ށ.މިލަންދޫގެ މަގުތަކުގައި މި މަހު ތާރުއަޅަން ފަށަނީ

ށ. މިލަންދޫ މަގުތަކުގައި ތާރުއަޅަން ބޭނުންވާ ސާމާނު ގެންގޮސް ތާރުއެޅުމަށް ތައްޔާރުވެފައިވާ ކަމަށް މިލަންދޫ ކައުންސިލުން ވިދާޅުވެއްޖެއެވެ. ޕީއެސްއެމްއަށް މަޢުލޫމާތު ދެއްވަމުން މިލަންދޫ ކައުންސިލުންވަނީ މަގުތަކުގައި ތާރު އެޅުމުގެ އަމަލީ މަސައްކަތް މިމަސްތެރޭ ފަށާނެ ކަމަށް އާރްޑީސީއާ ހަވާލާދީ ބުނެފައެވެ.

މިމަޝްރޫޢުގެ ދަށުން އެރަށު މިލަންދޫގެ 8 މަގެއްގައި ތާރު އަޅައި ޒަމާނީ ފެންވަރަށް ތަރައްޤީކުރުމަށް ވަނީ ހަމަޖެހިފައިވެއެވެ.

މަގުތައް އަޑިގުޑަންވުމާއި، ވިއްސާރަ ދުވަސްވަރު މަގުތަކުގައި ފެންބޮޑުވާ މައްސަލައަކީ ގިނަ ރަށްތަކަށް ކުރިމަތިވާ މައްސަލައެކެވެ. ޚާއްސަކޮށް ވިއްސާރަ ދުވަސްވަރު ފެން ނުހިނދި ގިނަ ދުވަސްވުމުގެ ސަބަބުން މަގުތައް ޗަކަވެ ބޭނުންކުރުމަށް ދަތިވާ ހިސާބަށް ދެއެވެ.

2500 އެއްހާ މީހުން ދިރިއުޅޭ ށ. މިލަންދޫއަކީ މީގެތެރެއިން އެއް ރަށެވެ. ފާއިތުވި އަހަރުތަކުގައި އިޤްތިޞާދީގޮތުން ރަށަށް ކުރިއެރުންތަކެއް ލިބިގެންދިޔަ ނަމަވެސް، ވަރަށް ފަހަކާޖެހެންދެންވެސް ޢުމްރާނީގޮތުން ރަށް އޮތީ ފަހަތުގައި ކަމަށް އެރަށުގެ ރައްޔިތުން ބުނެއެވެ. މިލަންދޫއަށް ދިމާވެފައިވާ ޢުމްރާނީ އެންމެ ބޮޑު މައްސަލައެއްގެ ގޮތުގައި ރަށުގެ ރައްޔިތުން އަބަދުވެސް ފާހަގަކުރަމުންދަނީ، ރަށުގެ މަގުތަކުގެ ޙާލަތު ދަށްވުމެވެ.

ރައްޔިތުންގެ މިކަންބޮޑުވުމަށް ޙައްލެއް ހޯދައިދިނުމަށް މިލަންދޫގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތް ސަރުކާރުން އާރް.ޑީ.ސީއާއި ޙަވާލުކުރެއްވީ 2021 ވަނަ އަހަރުގެ މާރޗުމަހުގެ 12 ވަނަ ދުވަހުއެވެ. މަޝްރޫޢުގެ ޢަމަލީ މަސައްކަތް އެކުންފުނިން ފެށީ 2021 ވަނަ އަހަރުގެ އޮގަސްޓުމަހުގެ 13 ވަނަ ދުވަހުއެވެ.

ޕީއެސްއެމް ނިއުސްއާއި ވާހަކަދައްކަވަމުން މިލަންދޫ ކައުންސިލްގެ ނައިބް ރައީސް ސައިފުﷲ އުސްމާން ވިދާޅުވީ މިލަންދޫއަކީ އެކި ބޭނުންތަކަށް ގިނަ ޢަދަދެއްގެ ބަޔަކު އަރާފައިބާ ރަށަކަށްވުމުން އެފަރާތްތަކުގެވެސް އެންމެ ބޮޑު ކަންބޮޑުވުމަކީ މަގުތަކުގައި އަޑިގުޑަން ހުރުމާއި މަގުތަކުގައި ފެންބޮޑުވުމުގެ މައްސަލަކަމަށެވެ.

ސައިފުﷲ ވިދާޅުވީ ރައްޔިތުންގެ އެންމެ ބޮޑު ކަންބޮޑުވުމަކީވެސް މަގުތަކުގައި ފެންބޮޑުވުމާއި މަގުމަތި ޗަކަވުން ކަމަށެއެވެ. އެގޮތުން މަގުތައް ޒަމާނީ ފެންވަރަށް ތަރައްގީ ކުރެވިގެން ދިޔުމާއެކު މަގުތަކުގައި ފެންބޮޑުވުމާއި ހެދިފައިވާ އަޑިގުޑަންތަކުގެ މައްސަލަ ހައްލުވެ ރައްޔިތުންނަށް ލުއިފަސޭހަކަން ލިބިގެންދާނެކަމަށް އޭނާ ވިދާޅުވިއެވެ. އަދި މިއީ ރަށުގެ ރައްޔިތުންނާއި ރަށުގެ ތަރައްގީއާއި ގުޅިފައިވާ މުހިންމު މަޝްރޫއެއްކަން ސައިފުﷲ ފާހަގަކުރެއްވިއެވެ.

މިލަންދޫގެ މަގުތަކުގައި ތާރުއަޅައިގެން ރަނގަޅު ފެންވަރަކަށް ހެދުމުގެ މަޝްރޫޢުގެ ދަށުން އެރަށުގެ ޖުމްލަ 6.15 ކިލޯ މީޓަރުގެ މަގު ތަރައްޤީކުރެވޭނެއެވެ. މިމަސައްކަތް ކުރުމަށް އާރް.ޑީ.ސީއާ ޙަވާލުކުރައްވާފައިވަނީ 520 ދުވަހުގެ ތެރޭގައި މުޅިން ނިންމާގޮތަށެވެ.

މިއީ ދަޢުލަތުގެ ބަޖެޓުން 156.4 މިލިއަން ރުފިޔާ ޚަރަދުކުރައްވައިގެން ހިންގަވާ މަޝްރޫޢެކެވެ.