ރިސޯޓު ތަރައްޤީކުރަން ދޫކޮށްފައިވާ ރަށްތަކުގެތެރެއިން އެކި ސަބަބުތަކާއި ގުޅިގެން ނުހެދި ހުރި 15 ރަށެއްގެ މުއާމަލާތް ކުރިއަށްދާކަމަށް ޓޫރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެއެވެ. ޓޫރިޒަމް މިނިސްޓަރ މިހެން ވިދާޅުވީ، ވެލިދޫ ދާއިރާގެ މެމްބަރު މުޙައްމަދު އަބްދުﷲ ޝަފީޤު ކުރެއްވި ސުވާލަކަށް ޖަވާބުދެއްވަމުންނެވެ.
ޓޫރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވީ ރިސޯޓު ތަރައްޤީކުރުމަށް ދޫކޮށްފައިވާ ރަށްތައް ނުހެދި ގިނަ އަހަރުތަކެއް ވެގެންދިޔުމަކީ އޭގެ ސަބަބަބުން ގިނަ ގެއްލުންތަކެއް އޮތްކަމެއް ކަމަށެވެ. ރާއްޖޭގައި ރިސޯޓް ތަރައްޤީކުރުމަށް ދޫކުރި ރަށްތަކުގެ ތެރެއިން 83ގެ މަސައްކަތް ކުރިއަށް ނުގޮސް ވަނީ ހުއްޓިފައެވެ. މިކަމާއި ގުޅިގެން ޓޫރިޒަމް ސިޏާއަތުގައި ހަރަކާތްތެރިވާ ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.
މަޖިލީހުގައި ވާހަކަފުޅު ދައްކަވަމުން ޓޫރިޒަމް މިނިސްޓަރ ވަނީ އެ ރަށްތަކުގެ ތެރެއިން 15 ރަށެއްގެ މުއާމަލާތް ކުރިއަށްދާކަން ފާހަގަކުރައްވާފައެވެ. އަދި އިންވެސްޓަރުންނަށް ފަހި މާހައުލެއް ހޯދައިދިނުމަށް ކުރެވެމުންދާ މަސައްކަތްތައްވެސް މިނިސްޓަރ ވަނީ ތަފްސީލްކޮށްދެއްވާފައެވެ.
"މަޖިލީހުން ކުރި މަސައްކަތްތަކާއި އެކު ޖޫރިމަނާ މާފްކޮށްދިނުމާއި، ކުލި ކުޑަކޮށްދިނުން ފަދަ ކަންތައްތައްވަނީކޮށްދެވިފައި، ތަފްސީލްތައް ނުދެވުނު ނަމަވެސް، 15ވަރަކަށް ރަށާއެކު މަސައްކަތައް އެބަދޭ ކުރިއަށް އެއީ އެރަށް ވިޔަފާރީގެ ގޮތުން ކޮނޑުޖަހާލެވޭ އެއްޗަކަށް ބަދަލުވެއްޖެ، މިގެންނަ ބަދަލުތަކުން، މިއީ ވަރަށް ބޮޑު ކުރިއެރުމެއް،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ނުހެދި ހުރި ރަށްތަކަށް ހައްލެއް ނުހޯދާ ގިނަ ދުވަސްވެގެން ދިޔުމަކީ މާލީ ބޮޑެތި ގެއްލުންތަކެއް އިންވެސްޓަރުންނަށްވެސް ލިބޭނެ ކަމެއް ކަމަށެވެ. އެހެންކަމުން ޓޫރިޒަމް މިނިސްޓްރީ އާއި ގުޅިގެން މިކަމަށް ހައްލު ހޯދުމަށް މިނިސްޓަރ ވަނީ ގޮވާލައްވާފައެވެ.
އަދި މިނިސްޓަރ ވިދާޅުވީ ރިސޯޓުތައް ތަރައްޤީކުރުމަށް ބޭނުންވާ ސާމާނު އެންމެ ގިނައިން ރާއްޖެއަށް ގެންނަނީ ޗައިނާއިން ކަމަށާއި، މިހާރު ވިޔަފާރިއަށް ޗައިނާ އެއްކޮށް ހުޅުވާލެވިފައިވާއިރު ރާއްޖޭގެ ރިސޯޓުތައް ތަރައްޤީކުރުމުގެ މަސައްކަތްތަކުގެ ދުވެލިވެސް ބާރުވެގެންދާނެ ކަމަށް ޤަބޫލުކުރައްވާކަމަށެވެ.
ރިސޯޓްތައް ތަރައްޤީކުރުމަކީ ރަށްތަކަށްވެސް ބޮޑެތި ފައިދާތަކެއް ލިބިގެންދާނެކަމެކެވެ. އެގޮތުން އިޤްތިޞާދީގޮތުން ފައިދާ ލިބިގެންދާއިރު އިތުރު ވަޒީފާގެ ފުރުސަތުވެސް ފަހިވެގެންދެއެވެ. ނަމަވެސް ރިސޯޓް ތަރައްޤީކުރަން ދޫކުރި ރަށްރަށް ތަރައްޤީނުކުރެވި ތާށިވެފައި ހުރުމަކީ މީގެ ސަބަބުން ރާއްޖޭގެ އިޤްތިޞާދަށްވެސް އަދި އެ ރަށެއް ހިމެނޭ ސަރަހައްދަށްވެސް އޭގެ ސަބަބުން ގެއްލުންތަކެއް ލިބިގެންދާކަމެކެވެ.
މިނިސްޓަރ ވަނީ ސަރުކާރުން ހަމަޖައްސައިދޭ ލުއިތަކާއި ކުރެވުނު މަސައްކަތްތަކުގެ ދަށުން، ތަރައްޤީނުކުރެވިހުރި ރަށްތަކުގެ ތެރެއިން 7 ރަށެއް 2021 ވަނަ އަހަރު ހުޅުވުނުކަމަށްވެސް ވިދާޅުވެފައެވެ.