ނިއުރޭޑިއަންޓްގެ ފުޓްބޯޅަ އެކަޑަމީއަށް ބަލްގޭރިޔާގެ ކޯޗެއް ގެނެސްފިއެވެ. ބަލްގޭރިޔާގެ ކޯޗު ރެޑޯއީ ރިސްތޯވް މިއަދު ހެނދުނު ވަނީ މާލެއައިސްފައެވެ. އަދި މިއަދު މެންދުރުފަހު އެކަޑަމީގެ މަސައްކަތުގައި އޭނާ ބައިވެރިވެ، ކުޑަކުދިން ތަމްރީން ކުރުމުގެ އަމަލީ މަސައްކަތް އޭނާ ފަށާނެކަމަށް ނިއުރޭޑިއަންޓުން މައުލޫމާތުދެއެވެ.
62 އަހަރުގެ މިކޯޗަކީ ޔޫތް ޑިވެލޮޕްމަންޓް ޕްރޮގްރާމްތައް ހިންގުމުގެ ތަޖުރިބާކާރު ކޯޗެއްކަމަށް ނިއުއިން މައުލޫމާތުދެއެވެ. ބަލްގޭރިޔާއާއި، މިޔަންމާއާއި، އިންޑޮނޭޝިޔާގެ ޔޫތް ޓީމްތަކާއެކު އޭނާ ވަނީ މަސައްކަތްކޮށްފައެވެ. އެގޮތުން ބަލްގޭރިޔާގެ 18 އަހަރުން ދަށުގެ ޗެމްޕިއަންކަން އެޤައުމުގެ ސޮފިއާއާއެކު 6 ފަހަރު ހޯދާފައިވެއެވެ. މިޔަންމާގެ ޖޫނިއަރ ޓީމްގެ ހެޑް ކޯޗުކަން 3 އަހަރު އަދި ސީނިއަރ ޓީމްގެ ކޯޗުކަން 3 އަހަރު ކޮށްފައިވެއެވެ. 10 އަހަރު ބަލްގޭރިޔާގެ ފެޑެރޭޝަންގެ ކޯޗެއްގެ ގޮތުގައި 12 އަހަރުން ދަށުގެ ޓީމާއެކު މަސައްކަތްކޮށްފައިވެއެވެ. މީގެއިތުރުން އޭނާ ވަނީ ބަލްގޭރިޔާގެ ފެޑެރޭޝަންގެ ޓެކްނިކަލް ޑައިރެކްޓަރުންކަންވެސް ކޮށްފައެވެ.
ނިއުރޭޑިއަންޓްގެ އެކަޑަމީގައި މީގެކުރިންވެސް ބަލްގޭރިޔާގެ ކޯޗެއް މަސައްކަތްކުރިއެވެ. މިހާރު ނިއުގެ ސީނިއަރ ޓީމްގެ ހެޑްކޯޗަކީވެސް ބަލްގޭރިޔާގެ ސްޓޮއިކޯފްއެވެ. ނިއުރޭޑިއަންޓްގެ އެކަޑަމީގައި މިވަގުތުވެސް 250 އަށްވުރެ ގިނަ ކުދިން ތަމްރީން ހޯދަމުންދެއެވެ. ނިއުގެ އެކަޑަމީގައި ތަމްރީން ހޯދަމުންދަނީ 12 އަހަރުން ދަށުގެ ކުދިންނެވެ.