ސްޓޭޓް ޓްރޭޑިންގ އޮގަނައިޒޭޝަން އެސްޓީއޯއިން ރޯދައަށް ގެނައި ފިޔާ، ބިސް، އަލުވީގެ ފުރަތަމަ ޝިޕްމަންޓު ރާއްޖެ ގެނެސް ވިއްކަން ފަށައިފިއެވެ.
އެސްޓީއޯއިން ބުނީ އެސްޓީއޯ ޕީޕަލްސް ޗޮއިސް އާއި ހޯލްސޭލް ސެންޓަރުން މިއަދުން ފެށިގެން މިތަކެތި ވިއްކަން ފަށާނެ ކަމަށެވެ.
އެސްޓީއޯއިން ބުނީ، އިންޑަސްޓްރިއަލް ވިލެޖުން ފިޔާ، ބިސް އަދި އަލުވި ދޫކުރަން ފަށާނީ އަންނަ އާދީއްތަ ދުވަހުން ފެށިގެން ކަމަށެވެ. އަދި ހުޅުމާލޭގައި ހުޅުވާ ރޯދަ މާރޓު މިމަހުގެ 20ވަނަ ދުވަހު ހުޅުވުމާއެކު އެތަނުންވެސް ފިޔާ، ބިސް، އަލުވި ވިއްކަން ފަށާނެ ކަމަށެވެ.
މީގެ އިތުރުން އަތޮޅުތެރޭގެ 11 ސަރަހައްދެއްގައި ގާއިމްކުރެވިފައިވާ އެސްޓީއޯގެ 11 ފިހާރައަކުންވެސް ފިޔާ ބިސް އަދި އަލުވި ވިއްކުމަށްވަނީ ހަމަޖެހިފައެވެ. އަދި އެތަކެތި ސަރަހައްދީ އެހެން ރަށްރަށަށް ފޯރުކޮށްދިނުމުގައި އެސްޓީއޯއިން އެހީތެރިވާނެއެވެ.
ފިޔާ، ބިސް، އަލުވި އާންމުންނަށް ވިއްކަން ހަމަޖެހިފައިވާ އަގުތައްތަކަށްބަލާއިރު، މިދިޔަ އަހަރާއި އަޅާ ބަލާއިރު، ފިޔާ އަދި އަލުވީގެ އަގުވަނީ ދަށްވެފައެވެ.
ރޯދަމަހު އެންމެ ޑިމާންޑު ބޮޑުވާ ބާވަތްތަކުގެ ތެރޭގައި ފިޔާ، ބިސް އަދި އަލުވި ހިމެނެއެވެ. އަދި މިބާވަތްތަކުގެ ޑިމާންޑް ބޮޑުވުމާއެކު، ރާއްޖޭގެ ފިހާރަތަކުންނާއި، ބާޒާރުން އެބާވަތްތަކުގެ އަގު އުފުލެއެވެ. އެހެންކަމުން، މިބާވަތްތައް ހެޔޮ އަގެއްގައި ރައްޔިތުންނަށް ފޯރުކޮށްދިނުމަށް ކޮންމެ ރޯދަމަހަކުވެސް އެސްޓީއޯއިން ދަނީ ފިޔާ، ބިސް، އަލުވި ރާއްޖެ އެތެރެކޮށް ވިއްކަމުންނެވެ.