ކުރިއަށް 4 މަސްތެރޭގައި ހިމަންދޫ ޒަމާނީ އިންޖީނުގޭގެ މަސައްކަތް ނިމޭނެ

އަތޮޅުތެރޭގެ ރަށްރަށުގައި 24 ގަޑިއިރު ފެންވަރު ރަނގަޅު ކަަރަންޓުގެ ޚިދުމަތެއް ދިނުމަށާއި ޑިމާންޑު އުފުލެމުންދާ މިންވަރަށް ބެލުމަށްފަހު ކުރިމަގަށް އެ ޚިދުމަތް އިތުރަށް ތަރައްޤީކުރުމަށް ހަކަތައިގެ ދާއިރާއިން ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.

މާލެ ސަރަހައްދާއި މެދުރާއްޖޭގެ އަތޮޅުތަކަށް ކަރަންޓުގެ ޚިދުމަތް ފޯރުކޮށްދެމުން އަންނަނީ ސްޓެލްކޯއިންނެވެ. އެގޮތުން އއ.އަތޮޅު ހިމަންދޫގައި އެ ރަށު ރައްޔިތުން ހިންގަމުންދިޔަ އިންޖީނުގެވެސް ހަވާލުކޮށްފައިވަނީ ސްޓެލްކޯއާއެވެ.

ސްޓެލްކޯއާ ހަވާލުކުރާ އިންޖީނުގެތަކުގެ ފެންވަރު ރަނގަޅުކޮށް، ދެމެހެއްޓެނިވި ކަރަންޓުގެ ނިޒާމެއް ޤާއިމުކުރުމަށް އެ ކުންފުނިން އަންނަނީ އެކި މަޝްރޫޢުތައް ހިންގަމުންނެވެ. އެގޮތުން އއ.ހިމަންދޫގައި ބޭނުންކުރަމުންދާ ކުޑަ އިންޖީނުގެ، ޒަމާނީ އިމާރާތަކަށް ބަދަލުކޮށް، އެތަނަށް ބޭނުންވާ ވަސީލަތްތައް ޤާއިމްކުުރުމުގެ މަސައްކަތް ދަނީ ކުރަމުންނެވެ.

800އެއްހާ މީހުން ދިރިއުޅެމުން އަންނަ ހިމަންދޫގެ އާ އިނޖީނުގެ އިމާރާތުގެ ޢަމަލީ މަސައްކަތް ފެށީ 2021 ވަނަ އަހަރުގެ މަރޗްމަހުއެވެ. މި ޕްރޮޖެކްޓްގައި ތަރައްޤީކުރާ ޒަމާނީ އިންޖީނުގޭގައި، އިންޖީނު ބަހައްޓާ އިމާރާތާއި އިދާރީ އޮފީސް އިމާރާތް ހިމެނެއެވެ. އަދި އިންޖީނުގޭގެ ފަރުމާއަކީވެސް، ރަށުގެ މަލަމަށްޗަށް ހިތްގައިމުކަން ގެނެސްދޭނެ ފަރުމާއެކެވެ. މިއީ ދެ ފަންގިފިލާގެ އިމާރާތެކެވެ.

