އަހަރުގެ މިހާތަނަށް މަސްވެރިން އަތުން ގަނެފައިވާ މަހަށް 198 މިލިއަން ރުފިޔާ ދޫކޮށްފައިވާ ކަމަށް މިފްކޯއިން ހާމަކޮށްފިއެވެ. މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޓެޑް، މިފްކޯއިން ހާމަކުރާގޮތުގައި މި ދުވަސްވަރަކީ ރާއްޖެއަށް މަސްވެރިކަން ރަނގަޅު ދުވަސްވަރެކެވެ.
މިފްކޯއިން ވަނީ މިދިޔަ އަހަރު މަސްވެރިންނަށް 1 ބިލިއަނަށްވުރެ ގިނަ ރުފިޔާ ދޫކޮށްފައެވެ. އެއީ މިފްކޯގެ 12 އަހަރުގެ ތާރީޚުގައިވެސް މަސްވެރިންނަށް އެންމެ ގިނަ ޢަދަދަކަށް ފައިސާ ދޫކުރި އަހަރެވެ.
މިދުވަސްވަރު ރާއްޖޭގެ މަސްވެރިކަމާއި ގުޅޭގޮތުން ވާހަކަދައްކަވަމުން މިފްކޯގެ ސީއީއޯ އިސްމާޢީލް ފައުޒީ ވިދާޅުވީ، މިމަސް ފެށިގެން އައިއިރު މަސްވެރިކަން ރަނގަޅުވެ، މިއަހަރުގެ މިހާ ހިސާބަށް އައި އިރު 12000 ޓަނުގެ މަސް މިފްކޯއަށް ގަނެފައިވާކަމަށެވެ.
"މިއަހަރު ފެށުނު އިރު މަސްވެރިކަން ރަނގަޅު، އެހެން ނަމަވެސް ޖެނުއަރީ ފަހަތަށް ދިޔައިރު، މަސްވެރިކަންދަށްވި، އަނެއްކާ ފެބްރުއަރީ މަހު މިވަނީ މަސްވެރިކަން ރަނގަޅުވެފައި، އަހަރުގެ މިހާތަނަށް 12000 ޓަނުގެ މަސް ގަނެ 198 މިލިއަން ރުފިޔާ މިވަނީ ދޫކޮށްފައި،" އިސްމާއިލް ވިދާޅުވިއެވެ.
އިސްމާޢީލް ފާހަގަކުރެއްވިގޮތުގައި މިފްކޯއަށް ކިރުވާ މަހަށް 7 ދުވަހުގެތެރޭގައި ފައިސާ ދޫކުރުމަށް މަސައްކަތް ކުރަމުންދާކަމަށެވެ. އެހެން ނަމަވެސް ބައެއް ފަހަރު ގޮންޖެހުންތަކެއް ކުރިމަތިވި ނަމަވެސް އެކަންކަމަށް ހައްލު ހޯދުމަށްވެސް މަސައްކަތްކުރަމުންދާ ކަމަށް އިސްމާޢީލް ވިދާޅުވިއެވެ.
"މަސްވެރިންނަށް ހައްލު ހޯދާނީ ސަރުކާރާއި ގުޅިގެން މިފްކޯއިން ކުރިއަށް ގެންދާ ތަރައްޤީގެ މަސައްކަތްތަކުން، މަސްވެރިންނަށް ފައިސާ ދިނުމުގައި މަސް ކިރުވާތާ 7 ދުވަސްތެރޭ ފައިސާ ދިނުމަށް މަސައްކަތްކުރަނީ، އެހެން ނަމަވެސް ބައެއް ފަހަރު ގޮންޖެހުންތައް ހުރޭ، އެހެން ނަމަވެސް ނުދެވިދާ މުއްދަތު ކުޑަކުރުމަށް މަސައްކަތްކުރަން،" އިސްމާއިލް ވިދާޅުވިއެވެ.
އިސްމާޢީލް ފާހަގަކުރެއްވިގޮތުގައި އަހަރަކަށްވުރެ އަހަރެއް މަސްވެރިން ބާނާ މަހުގެ އަދަދުތައް އިތުރުވަމުންދާ ކަމަށެވެ. އަދި މަސްވެރި އުޅަނދުތަކަށް ގެންނަމުންދާ ޒަމާނީ ބަދަލުތަކާއި އެކު މަސްވެރިންނަށް ބޭނޭ މަހުގެ ޢަދަދުތައް އިތުރުވަމުންދާނެ ކަމުގެ ޔަޤީންކަން މަސްވެރިން ދެމުންދާ ކަމަށް އިސްމާޢީލް ވިދާޅުވިއެވެ.
މިފްކޯއިން އަންނަނީ ގޮންޖެހުންތަކާއިއެކުވެސް މަސްވެރިންނަށް ދިމާވެފައިވާ މައްސަލަތައް ހައްލުކުރުމަށް މަސައްކަތް ކުރަމުންނެވެ. އެގޮތުން މިފްކޯގެ މަސް ކާރުޚާނާތައް އަޕްގްރޭޑުކުރުމުގެ މަސައްކަތްތަކާއި، މަސް ގަންނާނެ އިތުރު ބޯޓުތައް ހޯދުމުގެ މަސައްކަތް މިފްކޯއިން ދަނީ ކުރަމުންނެވެ.
މި ގެންނަ ބަދަލުތަކާއިއެކު މަސް ކިރުވުމުގައި މިހާރު ހުރި ދަތިތަކަށް ހައްލު ލިބިގެންދާނެކަމަށް މިފްކޯއިން ދެކެއެވެ.