ބޭސްފަރުވާގެ ޚިދުމަތް ފޯރުކޮށްދޭ އަމިއްލަ ތަންތަނަށް އާސަންދައިން މިދިޔަ އަހަރުތެރޭ 1.1 ބިލިއަން ރުފިޔާ ޚަރަދުކޮށްފައިވާ ކަމަށް ތަފާސްހިސާބްތަކުން ދައްކައިފިއެވެ.
އާސަންދައިގެ މިދިޔަ 10 އަހަރުގެ ތަފާސްހިސާބުތައް ދައްކާގޮތުން، ބޭސްފަރުވާގެ ޚިދުމަތް ފޯރުކޮށްދޭ އަމިއްލަ ތަންތަނަށް އާސަންދައިން އެންމެ ގިނައިން ޚަރަދުކޮށްފައިވަނީ ނިމުނު 2022 ވަނަ އަހަރެވެ. އެގޮތުން އެ އަހަރު 1.1 ބިލިއަން ރުފިޔާ ޚަރަދުކޮށްފައިވާއިރު، 2021 ވަނަ އަހަރު 959 މިލިއަން ރުފިޔާ ޚަރަދުކޮށްފައިވެއެވެ. އަދި 2020 ވަނަ އަހަރު ޚަރަދުކޮށްފައިވަނީ 739 މިލިއަން ރުފިޔާއެވެ.
މިދިޔަ އަހަރުތެރޭ އާސަންދައިން އަމިއްލަ ތަންތަނަށް ކުރި ޚަރަދުގެ ތެރެއިން އެންމެ ބޮޑު ހޭދައެއްކޮށްފައިވަނީ ބޭސް ފިހާރަތަކަށެވެ. ދެވަނައަށް އެންމެ ބޮޑު ހޭދައެއްކޮށްފައި ވަނީ ހޮސްޕިޓަލްތަކަށެވެ.
2022 ވަނަ އަހަރު އާސަންދައިން އަމިއްލަ ތަންތަނަށް ކުރި ޚަރަދު:
■ ބޭސް ފިހާރަތައް – 593 މިލިއަން ރުފިޔާ
■ ހޮސްޕިޓަލްތަކަށް – 365 މިލިއަން ރުފިޔާ
■ ކްލިނިކްތަކަށް – 113 މިލިއަން ރުފިޔާ
■ ލޮލުގެ ފަރުވާދޭ ތަންތަނަށް – 38 މިލިއަން ރުފިޔާ
■ އާޓިފިޝަލް ގުނަވަންތަކަށް – 6 މިލިއަން ރުފިޔާ
ތަފާސްހިސާބުތައް ދައްކާގޮތުން މިދިޔަ 10 އަހަރުތެރޭ އާސަންދައިން އަމިއްލަ ބޭސްފަރުވާދޭ ތަންތަނަށް 6 ބިލިއަން ރުފިޔާ ޚަރަދުކޮށްފައެވެ. މީގެތެރެއިން އެންމެ ބޮޑު ޚަރަދެއްކޮށްފައިވަނީ ބޭސް ފިހާރަތަކަށެވެ.
10 އަހަރުތެރޭ އާސަންދައިން އަމިއްލަ ބޭސްފަރުވާދޭ ތަންތަނަށްކޮށްފައިވާ ޙަރަދު:
■ ބޭސް ފިހާރަތައް – 3.4 ބިލިއަން ރުފިޔާ
■ ހޮސްޕިޓަލްތަކަށް – 1.8 ބިލިއަން ރުފިޔާ
■ ކްލިނިކްތަކަށް – 616 މިލިއަން ރުފިޔާ
■ ލޮލުގެ ފަރުވާދޭ ތަންތަނަށް – 298 މިލިއަން ރުފިޔާ
■ އާޓިފިޝަލް ގުނަވަންތަކަށް – 60 މިލިއަން ރުފިޔާ
ބޭސްފަރުވާގެ ޚިދުމަތް ހޯދުމަށް ޢާއްމުން އެންމެ ބޮޑަށް ބަރޯސާވާ އެކައްޗަކީ ބޭސްފަރުވާއަށް ދޫކުރާ ޤައުމީ އިންޝުއަރެންސް ސްކީމް ނުވަތަ އާސަންދައެވެ. އެހެންނަމަވެސް އާސަންދައާއި ގުޅިގެން ޢާއްމުންގެ މެދުގައި ގިނަ ކަންބޮޑުވުންތަކެއް އެބަހުއްޓެވެ.
މިގޮތުން އަމިއްލަ ފަރާތްތަކުން ހިންގާ ހޮސްޕިޓަލްތަކާއި ކްލިނިކްތަކާއި، ސަރުކާރުގެ ޚިދުމަތް ދޭ ތަންތަނުގެ އަގުގައި ހުރި ފަރަޤުގެ ވާހަކަތަކަކީ އާންމުންގެ ޝަކުވާ ބޮޑުވެފައިވާ މައްސަލައެކެވެ. ހަމައެއާއެކު ޕްރައިވެޓް ހޮސްޕިޓަލުތަކުގައި ބޭސްފަރުވާއަށް، އާސަންދައިން ޚަރަދު ކެނޑުމަށްފަހުވެސް އަތުން ނަގަމުންދާ ފައިސާގެ ނިސްބަތް އަހަރުން އަހަރަށް އިތުރުވަމުންދިޔުމަކީ އާންމުންގެ ކަންބޮޑުވުމެކެވެ.
މިހުރިހާ ޝަކުވާއެއް އާންމުންގެ ފަރާތުން ކުރިމަތިވެފައިވާއިރު ދައުލަތުން އެންމެ ބޮޑު ހޭދައެއް ކުރާ އެއް ދާއިރާއަކީ ބޭސްފަރުވާއަށް އާސަންދައަށް ދޫކުރާ ބަޖެޓެވެ. ގިނަ އަހަރުތަކުގައި ބަޖެޓުގެ ބޭރުން އިތުރު ގޮތްގޮތުން ފައިސާ ހަމަޖައްސައިގެންވެސް ބޭސްފަރުވާއަށް އާންމުން ބޭރަށް ފޮނުވާކަމަށް އާސަންދައިން ވިދާޅުވެއެވެ.
ދެކޮޅު ނުޖެހޭކަމަށް ގިނަ ބަޔަކު ބުނަމުންދާ މި ނިޒާމު މުރާޖާކުރުމަށް ސަރުކާރުންވަނީ ނިންމަވާފައެވެ. މިގޮތުން އާސަންދަ މުރާޖާކުރުމުގެ ބޮޑު މަސައްކަތްތަކެއް މިއަހަރުގެ ބަޖެޓުގައި ހިމަނައިގެން ކުރުމަށްވަނީ ނިންމާފައެވެ.
ސަރުކާރުން ވަނީ ޞިއްޙީ ދާއިރާގެ ތަރައްޤީގެ މަސައްކަތްތައް އެކި ފިޔަވަހިތަކަކަށް ބަހާލައިގެން ކުރިއަށްގެންދިޔުމަށް ނިންމަވާފައެވެ. މިގޮތުން އާސަންދަ ރީފޯމްކުރުމުގެ އިތުރުން މިއަހަރުގެ ތެރޭގައި ޞިއްޙީ ދާއިރާގެ މުވައްޒަފުންގެ މުސާރައަށް ހެޔޮ ބަދަލެއް އަންނާނެކަން ސަރުކާރުން ވަނީ މީގެކުރިން ޢިއުލާންކުރައްވާފައެވެ.