުމުގައި ހަރަކާތްތެރިވާ ކެޕިޓަލް ޓްރެވަލްގެ ސީއީއޯ ޔޫސުފް ރިފްޢަތު ހާމަކުރެއްވި ގޮތުގައި މި އަހަރުވެގެންދާނީ ރާއްޖޭގެ ފަތުރުވެރިކަމުގައި ފާހަގަކޮށްލެވޭ އަހަރަކަށެވެ. ރިފްއަތުވަނީ މިލިބެމުންދާ ކުރިއެރުންތަކުގައި ސަރުކާރާއި ކަމާއިގުޅުންހުރި ހުރިހާ ފަރާތްތަކުގެ ދައުރު ބޮޑުކަންވެސް ފާހަގަކޮށްފައެވެ.
" ވޭތުވެދިޔަ 5 އަހަރަށް ބަލާއިރުވެސް، އެރައިވަލްވެސް ވަރަށް ބޮޑަށް އިތުރުވެއްޖެ، އަޅުގަނޑުމެން ކުންފުންޏަށް ބަލާއިރުވެސް 100 ޕަސަންޓު އިންކްރީޒެއް އައިސްސި، އަދި ޗައިނާ މާކެޓު ހުޅުވާލީމައި އޮބި ނޯންނަވަރަށް މީހުން އަންނާނެ ކަމަށް ލަފާކުރެވޭ،" ރިފްއަތު ވިދާޅުވިއެވެ.
ޗައިނާގެ ބޯޑަރުތައް ހުޅުވާލުމާއި އެކު އެޤައުމުން މި އަހަރުތެރޭ ގިނަ އަދަދެއްގެ ބަޔަކު ޤައުމުން ބޭރަށް ދަތުުރު ކުރާނެކަމަށް ލަފާކުރެވެއެވެ. ރިފްއަތު ފާހަގަކުރިގޮތުގައި ކެޕިޓަލް ޓްރެވަލްސް މެދުވެރިކޮށްވެސް ގިނަ އަދަދެއްގެ ޗައިނާ ފަތުރުވެރިންދަނީ ރާއްޖެއަށް އައުމަށް ބުކިންސް ހަދަމުންނެވެ.
ރާއްޖެއަށް ފަތުރުވެރިން އަންނަ ޤައުމުތަކުގެތެރެއިން ފާހަގަކޮށްލެވޭވަރުގެ ކުރިއެރުމެއް މިއަހަރުގެ މިވީ މުއްދަތުގައި އިޓަލީ މާކެޓުން ހޯދާއިވާކަންވެސް ރިފްއަތުވަނީ ފާހަގަކޮށްފައެވެ. އެގޮތުން އިޓަލީއިން މިހާރު ރާއްޖެއަށް ގިނަ އަދަދަކަށް ފަތުރުވެރިން އަންނަމުންދާއިރު، މިއީ މީގެ 3 އަހަރުކުރީގެ އަދަދަށްވުރެ އިތުރު އަދަދެއްކަމަށް ރިފްއަތު ވިދާޅުވިއެވެ.
ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، މިއަހަރުގެ ފުރަތަމަ 15 ދުވަސްތެރޭ ރާއްޖެއަށްވަނީ 81772 ފަތުރުވެރިން އައިސްފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު 21.8 އިންސައްތަ އިތުރު އަދަދެކެވެ. ދުވާލެއްގެ މައްޗަށް ރާއްޖެއަށް އަންނަ ފަތުރުވެރިންގެ އަދަދުވެސް މިހާރު އުޅެނީ 5000އިން މަތީގައެވެ.
މިދުވަސްވަރަކީ ރާއްޖޭގެ ފަތުރުވެރިކަމުގެ ޕީކް ސީޒަނެވެ. މިއާއެކު ރާއްޖެއަށް ގިނަ އަދަދެއްގެ އެއަރލައިންތަކަކުންވެސް ދަނީ ދަތުރުތައް ބާއްވަމުންނެވެ. ޓޫރިޒަމް މިނިސްޓްރީގެ ހިސާބުތައް ދައްކާގޮތުން ރާއްޖެއަށް މިހާރު ބައިނަލްއަޤްވާމީ 33 އެއަރލައިނަކުން ދަނީ ދަތުރުތައް ބާއްވަމުންނެވެ.
ސަރުކާރުން 2022 ވަނަ އަހަރު ރާއްޖެއަށް ގެނައުމަށް އަމާޒުހިފީ 1.6 މިލިއަން ފަތުރުވެރިންނެވެ. މި އަމާޒު ވަނީ ޑިސެމްބަރ މަހުގެ 20 ވަނަ ދުވަހު ހާސިލްވެފައެވެ. އަދި މިއަހަރަށް ސަރުކާރުން އަމާޒުހިފާފައިވަނީ 1.8 މިލިއަން ފަތުރުވެރިން ގެނެސް ފަތުރުވެރިކަމުގެ ރެކޯޑެއް ހެދުމަށެވެ.