ފެރިދޫގެ ޒަމާންވީ ޝަކުވާ، ރަށުގެ ބަނދަރުގެ މައްސަލަ ޙައްލަކާ ދިމާލަށް

އއ. އަތޮޅު ފެރިދުއަކީ 800 މީހުންގެ އާބާދީގެ ރަށެކެވެ. ރަށުގައި ދިރިއުޅޭ އާބާދީއަކީ 500 މީހުންނެވެ. އއ.އަތޮޅުގައި ފެރިދުއަކީވެސް މިހާރު ލޯކަލް ޓުއަރިޒަމް ބާރަށް ކުރިއަރަމުން އަންނަ ރަށެކެވެ. ރަށުގައި ގާތްގަނޑަކަށް 12 ގެސްޓްހައުސް މިހާރުވެސް ހިންގަމުން އަންނައިރު، އިތުރު ގެސްޓް ހައުސްތައް ހުޅުވުމަށް އަންނަނީ ތައްޔާރުވަމުންނެވެ.

އާބާދީ ކުޑަ ފެރިދުއަކީ މިހާތަނަށް އައިއިރު، ސަރުކާރުތަކުން މާބޮޑު އަޅާލުމެއް ނެތި ދޫކޮށްލާފައި އޮތް ރަށެކެވެ. ރަށަށް އެންމެ މުހިންމު ކަމެއްގެ ގޮތުގައި އޮތް އެއް މަސައްކަތަކީ، ރަށަށް ލަފާފުރޭނެ ފަސޭހަ ގޮތެއް ހޯދުމެވެ.

2000 ގެ ކުރީކޮޅު ތަރައްޤީކޮށްފައިވާ އެރަށުގެ ބަނދަރަކީ، ރާއްޖޭގެ އެންމެ ކުދި ބަނދަރުތަކުން ބަނދަރެކެވެ. ރަށުގައި އިތުރުވަމުން އަންނަ އާބާދީއާއި ވިޔަފާރިތަކާއެކު ރަށުގައި ބޭނުންކުރާ ކަނޑު އުޅަނދުތައް އަންނަނީ އިތުރުވަމުންނެވެ. ރަށުގެ ބަނދަރު ކުޑަވެ ބޭނުންކުރުމުގައި ގިނަ ދަތިތައް އެބަހުއްޓެވެ. ފެރިދޫގެ ރައްޔިތުން އެރަށުގެ ބަނދަރު ސިފަކުރަނީ "ސްވިމިން ޕޫލް" އެއްގެ ގޮތުގައެވެ.

ފެރިދޫގައި ލޯންޗުތަކާއި ޑިންގިއާއި އަދި މަހަށް ދިއުމަށް ބޭނުންކުރާ އުޅަނދުތައްވެސް އަންނަނީ އިތުރުވަމުންނެވެ. އެންމެ ބޮޑު ދަތިކަމެއްގެ ގޮތުގައި ރަށުގެ ރަޔިތުން ފާހަގަކުރަނީ، މުދާ އުފުލުމަށާއި، މަސްވެރިކަމަށް ނިކުންނަ ބޮޑެތި އުޅަނދުތަކަށް ރަށުގެ ބަނދަރު ބޭނުންކުރުމަށް ހުރި ދަތިތަކެވެ.

ފެރިދޫ ކައުންސިލްގެ ރައީސް އިސްމާޢީލް ޝާހު ވިދާޅުވީ، ރަށުގެ ބަނދަރަށް ޙައްލެއް ގެނައުމަށް ވޭތުވެދިޔަ ސަރުކާރުތަކުގައި މަސައްކަތްތަކެއް ކުރިކަމަށެވެ. ނަމަވެސް އެކަމަށް އަލިމަގެއް ނުފެނުނުކަމަށެވެ.

