ދަނޑުތައް ސެޓިފައިކުރާނެ އޮޑިޓަރުން އުފެއްދުމަށް ޚާއްޞަ މަސައްކަތު ބައްދަލުވުމެއް

ރާއްޖޭގެ ދަނޑުތައް ސެޓިފައިކޮށް، އަދި ދަނޑުވެރިކަމުގެ އުފެއްދުންތަކަކީ ސިއްހަތައް ދުޅަހެޔޮ އުފެއްދުންތަކަކަށް ހެދުމުގެ މަޤްޞަދުގައި، ޚާއްޞަ މަސައްކަތު ބައްދަލުވުމެއް ފަށައިފިއެވެ. މިއީ މިނިސްޓްރީ އޮފް ފިޝަރީސް، މެރީން ރިސޯސަސް އެންޑް އެގްރިކަލްޗަރއާއި، ޔޫ.އެން.ޑީ.ޕީއާއި، ޖަޕާން ސަރުކާރު ގުޅިގެން ރާއްޖޭގެ ދަނޑުތައް އޮޑިޓް ކުރުމަށް އޮޑިޓަރުންތަކެއް ބިނާކުރުމައްޓަކައި ހިންގާ ތަމްރީން ޕްރޮގްރާމެކެވެ.


އިސްލާމީ ޔުނިވާސިޓި ހޯލުގައި ކުރިއަށްގެންދާ މި މަސައްކަތު ބައްދަލުވުން ފަށްޓަވައިދެއްވީ މިނިސްޓްރީ އޮފް ފިޝަރީޒް މެރީން ރިސޯސެސް އެންޑް އެގްރިަކލަޗަރގެ ޑިރެކްޓަރ ޖެނެރަލް، އިސްމާއިލް ރަޝީދެވެ. މި ރަސްމިއްޔާތުގައި ވާހަކަފުޅު ދައްކަވަމުން އިސްމާޢީލް ރަޝީދު ވަނީ ދަނޑުތައް ސެޓިފައި ކުރުމުގައި ހުރި ދަތިތަކުގެ މައްޗަށް އަލިއަޅުއްވާލައްވާ ވާހަކަފުޅު ދައްކަވާފައެވެ.

"އަޅުގަނޑު ފާހަގަކޮއްލާނީ އެއްކަމަކަށް ދަނޑުތައް ސެޓިފައި ކުރުމަށް ތަމްރީން ލިބިފައިވާ އޮޑިޓަރުން ނެތުމުގެ މައްސަލަ. މިގޮތުން މިއަދު މި ފެށޭ ތަމްރީން ޕްރޮގްރާމަކީ މިކަމަށް ހައްލެއް ހޯދުމުގެ މަޤްސަދުގައި މިނިސްޓްރީން ފަށާ މަސައްކަތެއް" ފިޝަރީޒް މިނިސްޓްރީގެ ޑިރެކްޓަރ ޖެނެރަލް، އިސްމާޢީލް ރަޝީދު ވިދާޅުވިއެވެ.

އިސްމާޢީލް ރަޝީދު ވިދާޅުވީ، މިނިސްޓްރީގެ ވިސްނުމަކީ ރަށްތަކުގެ ކައުންސިލާއި، ސިއްޙީ ޚިދުމަތްދޭ ފަރާތްތަކުގެ ތެރޭގައިވެސް، މި ދާއިރާއިން ތަމްރީން ލިބިފައިވާ އޮޑިޓަރުން ތިބުންކަމަށެވެ.

"ރަށްރަށުގައި މިފަދަ އޮޑިޓަރުން ތިބެއްޖެނަމަ މާލޭއިން، އެފްޑީއޭ ނުވަތަ އެގްރިކަލްޗަރގެ މުވައްޒަފުން ނުގޮސް ދަނޑުތައް އޮޑިޓް ކުރެވޭނެ ނިޒާމެއް ޤާއިމްކުރެވުން" ފިޝަރީޒް މިނިސްޓްރީގެ ޑިރެކްޓަރ ޖެނެރަލް، އިސްމާޢީލް ރަޝީދު ވިދާޅުވިއެވެ.

ރާއްޖެއަކީ ނާޒުކު ތިމާވެއްޓެއް އެކުލެވިގެންވާ، ފަތުރުވެރިކަމުގެ ސިނާއަތައް ބަރޯސާވެވިވަފަވާ ޤައުމަކަށްވާތީއާއި، ދަނޑުވެރިކަމުގެ މަސައްކަތް ފުޅާވެގެން އަންނައިރު ދަނޑުވެރިކަމުގެ ރަނގަޅު އާދަ ނުހިފެހެއްޓިއްޖެނަމަ އެކަމުގެނޭދެވޭ އަސަރު ދިމާވާނެކަމަށްވެސް ޙުސައިން ރަޝީދުގެވާހަކަފުޅުގައި ފާހަގަކުރެއްވިއެވެ. އަދި ފަތުރުވެރިކަމުގެ ސިނާއަތައްވެސް އެކަމުގެ ނުރަނގަޅު އަސަރުކުރާނެކަމަށް އޭނާ ވިދާޅުވިއެވެ.

"ފަތުރުވެރިކަމުގެ ސިނާއަތައް ބޭނުންވާ ތަރުކާރީއާއި މޭވާ ލޯގޯ ޖެހިގެން މާރކެޓްކުރަން ފެށިއްޖެނަމަ ދަނޑުވެރިކަމުގެ ބާވައްތަކަށް ރަނގަޅު އަގު ލިބުމަށް މަގުފަހިވެގެންދާނެ" ފިޝަރީޒް މިނިސްޓްރީގެ ޑިރެކްޓަރ ޖެނެރަލް، އިސްމާޢީލް ރަޝީދު ވިދާޅުވިއެވެ.


ރާއްޖޭގެ ދަނޑުތަކަކީ ސެޓިފައި އަދި ދަނޑުވެރިކަމުގެ އުފެއްދުންތަކަކީ ސިއްހަތައް ދުޅަހެޔޮ އުފެއްދުންތަކަކަށް ހެދުމަށާއި، ދަނޑުވެރިކަމުގެ އުފެއްދުންތަކަށް މާކެޓް ހޯދައިދިނުމުގެ މަޤްޞަދުގައި ހިންގާ މި ތަމްރީން ޕްރޮގްރާމް މިމަހުގެ 13 ވަނަ ދުވަހުގެ ނިޔަލަށް ކުރިއަށްދާނެކަމަށް މިނިސްޓްރީ އޮފް ފިޝަރީސް، މެރިން ރިސޯސަސް އެންޑް އެގްރިކަލްޗަރއިން ވިދާޅުވެއެވެ.