ރާއްޖޭގެ ތާރީޚުގައި މާލޭ ސަރަޙައްދުން ބޭރުގައި ހިންގާ އެންމެ ބޮޑު ތަރައްޤީގެ މަޝްރޫޢަކީ ހަނިމާދޫ އިންޓަރނޭޝަނަލް އެއަރޕޯޓު ޒަމާނީ ފެންވަރަށް ތަރައްޤީކުރުމުގެ މަސައްކަތެވެ.
މި މަޝްރޫޢުގެ އަމަލީ މަސައްކަތްވަނީ މިދިޔަ މަހުގެ 18ވަނަ ދުވަހު ފަށާފައެވެ. އަދި މިހާރު މަސައްކަތްތައްދަނީ ތާވަލާއި އެއްގޮތަށް ކުރިއަށެވެ. އެގޮތުން އެއަރޕޯޓު ތަރައްޤީކުރުމަށް ސައިޓު ސާފުކުރުމާއި، ތަރައްޤީކުރުމަށް ބޭނުންވާ ސާމާނު އެރަށް މިހާރު ވަނީ ގެންދެވިފައެވެ.
ހަނިމާދޫ އިންޓަރނޭޝަނަލް އެއަރޕޯޓު ތަރައްޤީކުރުމުގެ މަޝްރޫޢު ސަރުކާރުން ކުރިއަށްގެންދަނީ އިންޑިއާގެ ކުންފުންޏެއްކަމަށްވާ ޖޭ.އެމް.ސީ ޕްރޮޖެކްޓްސްއާ ޙަވާލުކޮށްގެންނެވެ. އެކުންފުންޏަށް މިމަޝްރޫޢު ޙަވާލުކޮށްފައިވަނީ މިދިޔަ ސެޕްޓެމްބަރުމަހުގެ ތެރޭގައެވެ.
އެއަރޕޯޓުގެ އަމަލީ މަސައްކަތްތައް ރަސްމީކޮށް އިފްތިތާޙުކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އިންޑިއާގެ މިނިސްޓަރ އޮފް އެކްސްޓަރނަލް އެފެއަރޒް ޑރ. ސުބްރަމާނިޔަމް ޖައިޝަންކަރެވެ. މި މަޝްރޫޢަކީ އިންޑިއާގެ އެގްޒިމް ބެންކުގެ ލޯނު ފައިސާއިން ކުރިޔަށް ގެންދާ މަޝްރޫޢެކެވެ.
ހަނިމާދޫ އެއަރޕޯޓާއި އެކު ބޮޑު ތިލަދުންމަތީގައި ފަތުރުވެރިކަން ފުޅާކުރުމަށް ސަރުކާރުންދަނީ ތައްޔާރުވަމުންނެވެ. އަދި މިކަމަށް މަގުފަހިކޮށްދިނުމަށް ގިނަ މަސައްކަތްތަކެއް ކުރަމުންނެވެ.
ސަރުކާރުގެ އަމާޒަކީ ހަނިމާދޫ އެއަރޕޯޓާއި އެކު ތިލަދުންމަތިން ފަތުރުވެރިކަމަށް 8000 އެނދު ނެރުމެވެ.
ތިލަދުންމަތީގައި ފަތުރުވެރިކަން ފުޅާކުރުމަށް ކުރެވެމުންދާ މަސައްކަތްތަކާއި ގުޅޭގޮތުން މި ނިމުނު ހަފްތާގައި ރައްޔިތުން މަޖްލީހުގެ ޖަލްސާގައި އިހަވަންދޫ ދާއިރާގެ މެމްބަރު މުޙައްމަދު ޝިފާޢު ކުރެއްވި ސުވާލަކަށް ޖަވާބުދެއްވަމުން ޓޫރިޒަމް މިނިސްޓަރ ޑރ. އަބްދުﷲ މަޢުސޫމް ވިދާޅުވީ ރިސޯޓު ހޮޓާ ގެސްޓުހައުސްތަކުން 8000 އެނދު ލިބޭނެ ކަމަށް ލަފާކުރެވޭ ކަމަށެވެ. އަދި އޭގެތެރެއިން 50 އިންސައްތަ އެނދު ހުންނާނީ ރިސޯޓުތަކުގައި ކަމަށް މިނިސްޓަރ ވިދާޅުވިއެވެ.
