މިދައުރުގެ ތެރޭގައި ފަތުރުވެރިކަމުގެ ދާއިރާއަށް 16758 އެނދު އިތުރު ކުރެވިފައިވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެެ.
މިއަހަރަށް ރައްޔިތުންގެ މަޖްލިސް ހުޅުވުމަށް ބޭއްވި ޖަލްސާގައި، ރިޔާސީ ބަޔާން އިއްވަވަމުން ރައީސް އިބްރާހީމް މުޙައްމަދު ޞާލިޙު ވިދާޅުވީ ރާއްޖޭގެ އުތުރާ ދެކުނަށް ފަތުރުވެރިކަން ފުޅާކުރުމުގެ މަޝްރޫޢު ފެށެނީ އައްޑޫއާ ހަނިމާދޫގެ އިންޓަރނޭޝަނަލް އެއަރޕޯޓުންކަމަށެވެ.
އެ އަރޕޯޓްތައް ނިމެމުންދާއިރު، އެ ސަރަހައްދަށް ބޭނުންވާ އެނދު އިތުރު ކުރުމުގެ މަސައްކަތްވެސް ފަށާފައިވާކަމަށް ރައީސް ވިދާޅުވިއެވެ.
"އައްޑޫ ހަންކެޑެ އިންޓަރގްރޭޓަޑް ޓޫރިޒަމް ޑިވެލޮޕްމަންޓް މަޝްރޫޢާ، އައްޑޫގާ ތަރައްޤީކުރެވޭ 5 ރިޒޯޓަކީ މިދެންނެވި މަސައްކަތް، ހަމައެގޮތަށް އުތުރުން ބީލަމަށް ހުޅުވާލެވިފައިވާ ރަށްތަކަކީ ހަނިމާދޫ އެއަރޕޯރޓާ ގުޅިފައިވާ ރިޒޯޓްތައް" ރައީސް ވިދާޅުވިއެވެ.
ކުދި ވިޔަފާރިއާއި މެދު ފަންތީގެ ވިޔަފާރިތައް ކުރިއެރުވުމަކީ މި ސަރުކާރުން ވަރަށް ބޮޑު އިސްކަމެއް ދެއްވައިގެން ކުރައްވަމުން ގެންދަވާ މަސައްކަތެކެވެ. އެގޮތުން މި ސަރުކާރުން މިފަދަ ވިޔަފާރިތަކަށް ފަސޭހައިން ލޯނު ލިބޭނެ މަގު ފަހިކޮށްދެއްވުމަށް ވަކިން ޙާއްސަ ބޭންކެއް ވަނީ ހުޅުވާފައެވެ.
އެސްއެމްއީ ބޭންކުގެ ނަމުގައި ހުޅުވާފައިވާ މި ބޭންކުން ދަނީ ކުދި ވިޔަފާރިތަކަށް ބޭނުންވާ މާލީ އެހީތެރިކަން ފޯރުކޮށްދެމުންނެވެ. ރާއްޖޭގެ އުތުރާއި ދެކުނުގެ ސަރަހައްދުގާ ކުދި ވިޔަފާރިވެރިން އުފައްދާ ކޮޅަށް ޖެހުމަށް އެ ބޭންކުން މިހާރު ދަނީ ތައްޔާރުވަމުންނެވެ. އެގޮތުން ރައީސް ޞާލިޙު ވިދާޅުވީ އެސްއެމްއީ ބޭންކުން ކުރިއަށް އޮތްތަނުގާ ރާއްޖޭގެ އުތުރާއި ދެކުނުގެ ސަރަހައްދުގާ ކުދި ވިޔަފާރިވެރިން އުފައްދާ ކޮޅަށްޖެހުމަށް، ގެސްޓް ހައުސްތަކާ، ސިޓީ ހޮޓާތަކުން އެސަރަހައްދުގެ ރައްޔިތުންނަށް އިތުރު ތަނަވަސްކަމާ ފަހި ފުރުޞަތު ހޯދައިދިނުމަށް ހާއްސަ މަސައްކަތްތަކެއް ކުރާނެ ކަމަށެވެ.
ވޭތުވެދިޔަ އަހަރަކީ ރާއްޖޭގެ ފަތުރުވެރިކަމަށް ފާގަތި އަހަރެކެވެ. މިދިޔަ އަހަރު ސަރުކާރުން އަމާޒު ހިފީ 1.6 މިލިއަން ފަތުރުވެރިން ރާއްޖެ ގެނައުމަށެވެ. މި އަމާޒް މިދިޔަ އަހަރު ހާސިލްކޮށްފައިވާއިރު، މިއަހަރު 1.8 މިލިއަން ފަތުރުވެރިން ރާއްޖެއަށް ޒިޔާރަތް ކުރުމަކީ ސަރުކާރުގެ އަމާޒެކެވެ.
މިދިޔަ މަހުގެ ނިޔަލަށް 172,536 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތާ އަޅާ ބަލާއިރު 31 އިންސައްތައިގެ ކުރިއެރުމެކެވެ.