ވޭލްސް ބަލިކޮށް ޔޫރޯ ފުޓްބޯޅަ މުބާރާތުގެ ފައިނަލުން ޕޯޗްގަލް ޖާގަ ހޯދައިފިއެވެ. ސެމީފައިނަލްގައި ޕޯޗްގަލް ވޭލްސްގެ މައްޗަށް ކުރި ހޯދީ ދެލަނޑު ސުންލަނޑުންނެވެ.
މެޗްގެ ފުރަތަމަ ލަނޑު ދެވަނަ ހާފްގައި ކާމިޔާބުކޮށްދިނީ ޕޯޗްގަލްގެ ކެޕްޓަން ކްރިސްޓިއާނޯ ރޮނާލްޑޯއެވެ. ރޮނާލްޑޯގެ މިލަނޑާއެކު ޔޫރޯގައި އެންމެ ގިނަ ލަނޑު ޖަހައިގެން މިޝޭލް ޕްލެޓީނީ ހެދި ރެކޯޑާ ވަނީ ހަމަހަމަވެފައެވެ. ރޮނާލްޑޯއާ މިޝޭލް ޕްލެޓީނީ 9 ގޯލް ޖަހާފައިވާއިރު ޕްލެޓީނީ ރެކޯޑް ހަދާފައިވަނީ 1984 ވަނަ އަހަރުގެ ޔޫރޯގައެވެ.
ޕޯޗްގަލްގެ ދެވަނަ ލަނޑު މިމެޗްގައި ރޮނާލްޑޯގެ އެހީތެރިކަމާއެކު ކާމިޔާބުކޮށްދިނީ ނާނީއެވެ. ދެވަނަ ހާފްގައި ޖެހި ދެގޯލުން ޕޯޗްގަލް މެޗް ކާމިޔާބުކޮށް ފައިނަލުން ޖާގަ ހޯދިއިރު އެންމެ ފަހުން ޕޯޗްގަލް ޔޫރޯ ފައިނަލްގައި ވާދަކޮށްފައިވަނީ2004 ވަނަ އަހަރުއެވެ. އެފަހަރު ޕޯޗްގަލް ބަލިކޮށް ޔޫރޯ ކާމިޔާބުކުރީ ގްރީސްއެވެ.
ޔޫރޯ ފުޓްބޯޅަ މުބާރާތުގެ ފައިނަލްގައި ޕޯޗްގަލް ވާދަކުރަން ޖެހޭނީ ފްރާންސް ނުވަތަ ޖަރމަނީއާއެވެ.