ޗެކް ބޭނުންކުރާ މިންވަރު މަދުކުރުމުގެ އެކްޝަން ޕްލޭނަށް ޢަމަލު ކުރުން ފަސްކޮށްފި

ރާއްޖޭގައި ޗެކު ބޭނުންކުރާ މިންވަރު މަދުކުރުމަށް އެމްއެމްއޭއިން އެކުލަވާލި އެކްޝަން ޕްލޭނަށް ޢަމަލު ކުރުން ފަސްކޮށްފިއެވެ.

ދިވެހިރާއްޖޭގައި ޕޭމަންޓްގެ ޚިދުމަތް އަވަސް އަދި ލުއިފަސޭހަ ގޮތެއްގައި ކުރެވޭނެ އިންތިޒާމުތައް ހަމަޖެއްސުމުގެ ގޮތުންނާއި، ނަގުދު ފައިސާ އާއި ޗެކު ބޭނުންކުރުން މަދުކޮށް ޑިޖިޓަލް ޕޭމަންޓް ޚިދުމަތްތައް ބޭނުންކުރާ މިންވަރު އިތުރުކުރުމަށްޓަކައި ވަނީ މަސައްކަތްތަކެއް ފަށާފައެވެ. އެގޮތުން އެމްއެމްއޭއާއި ބޭންކްތަކާއި ގުޅިގެން ރާއްޖޭގައި ޗެކް ބޭނުންކުރާ މިންވަރު މަދުކުރުމާއިބެހޭ އެކްޝަން ޕްލޭނެއް އެކުލަވާލައި، އާއްމުކޮށްފައިވަނީ މިދިޔަ އަހަރުގެ އޭޕްރިލްމަހުގައެވެ.

މި އެކްޝަން ޕްލޭންގެ ދަށުން އެންމެ ފުރަތަމަ ތަންފީޒުކުރެވޭ ނިންމުމުގެ ގޮތުގައި، އަންނަމަހުގެ 1ވަނަ ދުވަހުން ފެށިގެން، ވަކިވަކި ފަރުދުންނާއި، ހުރިހާ ވިޔަފާރިތަކުން ޗެކު ބޭނުންކޮށްގެން ކުރާ ހުރިހާ މުއާމަލާތްތަކެއް ހިމެނޭހެން، ރާއްޖޭގައި ޗެކު ބޭނުންކޮށްގެން މުޢާމަލާތްކުރެވޭނެ އެންމެ މަތީ ޢަދަދަކީ ދިވެހި ރުފިޔާއިން ނަމަ 50،000 އަދި ޔޫއެސް ޑޮލަރުން ނަމަ 3،000 ކަމުގައި ވާނީ ކަނޑައަޅާފައެވެ.

އެހެންނަމަވެސް މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ނެރުނު ނޫސްބަޔާނެއްގައި ބުނެފައިވަނީ މި އެކްޝަން ޕްލޭން ތަންފީޒުކުރުމަށްޓަކައި ކަމާއި ބެހޭ ފަރާތްތަކުން އެންމެ އެދެވޭ މިންވަރަށް ތައްޔާރުވެފައި ނުވާތީ، މިކަމަށް ތައްޔާރުވުމަށް އިތުރު ވަގުތު ދިނުމުގެ ގޮތުން އަންނަމަހުގެ 1ވަނަ ދުވަހުގައި ތަންފީޒުކުރުމަށް ހަމަޖެހިފައިވާ ނިންމުމަށް އަމަލުކުރުން ލަސްކޮށްފައިވާ ކަމަށެވެ.

ޗެކް ބޭނުންކުރާ މިންވަރު މަދުކުރުމާއިބެހޭ އެކްޝަން ޕްލޭންގައި ހިމެނޭ އެހެނިހެން ކަންކަމުގެ ތެރޭގައި ޕޭމަންޓް ހެދުމަށް ޗެކު ބޭނުންކުރާ މިންވަރު މަދުކޮށް ޑިޖިޓަލް ވަޞީލަތްތައް ބޭނުންކުރުމަށް ބާރު އެޅުމާއި، ޗެކު ޕްރޮސެސްކުރުމަށް ފީއެއް ތަޢާރަފްކުރުން ހިމެނެއެވެ.

މީގެ އިތުރުންވެސް، ބޭންކުތަކުން އެފަރާތުގެ ކަސްޓަމަރުންނަށް ފޯރުކޮށްދޭ ޚިދުމަތްތައް ޑިޖިޓަލް ވަޞީލަތްތައް މެދުވެރިކޮށް ފަސޭހަކާމާއެކު ބޭނުން ކުރެވޭނެ އިންތިޒާމްތައް ހަމަޖެއްސުމަށާއި، ޑިޖިޓަލް ވަޞީލަތްތައް ބޭނުންކުރުމަށް އެފަރާތުގެ ކަސްޓަމަރުން އަހުލުވެރި ކުރުވާ ހޭލުންތެރި ކުރުވުންވެސް މި އެކްޝަން ޕްލޭންގައި ކުރުމަށް ކަނޑައަޅާފައިވެއެވެ.