ތިލަދުންމަތީގައި ރިސޯޓު ތަރައްޤީކުރުމަށް އަންނަ ހަފްތާތެރޭގައި އިތުރު 3 ރަށެއް ބީލަމަށް ހުޅުވާލުމަށް ނިންމާފައިވާ ކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ހަނިމާދޫ އިންޓަރނޭޝަނަލް އެއަރޕޯޓު ޒަމާނީ ފެންވަރަށް ތަރައްޤީވެގެންދާއިރު، އެ ސަރަޙައްދުގައި ޓޫރިޒަމް ފުޅާކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އެއަރޕޯޓާއެކު ތިލަދުންމަތީގައި ފަތުރުވެރިކަމުގެ 8000 އެނދު ތަރައްޤީކުރުމަށް ސަރުކާރުންވަނީ އަމާޒް ހިފާފައެވެ.
@MoTmv to invite bids for 3 new resort projects in Thiladhunmathi in the coming week.The region needs 8000 tourist beds in coming years for smooth functioning of Hanimaadhoo Intern’l Airport after redevelopment, inaugurated by HEP @ibusolih & #India EAM, @DrSJaishankar on 18 Jan. pic.twitter.com/5B17c5NVQM
— Ministry of Tourism (@MoTmv) January 20, 2023
ހަނިމާދޫ އިންޓަރނޭޝަން އެއަރޕޯޓު ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް ފަށައިފައިވަނީ މިދިޔަ ބުދަ ދުވަހުގެ ރޭ އެކަމަށްޓަކައި ބޭއްވި ހާއްސަ ރަސްމިއްޔާތެއްގައެވެ. ހަނިމާދޫ އިންޓަރނޭޝަނަލް އެއަރޕޯޓު ތަރައްޤީކުރުމުގެ މަޝްރޫޢު ސަރުކާރުން ކުރިއަށްގެންދަނީ އިންޑިއާގެ ކުންފުންޏެއްކަމަށްވާ ޖޭ.އެމް.ސީ ޕްރޮޖެކްޓްސްއާ ޙަވާލުކޮށްގެންނެވެ.
މި މަޝްރޫޢުގެ ދަށުން ހަނިމާދޫގައި 2.46 ކިލޯމީޓަރުގެ އާ ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ޚިދުމަތް ދެވޭނެ ޒަމާނީ ޓާމިނަލަކާއި އެއަރޕޯޓަށް ބޭނުންވާނެ އެހެނިހެން ވަސީލަތްތައް ޤާއިމުކުރެވިގެންދާނެއެވެ. އިކޮނޮމިކް މިނިސްޓްރީން މައުލޫމާތުދޭގޮތުގައި 2024 ގައި މިމަޝްރޫޢުގެ މަސައްކަތްތައް މުޅިން ނިމި، ބައިނަލްއަޤްވާމީ ފްލައިޓްތައް އޮޕަރޭޓް ކުރަން ފަށާނެއެވެ.
ރާއްޖޭގެ އެކި ހިސާބުތަކަށް ފަތުރުވެރިކަން ފުޅާކުރުމަށް ކުރަމުންދާ މަސައްކަތުގެ ތެރޭގައި ފަތުރުވެރިކަން ކުޑަކޮށް ތަރައްޤީވެފައިވާ އަތޮޅުތަކަށް ހާއްސަ އިސްކަމެއް ސަރުކާރުން ދެއްވައެވެ.
އެގޮތުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ށ. އަތޮޅަށް ކުރެއްވި ދަތުރުފުޅުގައި ނިލަންދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައިވެސްވަނީ ށ.އަތޮޅުގައި ސިނާޢީ މަސައްކަތްކުރަމުން އަންނަ ނަލަންދޫ އަނބުރާ ސަރުކާރަށް ނަގައި އެރަށް އެއަތޮޅުގައި ފަތުރުވެރިކަން ފުޅާކުރުމަށް ހުޅުވާލާ ރަށަކަށް ހެދުމަށް މަސައްކަތްކުރަމުންދާކަމަށް ވިދާޅުވެފައެވެ.
ރައީސުލްޖުމްހޫރިއްޔާ ވިދާޅުވީ އެތަނުގައި މިވަގުތު މަސައްކަތް ކުރަމުން އަންނަ ފަރާތުންވެސް އެތަނަށް އިންވެސްޓްމަންޓްތަކެއް ކޮށްފައި ހުންނާނެކަމަށެވެ. އެހެންކަމުން ސަރުކާރުގެ ވިސްނުމަކީ އެފަރާތަށްވެސް ގެއްލުން ނުވާނެ ގޮތަކަށް ބަދަލު ދިނުމަށްފަހު އެރަށް ފަތުރުވެރިކަން ކުރިއެރުވުމަށް ދިނުންކަމަށެވެ. އެގޮތުން މިހާރު އަގު ކަނޑައަޅާ ނިމިފައިވާއިރު ދެފަރާތުން މިކަމުގައި މަޝްވަރާކުރަމުންދާކަން ރައީސުލްޖުމްހޫރިއްޔާ ފާހަގަކުރެއްވިއެވެ. އަދި ނަލަންދޫގައި ފަތުރުވެރިކަން ކުރުމަށް ޝައުގުވެރިވާ އިންވެސްޓަރުންވެސް ތިބިކަން ރައީސްވަނީ ފާހަގަކުރައްވާފައެވެ. ރައީސް ވިދާޅުވީ އެމަނިކުފާނުގެ 5 އަހަރު ނިމިގެންދާއިރު އެރަށް އޮންނާނީ ފަތުރުވެރިކަމަށް ތައްޔާރުވެފައިކަމަށެވެ.
ށ. އަތޮޅުގައި މިހާރު އޮޕަރޭޓުކުރަމުންދަނީ 2 ރިސޯޓެވެ. އަދި ރިސޯޓު ތަރައްޤީކުރުމަށް 10 ރަށެއް ދޫކޮށްފައިވެއެވެ.