އަމާޒަކީ މިއަހަރު ނިމޭއިރު 800އަށްވުރެ ގިނަ ދަނޑުވެރިންނާއެކު މަސައްކަތްކުރުން ކަމަށް އެގްރޯނެޓުން ހާމަކޮށްފިއެވެ.
އެގްރޯނެޓުންދަނީ ދަނޑުވެރިންނާއެކު އެއްބަސްވުންތައް ހަދައި އެފަރާތްތަކާއި ގުޅިގެން މަސައްކަތްކުރަމުންނެވެ. އެގޮތުން ދަނޑުވެރިންނާއެކު އެއްބަސްވުންތައް ޤާއިމްކޮށް ދަނޑުވެރިންނަށް ބޭނުންވާ ފަންނީ އަދި މާލީ އެހީތެރިކަން ފޯރުކޮށްދީ އެފަރާތްތަކުން ހައްދާ ތަކެތި ދާއިމީކޮށް އެކުންފުނިން ގަތުމުގެ މަސައްކަތްދަނީ ކުރަމުންނެވެ. މީގެސަބަބުން ދަނޑުވެރިންނަށް އެމީހުންގެ އުފެއްދުންތައް މާކެޓްކުރެވޭނެކަމުގެ ފުރިހަމަ ޔަޤީންކަން ލިބި، ދިވެހި ދަނޑުވެރިންގެ އުފެއްދުންތަކަށް ހަމަ އަގު ލިބިގެންވެސް ދެއެވެ.
މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި، ރިޔާސީ ބަޔާން އިއްވަވަމުން ރައީސް އިބްރާހީމް މުޙައްމަދު ޞާލިޙުވަނީ، މިއަހަރު ނިމުމުގެ ކުރިން މުޅި ޖުމްލަ 750 ދަނޑުވެރިންގެ ތަކެތި އެގްރޯނެޓުން ގަންނަމުން ދާނެކަމަށް ވިދާޅުވެފައެވެ.
މި އަމާޒު ހާސިލްކުރުމަށް އެގްރޯނެޓުން ކުރަމުންދާ މަސައްކަތްތަކާއި ގުޅޭގޮތުން، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން، އެގްރޯނެޓްގެ މެނޭޖިންގ ޑިރެކްޓަރ ހާރޫން ރަޝީދު ވިދާޅުވީ، މިހާރުވެސް އެކުންފުންޏާއި އެކު 700އަށްވުރެ ގިނަ ދަނޑުވެރިން މަސައްކަތްކުރަމުންދާކަމަށެވެ. އަދި އެގްރޯނެޓާއި ގުޅިގެން މަސައްކަތްކުރަމުންދާ ދަނޑުވެރިންގެ އަދަދު އިތުރުކުރުމަށް ނ. އަތޮޅަށް އަމާޒްކޮށްގެން ޚާއްސަ ޕްރޮގްރާމެއް ކުރިއަށްގެންދާ ކަމަށް ހާރޫން ވިދާޅުވިއެވެ.
" ވަކިން ޚާއްސަކޮށް ނ. އަތޮޅުގެ ގިނަ ރަށްތަކަށް އަމާޒުކޮށްގެން ޕްރޮގްރާމެއް ކުރިއަށް އެބަގެންދަން. ފ.އަތޮޅަށް އަމާޒުކޮށްގެންވެސް ޕްރޮގްރާމެއް ކުރިއަށް އެބަގެންދަން. މިހާރުވެސް 700އަށްވުރެ ގިނަ ދަނޑުވެރިންނާއެކު މަސައްކަތް އެބަކުރަން، އެހެންވީމަ ރައީސް ވިދާޅުވި ޓާގެޓު ހާސިލްވާނެ،" ހާރޫން ވިދާޅުވިއެވެ.
ދަނޑުވެރިކަމުގެ މަސައްކަތް ރާއްޖޭގެ އެކި ހިސާބުތަކަށް ފުޅާކުރުމަށް އެގްރޯނެޓުން ދާދިފަހުންވަނީ ކޮމިއުނިޓީ ފާރމިންގ މަޝްރޫޢެއް ފަށާފައެވެ. މި މަޝްރޫޢު ކުރިއަށްގެންދިޔުމަށް ފަސް ރަށެއްވަނީ ހޮވާފައެވެ. އެއީ ލ.އިސްދޫ، ނ.މަނަދޫ، މާފަރާއި އއ.ތޮއްޑޫގެ އިތުރުން މ. ކޮޅުފުއްޓެވެ. މީގެތެރެއިން ލ. އިސްދޫ، ނ. ލަންދޫ އަދި ނ. މަނަދޫގައި މިހާރު އެއްބަސްވުންތަކުގައިވަނީ ސޮއިކުރެވިފައިކަމަށް ހާރޫން ވިދާޅުވިއެވެ.
" މިއިން ކޮންމެ ތަނަކަށްވެސް 2 މިލިއަނަށްވުރެ ރުފިޔާ އެތަންތަން ޑިވެލޮޕްކުރަން ޚަރަދުކުރާނެ، އިރިގޭޝަން އަޅާ، ސޯލާ ހަރުކޮށް، މުޅި ސެޓްއަޕް ހެދުމަށްފަހު ދަނޑުވެރިން އައިސް މަސައްކަތްކުރެވޭނެ އިންތިޒާމް މިހަމަޖައްސަނީ،" ހާރޫން ވިދާޅުވިއެވެ.
ހާރޫން ވިދާޅުވީ މިމަޝްރޫޢުގެ ދަށުން ދަނޑުވެރިންނަށް ވާނެ އެންމެ ބޮޑު ފައިދާއަކީ އަތުން ބޮޑު ޚަރަދެއް ނުގޮސް، ދަނޑުގައި ހައްދާ ހުރިހާ އެއްޗެއް އެގްރޯނެޓުން ގަންނާނެކަމުގެ ޔަޤީންކަން ލިބުމެވެ.
އެގްރޯނެޓަކީ ރާއްޖޭގެ ދަނޑުވެރިކަން ކުރިއެރުވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހްގެ ސަރުކާރުން 2020 ވަނަ އަހަރުގެ އޭޕްރީލްމަހުގެ ތެރޭ އުފައްދާފައިވާ ކުންފުންޏެކެވެ. ރާއްޖޭގެ ދަނޑުވެރިކަން ފުޅާކޮށް ދަނޑުވެރިންނަށް ހަމައަގު ހޯދައިދިނުމަށްޓަކައި އެގްރޯނެޓުން އަންނަނީ ގިނަ މަސައްކަތްތަކެއް ކުރަމުންނެވެ.