މޯލްޑިވިއަނުން އިންޑިއާގެ ތްރިވަނަންތަޕޫރަމަށް ކުރާ ދަތުރުތަކަށް 15 އަހަރު ފުރުން ފާހަގަކޮށްފިއެވެ.
ޤައުމީ އެއަރލައިން މޯލްޑިވިއަނުން ވަނީ މިދުވަހާއި ގުޅުވައިގެން ކޭކް ފެޅުމާއި، އެއަރލައިންގައި ތްރިވަނަންތަޕޫރަމަށް ދަތުރުކުރި ފްލައިޓްގައި ތިބި ކުޑަ ކުދިންނަށް ހަދިޔާ ބަހާފައެވެ.
ރާއްޖޭގެ ޤައުމީ އެއަރލައިން، މޯލްޑިވިއަނުން އިންޑިއާގެ ތްރިވަނަންތަޕޫރަމަށް ދަތުރުތައް ފަށާފައިވަނީ 2008 ވަނަ އަހަރުގެ ޖެނުއަރީމަހުގެ 25 ވަނަ ދުވަހުއެވެ. ތްރިވަނަންތަޕޫރަމަކީ މޯލްޑިވިއަނުން ބައިނަލްއަޤްވާމީ ދަތުރުތައް ކުރަން ފެށި ފުރަތަމަ މަންޒިލެވެ. އިންޑިއާގެ ތްރިވަނަންތަޕޫރަމް ނުވަތަ ޓްރިވެންޑުރަމަކީ އެކި ބޭނުންތަކަށް ގިނަ ޢަދަދެއްގެ ދިވެހިން ދަތުރުކުރާ، އަދި ދިރިއުޅެމުންދާވެސް ތަނެކެވެ.
މޯލްޑިވިއަން ހިންގާ ކުންފުނި އައިލެންޑް އޭވިއޭޝަނުން ވަނީ ފާއިތުވެދިޔަ 15 އަހަރު ދުވަހުގެ ތެރޭގައި ތްރިވަނަންތަޕޫރަމަށް ކުރާ ދަތުރުތައް ފުޅާކޮށް ބޮޑެތި ކުރިއެރުންތަކެއް ހޯދާފައެވެ.
އައިލެންޑް އޭވިއޭޝަނުން އެންމެ ފުރަތަމަ ތްރިވަނަންތަޕޫރަމަށް ކުރި ދަތުރުތަކުގައި ބޭނުންކޮށްފައިވަނީ، 50 މީހުންގެ ޖާގައިގެ ޑޭޝް8 މަރުކާގެ މަތިންދާބޯޓެވެ. އަދި އޭރު ކުރަމުން އައީ ހަފްތާއަކު އެންމެ ދަތުރެކެވެ. އެހެން ނަމަވެސް މިހާރު ހަފްތާއަކު 3 ފްލައިޓަށް އިތުރުވެފައިވާއިރު، ދަތުރުތައް ކުރުމަށް ބޭނުންކުރަމުންދަނީ އެއަރބަސް A320 މަރުކައިގެ ބޯޓެވެ.
Inflght celebrations of 15 years of our operations to Trivandrum. pic.twitter.com/V0jUuF4XsJ
— MaldivianAero (@MaldivianAero) January 26, 2023
އައިލެންޑް އެވިއޭޝަނުންދަނީ ހދ. ހަނިމާދޫ އިންޓަރނޭޝަނަލް އެއާޕޯޓުންވެސް ތްރިވަނަންތަޕޫރަމަށް ޝެޑިއުލް ދަތުރުތައް ބާއްވަމުންނެވެ. އެގޮތުން ހަނިމާދޫ އެއަރޕޯޓުން ހަފްތާއަކު ދެ ދަތުރު ކުރާއިރު މި ދަތުރުތައް ކުރަމުން އަންނަނީ ކޮންމެ ހަފްތާއެއްގެވެސް އާދީއްތަ އަދި ބުރާސްފަތި ދުވަހުއެވެ.
އައިލެންޑް އޭވިއޭޝަނަކީ ސައްތައިން ސައްތަ ދިވެހި ސަރުކާރު ހިއްސާވާ ކުންފުންޏެކެވެ. ދިވެހި ރައްޔިތުންނަށް ލުއިފަސޭހަ ގޮތެއްގައި ވައިގެ ދަތުރު ކުރެވޭނޭމަގު ފަހިކޮށްދިނުމަށް ސަރުކާރުން އުފެއްދެވި މި ކުންފުނިން ގެންދަނީ، އެ އެއަރލައިނުން ދިވެހިންނަށް ދެމުން އަންނަ ޚިދުމަތްތަކުގެ ފެންވަރު ރަނގަޅުކޮށް، ވިޔަފާރި ފުޅާކުރުމަށް އިތުރު އިންވެސްޓްމަންޓްތައް ކުރަމުންނެވެ.
އެގޮތުން މޯލްޑިވިއަނުން ދާދިފަހުން ވަނީ އެތެރޭގެ އުދުހުންތަކަށް ޚާއްސަކޮށްގެން އޭޓީއާރު 72 މަރުކާގެ 2 ބޯޓު ގެނެސްފައެވެ. މި ދެ ބޯޓަކީ ޒަމާނީ ވަސީލަތްތައް ހިމެނޭ، ތެޔޮ ޚަރަދު ކުޑަ އަދި މަރާމާތުގެ ޚަރަދުވެސް ކުޑަ ދެ ބޯޓެވެ. މިބޯޓުތަކާއެކު މޯލްޑިވިއަނުން ދޭ ޚިދުމަތްތައް އިތުރަށް ހަރުދަނާ ވެގެންދާނެކަމަށް އެކުންފުނިން ވިދާޅުވެއެވެ.
މި ދެ ބޯޓުގެ އިތުރުން، އެތެރޭގެ އުދުހުންތަކަށް އިތުރު އެއް ބޯޓު ގެނައުމަށް ވަނީ ހަމަޖެހިފައިއެވެ. އެއީ އޭޓީއާރު 42 މަރުކާގެ 50 މީހުންގެ ޖާގައިގެ ބޯޓެކެވެ. މީގެއިތުރުން މޯލްޑިވިއަނުން ވަނީ ބައިނަލްއަޤްވާމީ ދަތުރުތަކުގައި ބޭނުންކުރާ އެއަރބަސްގެ ބޯޓެއް ހޯދުމަށްވެސް މިފަހުން އިޢުލާންކޮށްފައެވެ.