ހިންމަފުށީ ސިއްޙީ މަރުކަޒުގެ އައު އޮފީސް ޢިމާރާތް އެޅުމަށް ޙަވާލުކޮށްފި

ހިންމަފުށީ ސިއްޙީމަރުކަޒުގެ ޖާގައިގެ ދަތިކަން ޙައްލުކުރުމަށް، އެ މަރުކަޒުގެ އައު އޮފީސް ޢިމާރާތް އެޅުމަށް ބަޔަކާ ހަވާލުކޮށްފިއެވެ. އައު ޢިމާރާތުގެ މަސައްކަތް ހަވާލުކޮށްފައިވަނީ ޔުނީކް ޗޮއިސް ޕްރައިވެޓް ލިމިޓެޑާއެވެ.

އަލަށް ތަރައްޤީކުރާ ޢިމާރާތަކީ ސިއްޙީ މަރުކަޒުގެ އިދާރީ މަސައްކަތްތަކަށް ޚާއްސަކޮށްގެން ހަދާ އޮފީސް ޢިމާރާތެކެވެ. މި މަސައްކަތް، ކޮންޓްރެކްޓަރާ ހަވާލުކޮށްފައިވަނީ 4.5 މިލިއަން ރުފިޔާއަށް، 5 މަސްދުވަހުގެ ތެރޭގައި މަސައްކަތް ނިންމާގޮތަށެވެ.

1500އެއްހާ މީހުންގެ ޢާބާދިއެއް ދިރިއުޅޭ ހިންމަފުއްޓަކީ ލޯކަލް ޓޫރިޒަމް ވިޔަފާރިވެސް ފުޅާވަމުން އަންނަ ރަށެވެ. މިފަދަ ރަށްތަކުގެ ސިއްޙީ މަރުކަޒުތަކުގެ ޚިދުމަތް ރަނގަޅުކޮށް، ފަރުވާގެ ވަޞީލަތްތައް އިތުރުކުރުމަށް ސަރުކާރުން އަންނަނީ މަސައްކުރަމުންނެވެ.

އެގޮތުން ހިންމަފުށީގެ ސިއްޙީ މަރުކަޒު އިތުރަށް ތަރައްޤީކުރުމަށް ޖަޕާނު ސަރުކާރުން، 2.6 މިލިއަން ރުފިޔާގެ އެހީއެއް މިދިޔަ އަހަރު ނޮވެމްބަރުމަހު ވަނީ ސަރުކާރާ ހަވާލުކުރައްވާފައެވެ.

މި އެހީގައި އެމަރުކަޒުގައި އެމަރޖެންސީ ރޫމަކާއި، ލެބޯޓްރީގެ ޚިދުމަތާއި، އެކްސްރޭ ރޫމަކާއި، 2 ކޮންސަލްޓޭޝަން ރޫމް ތަރައްޤީކުރުމަށްވަނީ ހަމަޖެހިފައެވެ. މިއެއްބަސްވުމުގެ ދަށުން ސިއްޙީ މަރުކަޒު ތަރައްޤީކޮށް ނިމޭއިރު އެމަރުކަޒުން ރޭޑިއޮލޮޖީގެ ޚިދުމަތާއި، ލެބޯޓްރީއާއެކު މުހިއްމު އެތައް ޓެސްޓުތަކެއް ހެދޭނެ އިންތިޒާމު ހަމަޖެހިގެންދާނެކަމަށް ރާއްޖޭގައި ހުންނަ ޖަޕާން އެމްބަސީއިން ވިދާޅުވެފައިވެއެވެ.

އަތޮޅުތަކުގައި ބޭނުންކުރަމުން އަންނަ ސިއްޙީ މަރުކަޒުތަކަކީ 2000ގެ އެންމެ ކުރީކޮޅު ތަރައްޤީކޮށް ބޭނުންކުރަން ފެށި ތަންތަނެވެ. ބަލިމީހުންނަށް ފަރުވާ ދިނުމާއި، އިދާރީ މަސައްކަތްތައްވެސް ކުރަމުން އައީ އެއް ޢިމާރާތެއްގެތެރެއިންނެވެ.

މީގެ ސަބަބުން ސިއްޙީ މަރުކަޒުތަކަށް ޖާގައިގެ ދަތިކަން އޮތީ ވަރަށް ބޮޑަށް ކުރިމަތިވެފައެވެ.