އެގްރޯނެޓުން ރާއްޖޭގެ 9 ސަރަހައްދެއްގައި ޤާއިމްކުރާ ޑިސްޓްރިބިއުޝަން ސެންޓަރުތައް އަންނަމަހު ހުޅުވިގެންދާނެކަމަށް އެކުންފުނިން ވިދާޅުވެއްޖެއެވެ.
އެގްރޯނެޓްގެ ޑިސްޓްރިބިއުޝަން ސެންޓަރުތަކަކީ ތާޒާކަމާއެކު ކަސްޓަމަރުންނާއި ހަމައަށް ދަނޑުވެރިން ހައްދާ ތަކެތި ފޯރުކޮށްދިނުމަށްޓަކައި އެގްރޯނެޓުން ކުރިއަށްގެންދާ މަޝްރޫއެކެވެ. ކޮންމެ ޑިސްޓްރިބިއުޝަން ސެންޓަރެއް ހުންނާނީ ކޯލްޑް ސްޓޯރޭޖް ފެސިލިޓީއަކާއި، ޑްރައިޑް ސްޓޯރ ފެސިލިޓީއަކާއި އޮފީސް ބަޔަކާއި އެކުގައެވެ. މިހުރިހާ ކޯލްޑް ސްޓޯރޭޖަކުންވެސް މައިގަނޑު ގޮތެއްގައި އެ ސަރަހައްދެއްގެ ދަނޑުވެރިން އުފައްދާ ބާވަތްތައް ޑިސްޓްރިބިއުޓް ކުރުމުގެ މަސައްކަތްތައް ކުރާނެކަމަށް އެގްރޯނެޓުން ވިދާޅުވިއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެގްރޯނެޓްގެ މެނޭޖިންގ ޑިރެކްޓަރ ހާރޫން ރަޝީދު ވިދާޅުވީ، 9 ޑިސްޓްރިބިއުޝަން ސެންޓަރު ހުޅުވުމަށް މިހާރު ތައްޔާރުވަމުންދާ ކަމަށެވެ. އަދި ސެންޓަރުތަކުން ގިނަ ޙިދުމަތްތަކެއް ލިބިގެންދާނެކަމަށްވެސް ހާރޫން ވިދާޅުވިއެވެ.
"15 ލޮކޭޝަނެއްގައި ހުޅުވުން އަމާޒަކީ، މިހާރު ހުޅުވާ 9 ތަނުގެ މަސައްކަތް ނިމިފައި މި ހުރީ، މިއިން ކޮންމެ ތަނެއްގައި ތަކެތި ރައްކާކުރެވޭނެ ގޮތާއި، ދޮވެ ސާފުކުރެވޭނެ ގޮތާއި، ސްޓާފުން ލިބޭނެ އޭރިއާއެއް ހުންނާނެ" ހާރޫން ވިދާޅުވިއެވެ.
އެގްރޯ ނެޓުގެ ޑިސްޓްރިބިއުޝަން ސެންޓަރުތައް ހިންގުމަށް ހަމަޖެހިފައިވަނީ އަވިން ހަކަތަ އުފައްދައިގެންނެވެ.
އެގްރޯނެޓުން ޑިސްޓްރިބިއުޝަން ސެންޓަރުތައް ޤާއިމްކުރާ ރަށްރަށުގެ ތެރޭގައި ހިމެނެނީ ލ. ގަން، ނ. މަނަދޫ، ރ. ކިނޮޅަސް، ފ.މަގޫދޫ، ލ.އިސްދޫ، ލ.ކަލައިދޫ، ގއ.ނިލަންދޫ، ޏ.ފުވައްމުލައް، އަދި ސ.ހުޅުމީދޫއެވެ.
އެގްރޯނެޓަކީ ރާއްޖޭގެ ދަނޑުވެރިކަން ކުރިއެރުވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހްގެ ސަރުކާރުން އުފައްދާފައިވާ ކުންފުންޏެވެ. މިކުންފުނި އުފެއްދީ 2020 ވަނަ އަހަރުގެ އޭޕްރީލްމަހުގެ ތެރޭގައެވެ. ރާއްޖޭގެ ދަނޑުވެރިކަން ފުޅާކޮށް ދަނޑުވެރިންނަށް ހަމައަގު ހޯދައިދިނުމަށްޓަކައި އެގްރޯނެޓުން އަންނަނީ ގިނަ މަސައްކަތްތަކެއް ކުރަމުންނެވެ.
ޑިސްޓްރިބިއުޝަން ސެންޓަރުތައް ތަރައްޤީކުރުމުގެ އިތުރުން އެގްރޯނެޓުން ދަނީ، ކުންފުންޏާއި ގުޅިގެން މަސައްކަތް ކުރަމުން އަންނަ ދަނޑުވެރިންގެ ބާވަތްތައް ތާޒާކަމާއެކު އެއްތަނުން އަނެއްތަނަށް އުފުލުމަށް ބޯޓުތަކެއް ބަނުމުގެ މަސައްކަތް ފަށާފައެވެ. އަދި މިހާރު މިވަނީ އެ ބޯޓުތަކުގެ ޑިޒައިން ދައްކާލާފައެވެ. އެގްރޯނެޓުން ބަންނަނީ 65 ފޫޓުގެ ފައިބަރގްލާސް 2 އުޅަނދެވެ.