އަންނަމަހުގެ ތެރޭގައި ހުޅުވުމަށް ތައްޔާރުވަމުންދާ ގދ. ފަރެސްމާތޮޑާ އެއަރޕޯޓަށް ބޭނުންވާ މުވައްޒަފުން ހޯދުމަށް އިޢުލާންކޮށްފިއެވެ.
ފަރެސްމާތޮޑާ އެއަރޕޯޓަށް ރީޖަނަލް އެއަރޕޯޓްސްއިންކޮށްފައިވާ އިޢުލާނުގައި 15 ވަޒީފާއަކަށް ޖުމްލަ 45 މުވައްޒަފުން ހޯދުމަށް ވަނީ އިއުލާންކޮށްފައެވެ.
ހުޅުވާލާފައި ވަޒީފާގެ ފުރުސަތުތަކުގެ ތެރޭގައި، އެއަރޕޯޓު މެނޭޖަރ، އޮޕަރޭޝަންސް އޮފިސަރ، އެޑްމިން މުވައްޒަފުން، އެއަރޕޯޓު ސާފުކުރުމާއި ބަގީޗާތައް ބެލެހެއްޓުމުގެ މަސައްކަތް، ސިކިއުރިޓީ އެޖެންޓުން، ފަޔަރފައިޓަރުން ހިމެނެއެވެ.
ސަރުކާރުން ވަނީ އަންނަމަހުގެ 15 ވަނަ ދުވަހު ގދ. ފަރެސްމާތޮޑާ އެއަރޕޯޓު ހުޅުވުމަށް ނިންމާފައެެވެ. ފަރެސްމާތޮޑާ އެއަރޕޯޓް ތަރައްޤީކޮށްފައިވަނީ ރާއްޖޭގައި ޑޮމެސްޓިކް ގިނަ އެއަރޕޯޓްތައް މިހާރު ތަރައްޤީކުރަމުން އަންނަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމް.ޓީ.ސީ.ސީންނެވެ.
އެތެރޭގެ އުދުހުންތަކަށް ޚާއްސަކޮށްގެން ތަރައްޤީކުރި މި އެއަރޕޯޓުގެ ޢިމާރާތްތަކާއި ބޮޑެތި ހުރިހާ މަސައްކަތްތައް ނިމި، އެއަރޕޯޓްގައި މިހާރު ކުރަމުންދަނީ އޮޕަރޭޝަނަށް ގެނައުމަށްޓަކާ ކުރަންޖެހޭ އެންމެފަހުގެ މަސައްކަތްތަކެވެ.
މި އެއަރޕޯޓް ހުޅުވާއިރުވެސް، ރޭގަނޑު އެއަރޕޯޓަށް ފްލައިޓް ޖެއްސޭނެ ވަސީލަތްތައް ޤާއިމުކޮށް ފުރިހަމަވެފައި ހުންނާނެއެވެ. އެއަރޕޯޓުގެ މަސައްކަތްތައް މިހާރު މުޅިން ނިމިފައިވާއިރު، ޓެސްޓް ފްލައިޓް ޖެއްސުމަށްޓަކައި ކުރަންޖެހޭ މަސައްކަތްތައްވެސް އަންނަނީ ކުރަމުންނެވެ.
ފަރެސްމާތޮޑާ އެއަރޕޯޓްގައި ޤާއިމުކޮށްފައިވަނީ 1200 މީޓަރު ދިގު ރަންވޭއެކެވެ. މި މަޝްރޫޢުގެ ދަށުން ރަންވޭގެ އިތުރަށް ޓެކްސީވޭއަކާއި، އޭޕްރަންއަކާއި، ފަޔަރ ޕެޑް އަދި ފަޔަރ ރޯޑެއް ޤާއިމުކުރުމާއި، ފަޔަރ ބިލްޑިން އިމާރާތް ވަނީ ތަރައްޤީކޮށްފައެވެ.
144.8 މިލިއަން ރުފިޔާ ޚަރަދުކޮށްގެން ހިންގާ މި މަޝްރޫޢުގެ ދަށުން އެއަރޕޯޓާއި ފަރެސްމާތޮޑާ ގުޅާލާ ކޯޒްވޭގެ މަސައްކަތްތައްވެސް މިހާރު ވަނީ ފަށާފައެވެ. މިއާއެކު އެއަރޕޯޓް ކޯޒްވޭއާއި، ކޯޒްވޭއާއި ގުޅޭ މަގުތައްވެސް ހަދާނެއެވެ.
ފަރެސްމާތޮޑާ އެއަރޕޯޓް ތަރައްޤީކޮށްފައިވަނީ އެ ރަށު ފަޅުތެރޭ އޮތް ކުދި ރަށްތަށް ހިއްކައިގެންނެވެ. އެއަރޕޯޓްގެ ޢަމަލީ މަސައްކަތްތައް ފެށީ 2021 ވަނަ އަހަރުގެ ކުރީކޮޅުއެވެ. މި މަޝްރޫޢުގެ ސަބަބުން ދެކުނުގެ ދަތުރުފަތުރުގެ ނިޒާމަށް އިތުރު ކުރިއެރުންތަކެއް ލިބި، ވިޔަފާރިއާއި އިޤްތިޞާދީ ހަރަކާތްތައް އިތުރަށް ފުޅާކުރުމަށާއި، ވަޒީފާގެ އިތުރު ފުރުޞަތުތައް ފަހިވެގެންދާނެކަމަށް ސަރުކާރުން ވިދާޅުވެއެވެ.