ޖީއެމް ފޯރަމް އަންނަ އޮކްޓޯބަރ މަހު
-
ޖީއެމް ފޯރަމް އޮންނާނީ 19 އޮކްޓޯބަރުގައި
-
މި ފޯރަމް އެންމެ ފުރަތަމަ ބާއްވާފައިވަނީ 2016 ވަނަ އަހަރު
-
މި ފޯރަމްގައި ކުންފުނިތަކުގެ ޖެނެރަލް މެނޭޖަރުން ބައިވެރިވާނެ
މި އަހަރުގެ ޖެނެރަލް މެނޭޖާސް ފޯރަމް (ޖީއެމް ފޯރަމް) އަންނަ އޮކްޓޯބަރ މަހު ބޭއްވުމަށް ނިންމައިފިއެވެ. ކުރިން އޮތް ގޮތުން މި ފޯރަމް ބާއްވަން ނިންމާފައިވަނީ ސެޕްޓެމްބަރ މަހުއެވެ.
ޖީއެމް ފޯރަމް އިންތިޒާމްކުރާ ހޮޓެލިއަރ މޯލްޑިވްސްއިން ބުނީ މިއަހަރުގެ ޖީއެމް ފޯރަމް އޮންނާނީ 19 އޮކްޓޯބަރުގައި ކަމަށެވެ. މި ފޯރަމް މިއަހަރު އޮންނާނީ ބަނޑޮސް މޯލްޑިވްސް ރިސޯޓުގައެވެ.
މިއަހަރުގެ ފޯރަމްގެ ޝިއާރަކީ "އިނޮވޭޝަން އެންޑް ޓެކްނޮލަޖީ ފޯރ ސަސްޓެއިނެބިލިޓީ" އެވެ. މި ޝިއާރުގެ ދަށުން ދެމެހެއްޓެނިވި ގޮތެއްގައި ފަތުރުވެރިކަމުގެ ދާއިރާގެ މަސައްކަތްތައް ކުރިއަށް ގެންދިއުމާ ގުޅޭ މަޝްވަރާތައް ކުރާނެކަމަށް ހޮޓެލިއަރ މޯލްޑިވްސްއިން ބުނެއެވެ.
ވަކި ޚާއްސަ ޝިއާރެއް ކަނޑައަޅައިގެން ފޯރަމް ކުރިއަށް ގެންދިއުމަކީ މިއަހަރު މުޅިން އަލަށް ފޯރަމްގައި ކުރާ ކަމެކެވެ. ދެން ކޮންމެ އަހަރަކުވެސް ފޯރަމް ކުރިއަށްގެންދާނީ މިގޮތަށް ވަކި ޝިއާރެއް ކަނޑައަޅައިގެންކަމަށް ހޮޓެލިއަރ މޯލްޑިވްސްއިން ބުނެއެވެ.
ޖީއެމް ފޯރަމް އެންމެ ފުރަތަމަ ބާއްވާފައިވަނީ 2016 ވަނަ އަހަރުއެވެ. މި ފޯރަމްގެ ބޭނުމަކީ ރިސޯޓު ހިންގުމާއި އަދި އާންމުކޮށް ރާއްޖެއާއި ދުނިޔޭގެ ފަތުރުވެރިކަމުގެ ދާއިރާގައި ހުރި ގޮންޖެހުންތަކާއި ފުރުޞަތުތަކާއި ބެހޭގޮތުން މަޢުލޫމާތާއި އަދި ޚިޔާލު ބަދަލު ކުރުމާއި މިދާއިރާގައި އިސްކޮށް މަސައްކަތް ކުރައްވާ ފަރާތްތަކުގެ މެދުގައި ގުޅުން ބަދަހިކުރުމުގެ ފުރުޞަތު ހުޅުވާލުމެވެ.