ޓޫރިޒަމް ޓްރެއިނިން ރިސޯޓެއްގެ ގޮތުގައި ތަރައްގީ ކުރުމަށް ދޫކޮށްފައިވާ ލ. ބޮޑުފިނޮޅުގެ އެއްބަސްވުން ބާޠިލުކުރުމަށް މަސައްކަތްކުރަމުންދާކަމަށް ޓޫރިޒަމް މިނިސްޓަރު ޑރ.ޢަބްދުﷲ މައުސޫމް ވިދާޅުވެއްޖެއެވެ. ލ.ބޮޑުފިނޮޅާއި ލ.ގަމު ތުނޑީ އަވަށުގެ ބޮޑު ސަރަޙައްދެއް 2008ވަނަ އަހަރު އަމިއްލަ ފަރާތްތަކާ ޙަވާލުކޮށްފައިވަނީ ޓްރެއިނިންގ ރިސޯޓެއް ތަރައްޤީކުރުމަށެވެ. އެ މަސައްކަތް ހަވާލުކުރިތާ 13 އަހަރު ފާއިތުވީއިރުވެސް، މި މަސައްކަތުގެ އޢަމަލީ މަސައްކަތެއް ފަށާފައެއް ނުވެއެވެ.
ލ. ބޮޑުފިނޮޅުގެ ގުޅޭ ގޮތުން ގަމު ދާއިރާގެ މެމްބަރު މުހައްމަދު ވިޝާމް ރައްޔިތުންގެ މަޖިލީހުގެ ޖަލްސާގައި ސުވާލު ކުރެއްވުމުން ޓޫރިޒަމް މިނިސްޓަރ ޑރ.ޢަބްދުﷲ މައުސޫމް ވިދާޅުވީ، ޕްރިމިއާ އެކިއުޓީ ޕްރައިވެޓް ލިމިޓެޑަށް ދިން، ބޮޑުފިނޮޅު ތަރައްގީ ކުރުމުގެ މަޝްރޫޢު ހުއްޓިފައި އޮތުމަކީ ކަންބޮޑުވާ ކަމެއް ކަމަށެވެ. އަދި މިކަމާއި ގުޅޭގޮތުން ގިނަ މަޝްވަރާތަކެއް ކުރެވިފައިވާވީނަމަވެސް ކުރިއެރުމެއް ލިބިފައިނުވާކަމަށް މިނިސްޓަރ ވިދާޅުވިއެވެ. އަދި ލ. އަތޮޅުގެ މަޖިލިސް މެންބަރުންނާއި، ކައުންސިލް މެންބަރުން އަދި އެ އަތޮޅު ކައުންސިލުންވެސް ޕްރިމިއާ އެކްޓިވިޓީ ޕްރައިވެޓް ލިމިޓެޑަށް ބޮޑުފިނޮޅު ތަރައްގީ ކުރެވޭނެ ކަމަށް ގަބޫލު ނުކުރާކަމަށް މިނިސްޓަރ ވިދާޅުވިއެވެ.
"މި މައްސަލައަށް އަވަސް ހައްލެއް ހޯދުމަށްޓަކައި ކޯޓުން ބޭރުގައިދަނީ މަޝްވަރާތައް ކުރެވެމުން، އެހެންނަމަވެސް ޕްރީމިއާ އެކިއުޓީ ހުށަހަޅާ އަގާއި، ސަރުކާރުން ހުށަހެޅުމާއި ދެފަރާތުން އެއްބަސްވުން ނުވެވޭތީ މި މައްސަލަ ކޯޓުން ބޭރުން ކާމިޔާބު ކުރެވުމާއި މެދު މިހާރުވަނީ ސުވާލު އެފެދިފައި،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އެއްބަސްވުން ބާޠިލްކުރުމަށްޓަކައި ބަދަލުގެ ގޮތުގައި ބޮޑު ޢަދަދެއް ދައުލަތުން ދައްކަން ޖެހޭކަމަށެވެ. ނަމަވެސް މަސައްކަތް ކުރިއަށް ނުދާތީ އެ ފިޔަވަޅުވެސް އަޅަން ޖެހޭކަމަށް މިނިސްޓަރ ވިދާޅުވިއެވެ.
"މަޝްވަރާތަކުގައި ތާށިވެފައި މިތިބީ، ދެން އޮތީ އެތަން ވަކި ކުރާނީތޯ، އެކުންފުނިން ދައުލަތަށް ދައްކާފައިވާ 2.7 މިލިއަން ޑޮލަރުގެ ބަދަލާއި، މި ބަދަލުތައް ދޭނެ ގޮތަކާއި މެދު ވިސްނަން ޖެހޭ، ތަނެއް ވަކި ކުރަން ޖެހިއްޖެޔާ އެކަން ކުރަންޖެހޭ، އެހެންނަމަވެސް އެތަނުގެ އެއްވެސް މަސައްކަތެއް ކުރިއަށް ނުދޭ، އެހެންވީމަ ބަދަލެއް ދީފައިވެސް އެބަ ޖެހޭ އެތަން ވަކި ކުރަން،" މިނިސްޓަރ ވިދާޅުވިއެވެ.
ޓޫރިޒަމް ޓްރެއިނިން ރިސޯޓުގެ މަސައްކަތް ހުއްޓިފައިވާތީ އެކަމުގެ ކަންބޮޑުވުމާއެކު މިނިސްޓަރ ވަނީ، ރާއްޖޭގައި ފަތުރުވެރިކަމުގެ ސިނާޢަތް އިތުރަށް ކުރިއެރުވުމަށް ރާއްޖޭގައި ބައިނަލްއަޤްވާމީ ޔުނިވަރސިޓީ ނުވަތަ ކޮލެޖު ހުރުން މުހިއްމުކަން ފާހަގަކުރައްވާފައެވެ. މީގެ އިތުރުން ލ.ކައްދޫ އެއަރޕޯޓު ފުރިހަމަ ބައިނަލްއަޤްވާމީ އެއަރޕޯޓަކަށް ބަދަލުވެގެންދާއިރު، އެސަރަޙައްދަށް ފަތުރުވެރިކަމުގެ އެނދު ބޭނުންވާކަމަށްވެސް މިނިސްޓަރ ވިދާޅުވިއެވެ.
ޓޫރިޒަމް މިނިސްޓަރ ވިދާޅުވީ، ނުހެދި ހުރި ރަށްތަކުގެ އެއްބަސްވުންތައް ބާތިލްކުރުމަކީވެސް ފަސޭހަކެމެއް ނޫން ކަމަށެވެ. އަދި އެފަދަ ޙާލަތްތަކުގައި ކޯޓަށް ގޮސްގެން ދައުލަތުން ބޮޑެތި ބަދަލުތައް ދައްކަން ޖެހިފައި ހުރި ކަމަށާއި، މިކަމަށް ހައްލެއް ގެނައުމަށް ރިސޯޓު އެއްބަސްވުންތަކުގައި ލިކިއުޑޭޓު ޑެމޭޖަސް ހިމަނައި، ދައުލަތަށް ރިސޯޓު ނުހެދި ހުރުމުން ލިބޭ ގެއްލުމުގެ ބަދަލު ހޯދޭނެ ގޮތްތެއް ހަދަން ޖެހިފައިވާ ކަމަށްވެސް ޓޫރިޒަމް މިނިސްޓަރ ޑރ.ޢަބްދުﷲ މައުސޫމް ވިދާޅުވިއެވެ.