ފެރިދޫ ބަނދަރު ޒަމާނީ ބަނދަރެއްގެ ގޮތުގައި ތަރައްޤީކުރުމަށް މިއަހަރުގެ ޖެނުއަރީމަހު ސަރުކާރުން ވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީއާއި ޙަވާލުކޮށްފައެވެ. އަދި ޢަމަލީ މަސައްކަތް ފެށުމަށް ބޭނުންވާ އީއައިގޭ މަސައްކަތްތައް އެ ކުންފުނިން މިހާރު ދަނީ ކުރަމުންނެވެ.

ފެރިދޫ ކައުންސިލްގެ ރައީސް ޝާހު ވިދާޅުވީ މި ޕްރޮޖެކްޓްގައި، މިހާރު އޮތް ބަނދަރު ސަރަޙައްދާއެކު 800 ފޫޓުގެ ބޮޑު، ޒަމާނީ ބަނދަރެއްގެ ގޮތުގައި ރަށުގެ ބަނދަރު ތަރައްޤީކުރާނެކަމަށެވެ. މިއާއެކު މިހާރު ހުރި މައްސަލަތައް ޙައްލުވެ، ޖާގައިގެ މައްސަލަ ކުރިމަތިނުވެ ގިނަ އަހަރުތަކަކަށް ރަށުގެ ބަނދަރު ބޭނުން ކުރެވޭނެކަމަށެވެ.

"ރައްޔިތުން އެދުނު ބަދަލުތަކާއެކު، ބޭރު ތޮއްޓަށްވެސް އުޅަނދުތައް ކައިރިކުރެވޭގޮތަށް ޕްލޭނަށް ބަދަލުގެނެސް ސޮއިކޮށްފަވަނީ. ޓީޖެޓީއެއްވެސް ހިމެނޭހެން ބަނދަރު ބޮޑުކުރެވޭނީ" ކައުންސިލްގެ ރައީސް ޝާހު ވިދާޅުވިއެވެ.

ރަށުގެ ރައްޔިތުން ފާހަގަކުރާގޮތުގައި ބަނދަރުގެ މައްސަލަ ޙައްލުވުމަކީ ރަށުގެ ރައްޔިތުން މިވަގުތަށް ބޭނުންވާ އެންމެ މުހިންމު މަސައްކަތެކެވެ. ރަށަށް އަރާފޭބުމުގައި ލުއިފަސޭހަވެ، މުދާ ބޭލޭނެ ފަސޭހަގޮތެއްވުމަކީ ރައްޔިތުން އެދެމުންދާގޮތެވެ.

"100 ފޫޓުގެ އުޅަނދެއް ވަދެއްޖެއްޔާ، އެހެން އުޅަނދު ދުރައްޖައްސާ ތަން ހަދަންޖެހޭނީ. އެއް އުޅަނދު އަނެއް އުޅަނދުގެ ފަހަތުގައި ޖައްސައިގެން، މީހުންނާ މުދާ ބާލަންޖެހޭ ހާލަތަށްވެސް އާދޭ ޖާގަ ނެތީމަ" ރަށުން ވާހަކަދެއްކި ރައްޔިތުން ފާހަގަކުރިއެވެ.

އއ. ފެރިދޫ ބަނދަރު އަަޕްގްރޭޑްކުރުމަށް އެމް.ޓީ.ސީ.ސީއާއި ޙަވާލުކޮށްފައިވާ މަސައްކަތުގައި 213 މީޓަރުގެ އެއްގަމު ތޮށި އަދި 147 މީޓަރުގެ ބޭތު ތޮށި ލުން ހިމެނެއެވެ. ފެރިދޫ ބަނދަރު އަޕްގްރޭޑްކުރަން އެމް.ޓީ.ސީ.ސީއާއި ހަވާލުކޮށްފައިވަނީ 1 އަހަރު ދުވަހުން ނިންމާގޮތަށް، 50 މިލިއަން ރުފިޔާއަށެވެ.

ބަނދަރު އަޕްގްރޭޑްކުރުމުގެ މަސައްކަތް ނިމޭއިރު ބަނދަރު ބައްތިއާއި މަގު ބައްތި އަދި ބަނދަރު ޕޭވްމަންޓް ހެދުމުގެ މަސައްކަތްވެސް ހިމެނެއެވެ.