ތޮއްޑޫ "ފާމަރސް މާކެޓް" އަޅާނެ ބަޔަކު ހޯދަނީ

ބިޒްނަސް ސެންޓަރ ކޯޕަރޭޝަން، ބީސީސީއިން އއ. ތޮއްޑޫގައި ޤާއިމުކުރާ "ފާމަރސް މާކެޓް" ޢިމާރާތް ކޮށްދޭނެ ފަރާތެއް ހޯދަން އިޢުލާންކޮށްފިއެވެ. މިއީ 5،000 އަކަފޫޓުގެ ސަރަޙައްދެއްގައި ޢިމާރާތްކުރާ ތަނެކެވެ.

މި ފާމާރސް މާކެޓަކީ ދަނޑުވެރިކަމުގެ ވިޔަފާރިކުރާ ފަރާތްތަކަށް ބޭނުންވާ އެހީތެރިކަން ފޯރުކޮށްދީ ރާއްޖޭގެ ދަނޑުވެރިން ހައްދާ ބާވަތްތައް އެކްސްޕޯޓް ކުރެވޭނެ މަގެއް ފަހިކުރުމަށްޓަކައި ބީސީސީން އަޅާ ތަނެކެވެ. މިއީ މިނިސްޓްރީ އޮފް އިކޮނޮމިކް ޑިވެލޮމެންޓާއި، ޔޫން.އެން.ޑީ.ޕީއާއި ގުޅިގެން ޖަޕާނު ސަރުކާރުގެ މާލީ އެހީތެރިކަމާއެކު ހިނގަމުންދާ ޕްރޮޖެކްޓް ފޯރ ޑިވެލޮޕިންގ ސަސްޓެއިނަބަލް އެގްރިކަލްޗަރަލް އިކޮނޮމީ (ޕީޑީއެސްއޭއީ)ގެ ދަށުން ކުރިއަށްގެންދާ މަސައްކަތެކެވެ.

ބީ.ސީ.ސީއިން މިހާރު ވަނީ މިތަން ޢިމާރާތްކުރާނެ ބައެއް ހޯދުމަށް އިޢުލާންކޮށްފައެވެ. އެގޮތުން މަޢުލޫމާތު ސާފުކުރުން އޮންނާނީ މިމަހުގެ 25 ވަނަ ދުވަހު މ.ކަނީރުވިލާ 1 ވަނަ ފަންގިފިލާގައެވެ. އަދި އަންދާސީ ހިސާބު ހުށައެޅުން އޮންނާނީ އޮގަސްޓް މަހުގެ 7 ވަނަ ދުވަހުއެވެ.

ތޮއްޑޫގައި ތަރައްޤީކުރާ "ފާމާރސް މާކެޓް" އަކީ ދަނޑުވެރިންގެ އުފެއްދުންތަކުން މަންފާ އިތުރުކޮށް މާކެޓް ކުރުމުގެ ފުރުޞަތު ލިބިގެންދާނެ ތަނެއްކަމަށް ބީ.ސީ.ސީއިން ބުނެއެވެ. މިތަން ފަރުމާކޮށްފައިވާގޮތުން 10 މާކެޓް ކިއޮސްކް ސްޕޭސް ހިމެނޭނެއެވެ. އަދި ރާއްޖެއިން ބޭރަށް އެކްސްޕޯޓް ކުރެވޭނެފަދަ ދިވެހި އުފެއްދުންތައް އުފެއްދުމަކީވެސް މިތަނުގެ ބޭނުމެކެވެ.

ބީސީސީން ބުނީ، މި މަސައްކަތުގެ ދަށުން ދަނޑުވެރިންނަށް ފަންނީ އެހީތެރިކަންވެސް ފޯރުކޮށްދޭނެކަމަށެވެ. އެގޮތުން އޮގޭނިކް އަދި ދެމެހެއްޓެނިވި ގޮތަކަށް ދަނޑުވެރިކަން ކުރެވޭނެ ގޮތްތަކާއި، ދަނޑުވެރިކަމުގެ އުފެއްދުންތަކުން ވެލިއު އެޑްކޮށްގެން ބާޒާރަށް ނެރޭނެ ގޮތްތަކާއި، އެކަން ކުރަންވީގޮތް ދަނޑުވެރިންނަށް ދަސްކޮށްދެވިގެންދާނެ ކަމަށް ބީސީސީން ބުނެއެވެ.