ރަމަޟާންމަހުގެ އިނާޔަތުގެ ފައިސާ ރަމަޟާން މަސް ފެށުމުގެ ކުރިން ދޭން ޖެހޭނެކަން ލޭބަރ ރިލޭޝަންސް އޮތޯރިޓީން ހަނދާންކޮށްދީފިއެވެ.
ލޭބަރ ރިލޭޝަންސް އޮތޯރިޓީން ވިދާޅުވީ ވަޒީފާއާބެހޭ ޤާނޫނުގެ ދަށުން، ވަޒީފާ އަދާކުރާ މުސްލިމް ކޮންމެ މުވައްޒަފަކަށް ރަމަޟާންމަހުގެ އިނާޔަތުގެ ގޮތުގައި، ރަމަޟާން މަސް ފެށުމުގެ ކުރިން 3000 ރުފިޔާ ދޭން ޖެހެއެވެ.
ނަމަވެސް ވަޒީފާދޭ ބައެއް ފަރާތްތަކުން މުވައްޒަފުންނަށް ރަމަޟާންމަހުގެ އިނާޔަތް ނުދޭކަމާއި، އިނާޔަތްދިން ނަމަވެސް، ޤާނޫނުގައި ބަޔާންކޮށްފައިވާ މިންވަރަށް ފައިސާ ދީފައިނުވާކަން މީގެ ކުރިންވެސް ފާހަގަކުރެވިފައިވާ ކަމަށް ލޭބަރ ރިލޭޝަންސް އޮތޯރިޓީން ހާމަކުރެއެވެ.
އެހެންކަމުން، ވަޒީފާދީގެން މުވައްޒަފުން ގެންގުޅޭ ހުރިހާ ފަރާތްތަކުންވެސް، މިއަހަރުގެ ރަމަޟާންމަސް ފެށުމުގެ ކުރިން، ވަޒީފާއާ ބެހޭ ޤާނޫނުގައި ބަޔާންކޮށްފައިވާ ގޮތުގެމަތިން، މުވައްޒަފުންނަށް ރަމަޟާންމަހުގެ އިނާޔަތް ދިނުމަށް ލޭބަރ ރިލޭޝަންސް އޮތޯރިޓީންވަނީ ހަނދާންކޮށްދީފައެވެ.
ރޯދަ އިނާޔަތް ނުދޭ ފަރާތްތަކުގެ މައްސަލަތައް ބަލައި ލޭބަރ ރިލޭޝަންސް އޮތޯރިޓީންވަނީ މީގެ ކުރިން ބައެއް ފަރާތްތައް ޖޫރިމަނާވެސް ކޮށްފައެވެ.