އެގްރޯނެޓުގެ ކޮންޓްރެކްޓް ފާމިންގ މަޝްރޫޢުގައި މިހާތަނަށް 738 ދަނޑުވެރިން ބައިވެރިވެފައިވާ ކަމަށް އެކުންފުނިން ހާމަކޮށްފިއެވެ.
އެގްރޯނެޓަކީ ރާއްޖޭގެ ދަނޑުވެރިކަން ކުރިއެރުވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހްގެ ސަރުކާރުން އުފައްދާފައިވާ ކުންފުންޏެވެ. މިކުންފުނި އުފެއްދީ 2020 ވަނަ އަހަރުގެ އޭޕްރީލްމަހުގެ ތެރޭގައެވެ. ރާއްޖޭގެ ދަނޑުވެރިކަން ފުޅާކޮށް ދަނޑުވެރިންނަށް ހަމައަގު ހޯދައިދިނުމަށްޓަކައި އެގްރޯނެޓުން އަންނަނީ ގިނަ މަސައްކަތްތަކެއް ކުރަމުންނެވެ.
އެގްރޯނެޓުން ވިދާޅުވީ، ކޮންޓްރެކްޓް ފާމިންގ މަޝްރޫޢުގައި ބައިވެރިވާ މީހުންގެ ޢަދަދު ވަރަަށް ބޮޑުތަނުން އިތުރުވެފައިވާ ކަމަށެވެ. އެގޮތުން މިހާތަނަށް 738 ދަނޑުވެރިއަކާ އެކު އެއްބަސްވުމުގައި ސޮއިކޮށްފައި ވާއިރު، އޭގެތެރޭގައި އަންހެނުން ޙިއްސާވާ ނިސްބަތް އިތުރުވަމުންދާކަން އެކުންފުނިން ފާހަގަކުރެއެވެ.
ކޮންޓްރެކްޓް ފާމިންގ މަޝްރޫޢުގައި ބައިވެރިވާ މީހުންގެ ޢަދަދު ވަރަަށް ބޮޑުތަނުން އިތުރުވެއްޖެއެވެ. އެގޮތުން މިހާތަނަށް 738 ދަނޑުވެރިއަކާ އެކު އެއްބަސްވުމުގައި ސޮއި ކުރެވިފައި ވާއިރު، އޭގެތެރޭގައި އަންހެނުން ޙިއްސާވާ ނިސްބަތް އިތުރުވަމުންދާކަމީ ވަރަަށް ބޮޑަށް އުފާކުރާކަމެކެވެ. pic.twitter.com/s6fPeMKar2
— AgroNat (@agronationalmv) February 16, 2023
މިއަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވަނީ މިއަހަރު ނިމުމުގެ ކުރިން މުޅި ޖުމްލަ 750 ދަނޑުވެރިންގެ ތަކެތި އެގްރޯނެޓުން ގަންނަމުން ދާނެކަމަށް ވިދާޅުވެފައެވެ.
ރައީސުލްޖުމްހުރިއްޔާ ވިދާޅުވީ، ރާއްޖޭގެ ދަނޑުވެރިންގެ އުފެއްދުންތައް މާކެޓް ކުރުމަކީ މުހިންމު ކަމެއްކަމަށެވެ. ދަނޑުވެރިންކުރާ މަސައްކަތްތައް އާމްދަނީ ލިބޭނެ ގޮތަކަށް ބަދަލުކުރުމަކީ މިހާތަނަށް ދަނޑުވެރިކަމުގެ ސިނާއަތަށް ދިމާވެފައި އޮތް އެންމެ ބޮޑު އެއް ގޮންޖެހުންކަމަށް ރައީސް ވަނީ ވިދާޅުވެފައެވެ. އެގްރޯނެޓަކީ ދަނޑުވެރިންގެ މި ގޮންޖެހުމަށް ހައްލެއް ހޯދައިދިނުމަށް ސަރުކާރުން ކޮށި މަގެއްކަމަށް ރައީސް ވަނީ ފާހަގަކުރައްވާފައެވެ.
އެގްރޯނެޓުން މިހާރު އަންނަނީ ރާއްޖޭގެ 9 ސަރަހައްދެއްގައި ޑިސްޓްރިބިއުޝަން ސެންޓަރުތައް އެޅުމުގެ މަސައްކަތްވެސް ކުރަމުންނެވެ. މީގެއިތުރުން އެ ކުންފުންޏާއި ގުޅިގެން ދަނޑުވެރިކަން ކުރަމުން އަންނަ ދަނޑުވެރިންނަށް ދަނޑުވެރިކަމުގެ އާލާތައް ގަތުމަށް ސްޓާޓްއަޕް ޕެކޭޖްވެސް އަންނަނީ ދޫކުރަމުންނެވެ.
މީގެއިތުރުން އެކުންފުނިން ދާދިފަހުންވަނީ، ކުންފުންޏާއި ގުޅިގެން މަސައްކަތް ކުރަމުން އަންނަ ދަނޑުވެރިންގެ ބާވަތްތައް ތާޒާކަމާއިއެކު އެއްތަނުން އަނެއްތަނަށް އުފުލުމަށް ބޯޓުތަކެއް ބަނުމުގެ މަސައްކަތް ފަށާފައެވެ. އަދި މިހާރު މިވަނީ އެ ބޯޓުތަކުގެ ޑިޒައިން ދައްކާލާފައެވެ. އެގްރޯނެޓުން ބަންނަނީ 65 ފޫޓުގެ ފައިބަރގްލާސް 2 އުޅަނދެވެ.