ދުޅަހެޔޮ ޞިއްޙަތެއްގައި ތިބުމަށް ބާރުއަޅާ، ޞިއްޙީ ގިނަ މަޢުލޫމާތުތަކެއް ހިމެނޭހެން "ހެލްތް ކޯނަރ" އެއް ހެލްތު މިނިސްޓްރީގައި ޤާއިމުކޮށްފިއެވެ.
މި ހެލްތް ކޯނާއަކީ ކޮންމެހެން ހޮސްޕިޓަލަށް ނުގޮސްވެސް، އަމިއްލަ ޞިއްޙަތާގުޅުންހުރި މުހިންމު މަޢުލޫމާތުތައް މުވައްޒަފުންނަށް ފަސޭހަކަމާއެކު ބަލާލާ، ހެލްތު ސްކްރީން ކުރެވޭނެ އިންތިޒާމްތަކާއެކު ހެލްތު މިނިސްޓްރީގައި ޤާއިމުކޮށްފައިވާ ތަނެކެވެ.
މިތަން ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ހެލްތު މިނިސްޓަރ އަޙްމަދު ނަސީމް ވިދާޅުވީ، އަޅުގަނޑުމެންގެ ތެރެއިން ގިނަ މީހުންނަށް ޞިއްޙީ ކަންކަން އެނގޭއިރުވެސް، މިފަދަ ކަންކަމަށް ދެވޭ ސަމާލުކަން އަދިވެސް ނިސްބަތުން ކުޑަކަމަށެވެ. ވަކިން ޚާއްސަކޮށް ކެންސަރާއި، ސްޓްރޯކް ފަދަ ނުރައްކާތެރި ބަލިތަކަށް މިހާރަށްވުރެ ބޮޑަށް ޚާއްސަ ސަމާލުކަމެއް ދޭންޖެހޭކަން މިނިސްޓަރ ވަނީ ފާހަގަކުރައްވާފައެވެ.
ހެލްތު މިނިސްޓަރ ނަސީމް ވިދާޅުވީ ސްކޫލްތަކާއި، އަމިއްލަ ކުންފުނީގެ އިތުރުން ސަރުކާރު އޮފީސްތަކުގައި މިފަދަ ހެލްތް ކޯނާތައް ހުޅުވަންޖެހޭނެކަމަށާއި، އެފަދަ ވިސްނުމެއް ކޮންމެ ފަރުދަކުވެސް ގެންގުޅެން ޖެހޭކަމަށެވެ. ހަމައެހެންމެ ދުނިޔެއަށް އަންނަމުންދާ ބަދަލުތަކާއިއެކު މިފަދަ ކަންކަމުގައި އަމިއްލައަށް އިސްނެގުމަކީވެސް މުހިންމު ކަމެއްކަމަށް މިނިސްޓަރ ވިދާޅުވިއެވެ.