" އަލަށް ބިޑަށް ހުޅުވާލާފައިވާނެ 3 ރަށެއް ރިސޯޓު ހަދަން، ބޭނުންވަނީ ރިސޯޓު ހުޅުވެންވާއިރަށް ރަށްތައް ހެދި އެސަރަހައްދަށް ބޭނުންވާ ބެޑު ލިބުން، މި ބަލަނީ ރިސޯޓާއި، ހޮޓާ، ގެސްޓުހައުސް އާއި އަދި ސަފާރީތަކުން އެ ސަރަހައްދަށް ބޭނުންވާ ބެޑު ލިބޭނެ ކަމަށް، ރިސޯޓު ހޮޓާ ގެސްޓުހައުސްއިން ކުރިއަށް އޮތް 5 އަހަރު 8000 އެނދު ލިބޭނެ ކަމަށް ޤަބޫލުކުރަން، އަންދާޒާއަކީ 50 އިންސައްތަ ރިސޯޓުހުންނާނީ ރިސޯޓުތަކުގައި،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އުތުރުގައި ފަތުރުވެރިކަން ކުރިއެރުވުމަށް އެ ސަރަހައްދަށް ކުރޫޒު ޓޫރިޒަމް ގެނައުމުގެ މަސައްކަތް ކުރަމުންދާ ކަމަށެވެ. އެގޮތުން ބަނދަރު ކުރާނެ ސަރަހައްދުތައް މިހާރު ފާހަގަކުރެވިފައިވާކަމަށްވެސް މިނިސްޓަރ ވިދާޅުވިއެވެ.
ސަރުކާރުގެ ތަސައްވުރާއެކު ހަނިމާދޫ އެއަރޕޯޓު ތަރައްޤީވެގެންދާއިރު، އުތުރުގެ ރަށްތަކަށް ތަރައްޤީގެ ރޮގުން އިންޤިލާބީ ބޮޑެތި ބަދަލުތަކެއް އަންނާނެ ކަމަށް ލަފާކުރެވެއެވެ. ހަނިމާދޫ އެއަރޕޯޓު ތަރައްޤީކުރުމުގެ މަޝްރޫޢުގެ ދަށުން ހަނިމާދޫގައި 2.46 ކިލޯމީޓަރުގެ އާ ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ޚިދުމަތް ދެވޭނެ ޒަމާނީ ޓަރމިނަލަކާއި އެއަރޕޯޓަށް ބޭނުންވާނެ އެހެނިހެން ވަސީލަތްތައް ޤާއިމުކުރެވިގެންދާނެއެވެ. މިއީ ރާއްޖޭގެ ތާރީޚުގައިވެސް މާލޭ ސަރަޙައްދުން ބޭރުގައި ހިންގާ އެންމެ ބޮޑު ތަރައްޤީގެ މަޝްރޫޢެވެ. އިކޮނޮމިކް މިނިސްޓްރީން މައުލޫމާތުދޭގޮތުގައި 2024 ގައި މިމަޝްރޫޢުގެ މަސައްކަތްތައް މުޅިން ނިމި، ބައިނަލްއަޤްވާމީ ފްލައިޓްތައް އޮޕަރޭޓް ކުރަން ފަށާނެއެވެ.
މިމަޝްރޫޢު ނިމުމުން ބައިނަލްއަޤްވާމީ ދަތުރުތަކުގައި ބޭނުންކުރާ އެއަރބަސް A320 އާއި ބޯއިންގ 737 ސައިޒުގެ ބޯޓުފަހަރަށް ހަނިމާދޫ ވައިގެބަނދަރުން ޚިދުމަތް ދެވިގެން ދާނެއެވެ. އަދި ދުނިޔޭގެ އެކި ކަންކޮޅުތަކުން ފްލައިޓްތައް ހަނިމާދޫއަށް އޮޕަރޭޓް ކުރުމުގެ ޤާބިލުކަން ލިބިގެންދާނެއެވެ.