ފަރެސްމާތޮޑާ އެއަރޕޯޓުން ހުޅުވާލި ވަޒީފާގެ ފުރުސަތުތަކަށް ގިނަ އަދަދެއްގެ ބަޔަކު ޝައުގުވެރިކަން ފާޅުކޮށްފައިވާކަމަށް ރީޖަނަލް އެއަރޕޯޓްސްއިން ހާމަކޮށްފިއެވެ.
ރީޖަނަލް އެއަރޕޯޓްސްއިން އިޢުލާނުކޮށްފައިވަނީ، 15 ވަޒީފާއަކަށް ޖުމްލަ 45 މުވައްޒަފުން ހޯދުމަށެވެ. މި ވަޒީފާތަކަށް 155 މީހުން ޝައުގުވެރިކަން ފާޅުކޮށްފައިވާކަމަށް، އެކުންފުނިން ހާމަކުރެއެވެ. އަދި މިހާރު ވަޒީފާއަށް މީހުން ނެގުމަށް އިންޓަރވިއުތައް ކުރިއަށްދާއިރު، ވަޒީފާއަށް އެދި އެ ހިސާބުގެ އެކި ރަށްތަކުން އެޕްލިކޭޝަންތައް ލިބިފައިވާކަމަށް ރީޖަނަލް އެއަރޕޯޓްސްއިން ބުނެއެވެ.
އަންނަ މަހުގެ 15 ވަނަ ދުވަހު ހުޅުވާލުމަށް ތައްޔާރުވަމުންދާ ފަރެސްމާތޮޑާ އެއަރޕޯޓުން ވަނީ އެއަރޕޯޓު މެނޭޖަރ، އޮޕަރޭޝަންސް އޮފިސަރ، އެޑްމިން މުވައްޒަފުން، އެއަރޕޯޓު ސާފުކުރުމާއި ބަގީޗާތައް ބެލެހެއްޓުމުގެ މަސައްކަތް، ސެކިއުރިޓީ އެޖެންޓުން، ފަޔަރފައިޓަރުންފަދަ ވަޒީފާތަކަށް މީހުން ހޯދުމަށް އިޢުލާންކޮށްފައެވެ.
ފަރެސްމާތޮޑާ އެއަރޕޯޓް ތަރައްޤީކޮށްފައިވަނީ ރާއްޖޭގައި ޑޮމެސްޓިކް ގިނަ އެއަރޕޯޓްތައް މިހާރު ތަރައްޤީކުރަމުން އަންނަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމް.ޓީ.ސީ.ސީންނެވެ.
އެތެރޭގެ އުދުހުންތަކަށް ޚާއްސަކޮށްގެން ތަރައްޤީކުރި މި އެއަރޕޯޓުގެ ޢިމާރާތްތަކާއި ބޮޑެތި ހުރިހާ މަސައްކަތްތައް ނިމި، އެއަރޕޯޓްގައި މިހާރު ކުރަމުންދަނީ އޮޕަރޭޝަނަށް ގެނައުމަށްޓަކާ ކުރަންޖެހޭ އެންމެފަހުގެ މަސައްކަތްތަކެވެ.
މި އެއަރޕޯޓް ހުޅުވާއިރުވެސް، ރޭގަނޑު އެއަރޕޯޓަށް ފްލައިޓް ޖެއްސޭނެ ވަސީލަތްތައް ޤާއިމުކޮށް ފުރިހަމަވެފައި ހުންނާނެއެވެ. އެއަރޕޯޓުގެ މަސައްކަތްތައް މިހާރު މުޅިން ނިމިފައިވާއިރު، ޓެސްޓް ފްލައިޓް ޖެއްސުމަށްޓަކައި ކުރަންޖެހޭ މަސައްކަތްތައްވެސް އަންނަނީ ކުރަމުންނެވެ.
ފަރެސްމާތޮޑާ އެއަރޕޯޓްގައި ޤާއިމުކޮށްފައިވަނީ 1200 މީޓަރު ދިގު ރަންވޭއެކެވެ. މި މަޝްރޫޢުގެ ދަށުން ރަންވޭގެ އިތުރަށް ޓެކްސީވޭއަކާއި، އޭޕްރަންއަކާއި، ފަޔަރ ޕެޑް އަދި ފަޔަރ ރޯޑެއް ޤާއިމުކުރުމާއި، ފަޔަރ ބިލްޑިން އިމާރާތް ވަނީ ތަރައްޤީކޮށްފައެވެ.
144.8 މިލިއަން ރުފިޔާ ޚަރަދުކޮށްގެން ހިންގާ މި މަޝްރޫޢުގެ ދަށުން އެއަރޕޯޓާއި ފަރެސްމާތޮޑާ ގުޅާލާ ކޯޒްވޭގެ މަސައްކަތްތައްވެސް މިހާރު ވަނީ ފަށާފައެވެ. މިއާއެކު އެއަރޕޯޓް ކޯޒްވޭއާއި، ކޯޒްވޭއާއި ގުޅޭ މަގުތައްވެސް ހަދާނެއެވެ.
ފަރެސްމާތޮޑާ އެއަރޕޯޓް ތަރައްޤީކޮށްފައިވަނީ އެ ރަށު ފަޅުތެރޭ އޮތް ކުދި ރަށްތަށް ހިއްކައިގެންނެވެ. އެއަރޕޯޓްގެ ޢަމަލީ މަސައްކަތްތައް ފެށީ 2021 ވަނަ އަހަރުގެ ކުރީކޮޅުއެވެ. މި މަޝްރޫޢުގެ ސަބަބުން ދެކުނުގެ ދަތުރުފަތުރުގެ ނިޒާމަށް އިތުރު ކުރިއެރުންތަކެއް ލިބި، ވިޔަފާރިއާއި އިޤްތިޞާދީ ހަރަކާތްތައް އިތުރަށް ފުޅާކުރުމަށާއި، ވަޒީފާގެ އިތުރު ފުރުޞަތުތައް ފަހިވެގެންދާނެކަމަށް ސަރުކާރުން ވިދާޅުވެއެވެ