ހިމަންދޫ އިންޖީނުގޭގެ ސްޓޭޝަން މެނޭޖަރ އަލީ ނަސީރު ވިދާޅުވިީ ރަށުގެ އާބާދީ އިތުރުވުމާއި، އަދި ރަށުގައި ގެސްޓްހައުސް ވިޔަފާރިވެސް ފުޅާވަމުން އައުމާއެކު ދެމެހެއްޓެނިވި ރަނގަޅު ހަކަތައިގެ ނިޒާމެއް ރަށަށް ވަރަށް މުހިންމުކަމަށެވެ. އަލީ ނަސީރު ވިދާޅުވީ މިހާތަނަށްއައިއިރު، ރަށުން ކަރަންޓު ކެނޑޭ މައްސަލަ ޙައްލުކޮށްފައިވާކަމަށެވެ. ނަމަވެސް ޖާގައިގެ ދަތިކަމުގެ ސަބަބުން ޚިދުމަތް ދިނުމުގައި ވަރަށް ބޮޑަށް ދަތިތައް ކުރިމަތިވާކަން އޭނާ ފާހަގަކުރެއްވިއެވެ. ނަމަވެސް އާ އިންޖީނުގެއާއިއެކު، އިންޖީނުގޭގެ ޖާގައިގެ މައްސަަލަ ޙައްލުވެ ދިގު މުއްދަތަކަށް ރަށަށް ބޭނުންކުރެވޭ ކަރަންޓު ކެޕޭސިޓީ ޤާއިމުކުރެވޭނެ ޖާގަ ލިބިގެންދާނެކަމަށް އޭނާ ވިދާޅުވިއެވެ.

މި އިންޖީނުގެ ތަރައްޤީކުރަނީ ކޯވިޑްގެ ތަޖުރިބާއަށް ބަލާ، ތަނުގައި ތެރޭގައި މުވައްޒަފުންނަށް ދިގު މުއްދަތަކަށް އުޅެވޭނެ ގޮތަށް، އެކަމަޑޭޝަން ބްލޮކެއްވެސް ހިމެނޭގޮތަށެވެ.

"4 މެގަވޮޓްގެ ކަރަންޓު ދެވޭނެ ކެޕޭސިޓީގެ އިންޖީނުގެއެއް މިއީ. ކަސްޓަމަރ ސަރވިސް ބިލްޑިންގަކާއި، ލޮކްޑައުން ޙަލަތުގައި މުވައްޒަފުން ތިބުމަށް އެކަމަޑޭޝަން ބްލޮކަކާ އަދި އަތޮޅު ފެންވަރުގައި ބައްދަލުވުންތަކާ ވޯކްޝޮޕްތައް ބޭއްވޭނެ މީޓިން ރޫމެއްވެސް ހިމެނޭ." އަލީ ނަސީރު ވިދާޅުވިއެވެ.

ހިމަންދޫ ސްޓޭޝަން މެނޭޖަރ އަލީ ނަސީރު ވިދާޅުވީ އާ އިންޖީނުގޭގެ %60 މަސައްކަތް މިހާރު ނިމިފައިވާކަމަށާއި ކުރިއަށް އޮތް 4 މަސްދުވަހުގެ ތެރޭގައި މަސައްކަތް އެއްކޮށް ނިންމުމަށްފަހު ޚިދުމަތް ދިނުމަށް މަސައްކަތްކުރަމުންދާކަމަށެވެ.

ހިމަންދޫގައި ކަރަންޓު ދިނުމަށް މިހާރު ބޭނުންކުރަނީ ގާތްގަނޑަކަށް 533 ކިލޯވޮޓްގެ ކެޕޭސިޓީއެވެ. މިހާރު ބޭނުންކުރަމުންދާ 3 އިންޖީނުގެ އިތުރުން، އިތުރު އިންޖީނެއްވެސް މިހާރު ވަނީ އެރަށަށް ގެންގޮސްފައެވެ.

އަލަށް ތަރައްޤީކުރާ އިންޖީނުގެ އިމާރާތް ހިންގުމަށް ބޭނުންވާ ކަރަންޓު ދިނުމަށް ހަމަޖެހިފައިވަނީ، އިންޖީނުގޭގެ ފުރާޅުގައި ސޯލާ ޖަހައިގެން ނަގާ ކަރަންޓު ބޭނުންކޮށްގެނެވެ. މީގެއިތުރުން އެރަށުގައި އަވިން ހަކަތަ އުފައްދާ ޕްރޮޖެކްޓެއް ހިންގުމަށްވެސް ސްޓެލްކޯއިން ރާވާފައިވެއެވެ.