މާލޭ ޖަލުގައި ތިބި 200 ޤައިދީން އެހެން ޖަލުތަކަށް، ބާކީ ތިބީ 20 ޤައިދީން

މާލޭ ޖަލުގައި ތިބި ޤައިދީންނާއި ބަންދު މީހުންގެ ތެރެއިން 200 މީހަކު އެހެން ޖަލުތަކަށް ބަދަލުކޮށްފައިވާކަމަށް މޯލްޑިވްސް ކަރެކްޝަނަލް ސާރވިސްއިން ވިދާޅުވެއްޖެއެވެ.

މާލޭހެ ޖަލުގެ ޖާގައިގެ ދަތިކަމުގެ ސަބަބުން ސަރުކާރުން ވަނީ މާލޭ ޖަލު ހުސްކޮށް، އެތަނުގައިތިބި ޤައިދީން އެހެން ޖަލުތަކަށް ބަދަލުކުރުމަށް ނިންމާފައެވެ. އަދި މާލޭ ޖަލު ހުރި ބިން، ދަރުމަވަންތަ ސްކޫލުގެ ބޭނުމަށް ދިނުމަށް ވަނީ ނިންމާފައެވެ.

މޯލްޑިވްސް ކަރެކްޝަނަލް ސާރވިސްއިން ވިދާޅުވީ މާލޭ ޖަލުގަތި ތިބި 200 ޤައިދީން ހުޅުމާލޭ ޖަލާއި، މާފުށީ ޖަލު އަދި ހިންމަފުށީ ޖަލަށް ބަދަލުކޮށްފައިވާކަމަށެވެ. އަދި ބާކީތިބި 20 ޤައިދީންވެސް ޖަލުތަކަށް ބަދަލުކުރުމަށް މަސައްކަތްކުރަމުން އަންނަކަމަށް ކަރެކްޝަނަލް ސާރވިސްއިން ވިދާޅުވިއެވެ.

ބޮޑުތަކުރުފާނު މަގުގައި ހުންނަ މާލޭ ޖަލަކީ، ރިމާންޑް ސެންޓަރެއްގެ ގޮތުގައި 2003 ސެޕްޓެމްބަރ މަހުގައި ހުޅުވި ތަނެކެވެ. ފުރަތަމަ އެތަން ބޭނުން ކުރަމުން ދިޔައީ މާފުށީ ޖަލުން އެކިއެކި ކަންކަމުގައި މާލެއަށް ގެންނަ މީހުން ވަގުތީ ގޮތުން ބޭތިއްބުމަށާއި، އަރުވާލުމަށް ޙުކުމްކުރެވި ރަށަކަށް ބަދަލުކުރެވެންދެން ބަންދުކުރުމުގެ އިތުރުން، ގޭބަންދުކުރުމަށް ޙުކުމްކުރެވޭ މީހުންގެ ތެރެއިން ޙަވާލުވާނެ ފަރާތެއް ނެތް މީހުން ބަންދުކޮށްފައި ބޭތިއްބުމަށެވެ.

ނަމަވެސް 2006ވަނަ އަހަރު އެޖަލުގެ ތެރޭގައި އައު ގޮޅިތަކެއް ހެދުމަށްފަހު ދިގު މުއްދަތަކަށް ބަންދުކޮށްގެން މީހުން ބައިތިއްބަން ފެށިއެވެ. ވޭތުދިޔަ ހަތަރު އަހަރު މާލެ ޖަލުގެ އެނެކްސް އެކެއް ބޭނުންކޮށްފައިވަނީ މުސްކުޅިންނާއި، ދިގުމުއްދަތަކަށް ފަރުވާ ބޭނުންވާ ބަލިތަކުގައި ބޭސް ފަރުވާކުރާ މީހުންނާއި، ބެލެހެއްޓުމުގައި ޚާއްޞަ އެހީތެރިކަން ދީގެން ބަންދުގައި ބައިތިއްބަންޖެހޭ މީހުން ބޭތިއްވުމަށްކަމަށް ކަރެކަޝަނަލް ސަރވިސުން މަޢުލޫމާތުދެއްވައެވެ.

ސަރުކާރު ބަދަލުވެ ޖަލުތައްހުރި ޙާލާތު ދެނެގަތުމަށް ބެލިބެލުމުން މާލޭ ޖަލުގެ އެނެކްސް އެކެއް ހުރީ އިންސާނީ ކަރާމާތް ނުގެއްލޭ ގޮތަށް މީހުން ބަންދުކޮށްގެން ގެންގުޅުމަށް އެކަށީގެންވާ ވަރުގެ ތަނެއްގެ ގޮތުގައި ނޫންކަމަށާއި، އާދައިގެ ކުދިކުދި މަރާމާތު ކޮށްގެން އެތަން ބޭނުންކުރެވޭނެކަމަށް ނުފެންނަ ކަމަށް ކަރެކްޝަނުން މަޢުލޫމާތުދެއްވައެވެ.

ޖަލުތަކުގެ ހާލަތާއި ގުޅޭގޮތުން ހޯމް މިނިސްޓަރ ޢިމްރާން ޢަބްދުﷲ ވިދާޅުވީ މިސަރުކާރުގެ ވެރިކަމާ ހަވާލުވިއިރު ރާއްޖޭގެ ޖަލުތަކުގެ ޙާލަތު އޮތީ ވަރަށް ގޯސްކޮށް ކަމަށެވެ. އެހެންކަމުން ޖަލުތަކުގެ ޙާލަތު ރަނގަޅުކުރައްވަން ގިނަ މަސައްކަތްތަކެއް ސަރުކާރުން މިހާތަނަށްވެސް ކުރައްވާފައިވާކަމަށް މިނިސްޓަރ ވިދާޅުވެފައިވެއެވެ. އެގޮތުން ޖަލުތަކަށް ދިމާވެފައިވާ އެންމެބޮޑު މައްސަލައަކީ ޖާގައިގެ ދަތިކަމަށާ، އެމައްސަލަ ޙައްލުކުރުމަށް މިހާތަނަށްވެސް ގިނަ މަސައްކަތްތަކެއް ކުރެވި ޖަލުތަކަށް ޖަގަ އިތުރުކުރެވިފައިވާކަމަށް މިނިސްޓަރ ވަނީ ވިދާޅުވެފައެވެ.