3 ވަނަ ސަވާދީއްތަ ދަތުރު: މިފަހަރު އީކުއޭޓަރ ހުރަސްކުރާނެ

"ސަވާދީއްތަ ދަތުރު" ގެ 3 ވަނަ އެޑިޝަން ލޯންޗްކޮށްފިއެވެ.

ސަވާދީއްތަ ދަތުރަކީ މޯލްޑިވްސް އިންޓަގްރޭޑެޓް ޓޫރިޒަމް ޑިވެލޮޕްމަންޓް ކޯޕަރޭޝަން، އެމްއައިޓީޑީސީން އަހަރަކު އެއްފަހަރު، ސިލްސިލާ ގޮތެއްގައި ކުރިއަށްގެންދާ ބައިނަލްއަޤްވާމީ ޔޮޓްރެލީއެކެވެ.

ސަވާދީއްތަ ދަތުރުގެ ފުރަތަމަ އެޑިޝަން ބާއްވާފައިވަނީ މިދިޔަ އަހަރުއެވެ. އަދި ދެ ވަނަ އެޑިޝަން ބޭއްވީ މިއަހަރުއެވެ. ފުރަތަމަ އެޑިޝަންގައި 7 ޔޮޓެއް ބައިވެރިވިއެވެ، އަދި ދެވަނަ އެޑިޝަންގައި 14 ޔޮޓެއް ބައިވެރިވިއެވެ.

"ސަވާދީއްތަ ދަތުރު"ގެ 3 ވަނަ އެޑިޝަން ލޯންޗްކުރީ ގިނަ އަދަދެއްގެ ޔޮޓްސްމަނުންނާއި އަދި ދުނިޔޭގެ މަޝްހޫރު މެރީނާތަކާއެކު، މިމަހުގެ 10 ވަނަ ދުވަހު ބޭއްވި ހާއްސަ ވާރޗުއަލް ސެޝަނެއްގައެވެ. ސަވާދީއްތަ ދަތުރުގެ 3 ވަނަ އެޑިޝަން އޮންނާނީ 2024 ފެބްރުއަރީ 10 ން 29 އަށެވެ.

3 ވަނަ އެޑިޝަން ކުރިއަށް ގެންދިޔުމަށް ނިންމާފައިވަނީ "މޯލްޑިވްސް - އަ ސްމޯލް ކަންޓްރީ ވިތް އަ ބިގް ހާރޓް" މި ތީމް ގެ ދަށުންނެވެ. މިފަހަރުގެ ދަތުރަކީ، ރާއްޖޭގެ ބޮޑު 2 ކަނޑެއް ހުރަސްކުރުމުގެ އިތުރުން ފުރަތަމަ ފަހަރަށް އިކުއޭޓަރ ހުރަސްކުރާ ރެލީއަށް ވެގެންދާނެކަމަށް އެމްއައިޓީޑީސީއިން ބުނެއެވެ.

'ސަވާދީއްތަ ދަތުރު 2024' ރެލީ ފަށާނީ މާލެ އަތޮޅު ކުޑަގިރިންނެވެ. އަދި ދެން ދަތުރުކުރާނީ ވ.ފުލިދޫ، މ.މުލި، ލ.ގަން، ލ.ފޮނަދޫ، ގއ.ކޮލަމާފުށި، ގދ.ހޯނޑެއްދޫ، ސ.ހިތަދޫ އަދި ސ.ގަމަށެވެ. 'ސަވާދީއްތަ ދަތުރު 2024' 3 ވަނަ އެޑިޝަން ނިންމާލުމުގެ ރަސްމިއްޔާތުގެ ގާލާ ނައިޓް ބޭއްވުމަށް ޤަސްތުކޮށްފައިވަނީ އައްޑޫ ސިޓީގައެވެ.

'ސަވާދީއްތަ ދަތުރު 2024' އެންޑޯޒްކޮށްފައިވާ ފަރާތްތަކުގެ ތެރޭގައި މިނިސްޓްރީ އޮފް ޓޫރިޒަމް، މިނިސްޓްރީ އޮފް އާޓްސް ކަލްޗަރ އެންޑް ހެރިޓޭޖް، އެމްއެމްޕީއާރުސީ، މަޓީ އަދި ނޭޝަނަލް ބޯޓިންގ އެސޯސިއޭޝަން ހިމެނެއެވެ. މީގެ އިތުރުން ޓޫރިޒަމްގެ އިލްމީ ދިރާސާތައްކުރާ ބައިނަލްއަޤްވާމީ ޖަމާއަތެއްކަމުގައިވާ، "އިންޓަނޭޝަނަލް ޓޫރިޒަމް ސްޓަޑީސް އެސޯސިއޭޝަން" ގެ ފަރާތުން ވަނީ 2024 ވަނަ އަހަރުގެ ޔޮޓްރެލީ އެންޑޯޒްކޮށްފައެވެ.

ސަވާދީއްތަ ދަތުރަކީ ދިވެހިރާއްޖޭގެ ޓުވަރިޒަމް އިންޑަސްޓްރީގެ އިތުރުން، ބައިނަލްއަޤްވާމީ ސެއިލް ކޮމިޔުނިޓީ ބަލައިގަނެފައިވާ އިވެންޓެކެވެ. އަދި ހަމައެހެންމެ މި އިވެންޓަކީ ދިވެހިރާއްޖޭގެ ޒަމާންވީ ތާރީޚާއި، ޘަޤާފަތާއި ފަންނުވެރިކަން އަދި ކެއިންބުއިމުގެ އާދަތަކާއި، އެހާރާއި މިހާރުގެ ދިވެހިންގެ ކުޅިވަރުތައް، މުޅި ދުނިޔެއަށް ދައްކުވައިދިނުމަށް ލިބިގެންދާ ރަނުގެ ފުރުޞަތެއްކަމަށް އެމްއައިޓީޑީސީއިން ބުނެއެވެ.

ދިވެހިންނަކީ ޒަމާނުއްސުރެ ރިޔަލު ދޯނީގައި މާސިންގާ ކަނޑުތައް ހުރަސްކޮށް، ރާއްޖެ އާއި ބޭރުގެ ކަރަތަކަށް ދަތުރުކުރި ކުޅަދާނަ ބައެކެވެ. 'ސަވާދީއްތަ ދަތުރު' ގެ އެންމެ ބޮޑު އެއް މަޤްޞަދަކީވެސް، ދިވެހިންގެ ޤަދީމީ މި ހުނަރު ދިރުވާ އާލާކޮށް، ރާއްޖޭގެ މީހުން ދިރިއުޅޭ ރަށްތައް، މުޅިން ތަފާތު ނަޒަރަކުން ދުނިޔެއަށް އިޝްތިހާރުކޮށް ޕްރޮމޯޓްކުރުމުގައި އެހީތެރިކަން ފޯރުކޮށްދިނުންކަމަށް އެމްއައިީޑީސީއިން ބުނެއެވެ.